اشعلتوا حماسي وهيجتوا ذكرياتي

[ابوخـالد]

السلام عليكم

كيفكم جميعاً ...!

انا من عشاق الكاسكو ، وتجربتي معاه قديمه

من عام 1412هـ ( قبل 19 سنه ) أول كاسكو شريته وهي بداية الحب الحقيقي

هذاك الطير بالذات ما أنساه ولا اخواني والوالده نسوه

عجيب سبحان الله .....

ما انسى حركاته ... طبعا دايم فاتح له القفص وما اسكره الا وقت النوم

اذا اجتمعنا للغدا يطق الباب بمنقاره " افتح الباب "
ههههههههه ياحليله
أول مره سواها انفجعنا نحسبه واحد قلط علينا

كلمات عد واغلط

اذكر شاريه بـ 3500 ..... وبعد فتره من وجود الطير .. ولد اخوي جته حساسيه ويوم ودوه الدكتور سألهم ؟ هل تربون حيوانات بالبيت او طيور ..وقال لهم هذا سبب حساسية ولدكم
وابوي الله يرحمه يوم وصله خبر بكلام الدكتور .. اخذ الببغاء بدون ما ندري وباعه ..

الوالد الله يرحمه ماكان يعرف لاسعارها ومن اول سومه باع
1500 ريال .. وبعد مد وجزر مع الوالد رحمة الله عليه علمني وين مكان اللي اشتراه ورحت احاول فيه واترجاه يرجعه ورفض رفضا تاااااااااااااام قال ابيعه لك أما ارجعه لا


هذي اول تجربه لي باختصار ...

هذيك الايام كنت بثاني ثانوي .... ووقت الاجازه الصيفيه الوالد سافر لمصر مع خالي لاجراء عمليه لعين خالي

وتفاجئت بعد رجوعهم واستقبالهم .. إن الوالد الله يرحمه بيده قفص ..

بغيت اناقز من فرحتي يوم شفت اللي بالقفص

الوالد يوم شاف زعلي على بيع الببغاء حب يعوضني بواحد ..
" الله يرحمك يايبه "


المهم الببغاء هذا ماقد شفت مثل جرأته وحركاته وخفة دمه

أول مامسحت على راسه ويقول الطير

أبوك السقا مات .... ويعطيني هذيك البوووووووسه


قلت حلو هذي بدايه تبشر بطير ممتاز ماشاء الله

ورحنا البيت والطير فعلا ماعنده مشكله

بيت جديد بيئه جديده اشكال جديده عاااااااااااااااااااااااادي
رقص وكلام وبوس وامثال مصريه واصوات تلفون وبواري ههههههه زي ازعاج البواري بمصر

طبعاً دخلنا المعمعه بثالث ثانوي وخفت يشغلني فحبيت ابيعه

اول مانزل فيه سوق الطيور

طبعا الكلام اللي فوق يوم كنت بالدمام وقبل انقل جده

والله التمّوا علي الشريطيه

وهذا يعطيني 1000 وهذا يرفع 100 والثاني يزيد 200

الين وصلوه 1500 بمجرد دخولي السوق
وأول ماحطيت القفص ويشتغل الطير ماشاء الله حركات وكلام وامثال مصريه

وهذا يزيد والثاني يزيد عليه
2500 وبعته بدون تردد ..القناعه حلوه خاصةً إن الوالد شاريه بـ 1000 ريال سعودي من هناك

وماشاء الله اللي اشتراه مني والله ياجماعة الخير ما امداني احط فلوس الطير بمخباتي إلا هو باعه بـ 3000 الله يبارك له


إلى هنا ووقفت طووووووووووووووووووووووووووول المده والسنين إلى أن دخلت منتداكم هذا كمطّلع ومتصفح


عاد الكلام هنا وأنا بجده

لي فتره اقرا عن الكاسكو بالمنتديات بعد ماشفت الدرّه عند ارحامي حنيت للكاسكو
وقمت الفلف من منتدى لثاني الين وصلت عندكم

ومن موضوع لثاني لثالث لرابع لعاشر

وأمس عقدت العزم أنزل المحلات وأبدا رحلة البحث عن طير يرضي طموحي

وماكنت متصور ولا مخطط للشراء بهذي السرعه

دخلت محل مقابل اسكان الشرفيه من جهة الشرق اعتقد <<< لاتلوموني على الجهات أنا جديد على جده


ومالقيت عنده إلا واحد مش اليف ويجعر

طلعت ورحت ك 2 في محلات هناك .. 3 محلات

دخلت أول محل ... لقيت مجموعه طيبه

3 منهم اليفه والباقي لا

واحد ما اعجبني وشكله تعبان بس يغمض
رحت للثاني سبحان الله ماخش مزاجي ولا ارتحتله مدري ليه

الثالث ماشاء الله عليه جرئ وذكرني باللي شريناه من مصر
أول مانزل القفص ومجرد تقرب وجهك ..يقرب منقاره ويبوس
وقال .. يعقوب وقعد يلعب

قلت بس هذا هو المطلوب لكن

(( لكن ))

ريشه بالظهر منتف وكأنه دجاجه

ومن عند الصدر برضو منتف ... عاد أنا خبرتهي بالامور هذي بسيطه .. سألت البايع قال ماكان كذا ويمكن من الزهق

بكم طيب ؟؟؟ 2500

وين 2500 ؟؟ سلامات

ويقعد يمدح بالطير

قلت والله على حالته هذي مايعدي 1300

وقام يحلف والله واحد سامه بـ 1700

ورفعنا السعر لـ 1500 ورافض

قال اقولك مسيوم 1700 ويحلف
قلت عشان حلفك .. ابفرق السومه 50

قال اصبر ادق على راعيه
قلت حلو عطني اياه اكلمه
كلمته
شاب صغير باين من صوته .. عمره لايتجاوز 15

الولد رافض الا 1850 وانا صممت على 1750
ونزّل السعر لـ 1800 وانا مسّكت معي 1750

قلت للولد بشوف السوق وارجع اكلمك



طلعت من المحل رحت للي بعده ومالقيت عنده إلا فروخ غيني
وماني فاضي تربيه وتعليم

رحت للي بعده

لقيت 3 ماشاء الله عليهم ولفت نظري واحد أول ماشاف ولدي قام يرفرف بجنحانه ويبوس وقال كوكو

قلت هلا والله جايك ياكوكو قلبي انت

طلبت العامل ينزل اثنين فقط

واثناء مداعبتنا للطيور إلا واحد يغني آآآآآآآآآآآآلو بابا فين نقولو مين ههههه الطير حافظ الاغنيه احسن مني

بس الصوت مش جاي من الطيور اللي نزلناها

والتفت جهة الصوت إلا ذاك الامزوني ماشاء الله عليه

لكن الامزوني ماحب ازعاجه بالتصفير وصوته عالي

ماشاء الله على ذاك الطير

قلت خلي القفص هذا وارفع الثاني خلاص


واقلب يمين يسار ..يسار يمين .. فوق تحت ... واحك راسي وامسح منقاره واصفرله

قلت بنفسي هذا هو المطلوب

بكم . ؟
2300
ياهوووو غالي مره

كم من الآخر أنا شراي ماجيت اتفرج
2200

عزيزي ... 1500 بعتني ؟

طبعا رفض وانا طلعت وركبت السياره واشاور نفسي وولدي

ولدي طبعا شاف الهامستر وابلشني بابا خلاص مانبي ببغاء نبي هامستر

المهم رجعت ومن عند الباب 1600 تبيع ؟؟

قال شوف .. هذا رقم صاحب الطير دق عليه تفاهم معاه


قلت من اول ياخي


طووووووووووووووووووووووط طووووووووووووووووووووووووووووووووووووط

لم يتم الرد ..

شوي الا دق علي

الو
هلا

وكلمه في كلمه في ثلاث كلمات ومساومات إلى أن وصلنا لسعر 1900

وشريت الطير ولله الحمد

أسأل الله أن يبارك لنا فيه
ويكفيه شر العين

وشر البسّه تومي

الطير ماشاء الله عليه بأمانه يستاهل

الله يرزق عشّاق الكاسكو بطير مثله

حبيب واليف وثقل

أول مادخلنا البيت .... وولدي يقول الطير دمه ثقيل لايتكلم ولا شي ولونه مش حلو يابابا

مارديت على الولد وفتحت سقف القفص
خليته يطلع واثناء مسحي لمنقاره صادف إنه قال
اسكت ياواد
هههههههههههههههههههههههههههههههه

ولدي انقهر رد عليه اسكت انت

وانبسط خلودي قال رهيب رهييييييييييب


وان شاء الله احاول ازودكم بفيديو لو فضيت اصوره باذن الله




بالنهايه

لاتنسو ذكر الله


سبحان الله وبحمد سبحان الله العظيم



ماشاء الله لاقوة إلا بالله


لاإله إلا أنت سحانك إنّا كنّا من الظالمين

[كاسكووووو]

ماشاء الله تبارك الله قصه روووووعه

[المحب للدرة]

ماشاء الله يتربى في عزك ان شاء الله
مع خلودي

[ابوخـالد]

المشاركة الأصلية كتبت بواسطة كاسكووووو

ماشاء الله تبارك الله قصه روووووعه

مرورك الاروع يابعدي

[ابوخـالد]

المشاركة الأصلية كتبت بواسطة المحب للدرة

ماشاء الله يتربى في عزك ان شاء الله
مع خلودي

وعزّك يالغالي

[medozoom]

بسم الله ماشاء الله تبارك الله

من جد انت لعبت بحسبتي بها القصه وانت بعد اشعلت حماسنا معاك

شرح وكلام عيشتنا الجو بكل حذافيره

صلاتي على النبي تعرف تنقي ماشاء الله عليك

الله يبارك لك ويعطيك خيره ويكفيك شره ويرزقك من واسع فضله

اخوك

محمد

[ابو يمن]

انسجمت مع قصتك يابوخالد كان قلت انك شريت كاسكو وخلاص ..هههههه .. امزح ..
بس اذا اشتريته عشان تبيعه غلطان انا زعلت لما قلت انك بعت واحد ايام الثنويه..
عالعموم حياك الله بين اخوانك يابوخالد ..

[ابوخـالد]

المشاركة الأصلية كتبت بواسطة medozoom

بسم الله ماشاء الله تبارك الله

من جد انت لعبت بحسبتي بها القصه وانت بعد اشعلت حماسنا معاك

شرح وكلام عيشتنا الجو بكل حذافيره

صلاتي على النبي تعرف تنقي ماشاء الله عليك

الله يبارك لك ويعطيك خيره ويكفيك شره ويرزقك من واسع فضله

اخوك

محمد

هلا اخوي محمد
جزاك الله خير ياغالي

وتشرفت فعلا بمرورك وردك

[ابوخـالد]

المشاركة الأصلية كتبت بواسطة ابو يمن

انسجمت مع قصتك يابوخالد كان قلت انك شريت كاسكو وخلاص ..هههههه .. امزح ..
بس اذا اشتريته عشان تبيعه غلطان انا زعلت لما قلت انك بعت واحد ايام الثنويه..
عالعموم حياك الله بين اخوانك يابوخالد ..

هلا بالغالي ابويمن

ماعمري شريت عشان أبيع

وايام الثانويه حماس زايد

[ياسر الحربي]

اول شي رحمه الله على والدك وعلى اموات المسلمين

ثاني شي والله اني دخلت جو مع هالقصه

تقبل مروري واحترامي