استفتاء عن الجامعة ...ضروري

[..عاشق..]

مساء الخير لاحلى اعضاء في احلى منتدى





اختي عندها استفتاء عن الجامعة اتمنى انكم تساعدونها





اللي دخل الجامعة اكيد حس بفرق كبير بين الثانوية و الجامعة

ابي اسألكم عن الفرق بين الدراسة الثانوية و الدراسة الجامعية


ارجوكم ردو علي بسرررررعة

لانه مطلوب منها بأسرع وقت خلال اسبوع لازم يكون جاهز



عليه 30 درجة



ياليت تساعدونها

[Dominique]

الجامعة تكدش على الفاضي..

أتكلم بشكل عام :

بعض الدكاترة عباله بيخرج فطاحل وعلماء..

مايبقى واجب مايعطيهم، مايبقى بحث ما يطلب منهم وكله

" أبيه جاهز المحاضرة الياية "

" الغياب بدرجة أو نص درجة "

يعني الثانوية واااااايد أرحم من الجامعة.. طبعا مو كل الكليات ولا كل الدكاترة مو زينين

بس يقولك الخير يخص والشر يعم يعني من بين 10 دكاترة مو زينين تلقى واحد أو 2 ينحطون على الجرح يبرى

وبعدين المواد اللي الطالب يمتحن فيها كميتها كبيرة حق امتحان واحد يعني يبيله اسبوع وانت تدرس مادة وحدة بس.. ومايكون فاينل بعد .. لأ بس كويز وكميته كمية ميد تيرم عيل شلون الفاينل !


وفي دكاترة أعرفهم كل محاضرتين الثالثة كويز ..

وبالنسبة لبعض الكليات .. مثلا الطب أعرف كذا بنت تركتها و السبة لعانة الدكتور ..

بالطب عندنا البنات مالهم الأولوية في أي شي.. الذكور أهم اللي ماكلين الجو ..

يعني الطالب الولد يبي يستأذن من المحاضرة ماكو مانع بس البنت خل تفتح حلجها يقولها الدكتور المحاضرة تتعذرج !

إذا الدكتور دخل يدخل عقبه الولد مو مشكله أهلا وسهلا .. والبنت يقولها ليش متأخرة واخذ الزف عاد ..

طبعا وقت تسجيل المواد على الانترنت كله شعب مغلقة .. إنت وحظك متى يكون موعد تسجيلك وما تقدر تدخل قبل.. على ما تدخل يقولونلك الأولوية للمستجدين إذا راجعتهم بالعمادة

والتسجيل اللي يسمونه by force هم مو الكل يفيدك بهالنوع من التسجيل والشعب مغلقة .

والبايخ في الدوام إنه كل المحاضرات تبدي الصبح بنفس الموعد في كل الفصول يعني صيف شتا رمضان ماكو فرق على نفس التوقيت

هذي حال الجامعة عندنا بالكويت على حسب الحالات اللي صادفتها واللي شفته بنفسي

والثانوية أرحم من حيث كمية المواد وسهالة المدرسات مع الطالبات

وهم أرجع وأقول مو كل الكليات مو زينة ولا كل الدكاترة شينين ويمكن باقي الاعضاء يفيدونك أكثر



تحياتي

[قطقوطه]

انا بالنسبه لي الثانوي افضل فيه تنظيييم مره ويكون جاهز ومطبق عالجميع اما الجامعه لا انت تنظم كل شي بنفسك ونادر ان قدرت تنظم مثال على كذا جدولك المدرسه تعطيك جدول منظم ووقت ثابت يوميا لكن الجامعه حوسه جدولك وانت تسويه ومصيبه لا جت دكتور قشره وما رضت تضيف لك الماده وتاخرت مستوى علشان مادتها
بس دراسه الجامعه اسهل بكثير ومافيها واجبات
الشي الحلو بالثانوي تغيب على كيفك وبالاخير خطاب من الوالد ولا اي مستشفى يكفي لكن الجامعه معاك 3 غيابات اذا تجاوزتها ينزل لك حرمان ولا يقبلون الا عذر من مستشفى حكومي تابع للجامعه
بالنسبه للاختبارات
الثانوي كل يوم ماده واذا صارت ماده صعبه حطو يوم قبلها للدراسه
اما الجامعه تلاقي بنفس اليوم ممكن ثلاث مواد وكلهم صعبات وما تقدر تعتذر عن اي وحده فيهم وبالاخير تحمل هال3 مواد انا عن نفسي بترم من التروم كان عندي الربوع اختبار نهائي محاسبه واقتصاد واحصاء وكلهم حملتهم

عموما كل منهم له ميزه

[سنشيرو زوكاتا]

هههههههههه
ماازيد على كلام الاخوان هم اعرف
ولكن اتوقع الجامعه فيه شده اكبر يعني الثانوي يعملونك على انك ماتعرف مصلحة نفسك
اكتب حل بيجيك انتبهله هذا مهم حط تجته خط الاسئلة ماتخرج عن الدرس الفلاني والموضع اللي ماني عارف ايش
بس الجامعه راسك والطريق ياتسبع نفسك وتصير ادمي ياتاكل هواء وتحمل الثلاثة مواد اللي عليك

[توتي]

بالنسبه لي أنا فخلوني اقول رايي بما اني العجوز الوحيده في المنتدى.. كح كح ومتخرجه من زمان..

بالنسبه لي الثانويه او ايام المدارس.. كل شي كان يجي بالتدريج يعني كل ما نكبر مرحله كل ما تكون مختلفه شوي عن اللي قبلها واصعب منها بشوي.. كان اعتمادنا على المدرسات بشكل كامل.. وما كان يهمنا شي.. من ناحيه الشرح فبينعاد.. ومن ناحيه الغياب ففي مليون عذر.. ويكفي انه المدرسات عرب يعني نعرف نتعامل وياهم وكلنا فاهمين بعض.. << شغل واسطات ومصالح خخخ وكنا عارفين جدولنا عدل وعارفين الحصص.. كل شي محدد عندنا حتى الامتحانات موحده والاجوبه واحده ما تغير.. في بحوث ولكنها بسيطه.. من غير انه وقتنا كان محدد في المدرسه بيبدأ هالساعه وبينتهي هالساعه.. ما كنا نعاني من ضيق الوقت.. اشياء بسيطه ومكروهه مثل الالتزام بطابور الصباح.. << والله كنت احبه وادايما اطلع في الاذاعه.. خخخ وفي تمارين الصباح.. وفي كلاس الرياضه اللي عمري ما فلحت فيه.. بس والله كنت احب المدرسه واايد واحب مدرساتي والحصص.. وكل شي له وقته ومرحلته.. بس اقولكم عيشو كل لحظه الانه بيكم يوم وبتفتقدون هالشي..

اما الجامعه.. فهي تختلف تماما عن المدرسه.. يعني كل هالسنوات اللي درسناها في المدرسه تعتبر ولا شي الانا في الجامعه بنحدد مستقبلنا وتخصصنا اللي عليه راح نتوظف.. يعني شي مصيري.. في الجامعه نتعلم الاعتماد على النفس.. وتحمل المسؤوليات.. كل شي يكون فوق راسنا.. نتعلم كيف نظم وقتنا.. وطبعا محاسبين على اي زله واي تأخير.. وقتنا ما يكوون ملكنا.. لدرجه اني مرات ما كنت اشوف اللي في البيت.. شغل في شغل اجتهاد في اجتهاد.. ما شي تساهل في اي شي.. ما شي شغل واسطات.. كل شي ممنوع.. كل شي لازم يكون من مخنا واجتهادنا والابحاث لازم تكون مختلفه واي شي متشابه حتى لو كانت جمله تكون غش وطرد على طول.. واي شي منقول من الكتب او النت لازم نذكر المصدر.. كنا نحفظ شي وندرس شي وفي الامتحان يجي شي مختلف تماما عن اللي درسناه.. تعلمنا على السرعه وتنظيم الوقت والواجبات.. وهاللي ما درسناه خلال هالسنوات و تعودنا عليه لدرجه انا قمنا نطبقه في حياتنا العاديه.. وطبعا هالشي طيب.. بالاخير صدقوني كله يكون لمصلحتنا ونتخرج واحنا مأهلين تماما للوظيفه.. ومستفيدين وعندنا مهارات عاليه.. بس شدوو حيلكم..

اما بالنسبه للكليه اللي درست فيها كانوا ا لمدرسين كلهم اجانب وحتى المدير كان يهودي الله يغربله.. وكانو يستلعنون علينا يعني بيضحكون في ويهنا ومن هناك شي ثاني.. من غير في تنافس كبير بين الطالبات.. وقت الشغل شغل.. ما كانو يرحمونا ولو بنص درجه.. ملتزمين في الوقت وبقوانين الكليه اللي ما تخلص.. بس كانت ايام حلوه.. وتعلمنا واايد اشياء.. والحين قاعدين نطبق اللي درسناه والحمد الله على كل حال..

كل مرحله لها تجاربها نتعب ونهلك وبالاخير احنا المستفيدين ولله الحمد.. عيشو كل لحظه الانه بيكم يوم وبتحنوون لها لايام.. وحطوا في بالكم انه الحياه مش سهله.. كل ما كبر الانسان وانتقل لمرحله كل ما كثرت مسؤولياته وزاد همه وندم على اللحظه اللي ضاعت من ح ياته بدون ما يستغلها.. والله المستعان..

[..عاشق..]

يعطيكم العافية على ردودكم وعلى ارائكم الحلوة


تحياتي

[CaTTy]

اللي قبلي كفوو وفوو

بس مثل ماقالت اختي دومنيك مو كل الكليات جذي

فمثلا كليه التربيه الواحد يحس انه تساهل حيل ويحبون الجامعه اكثر من الثانويه لما يكونون بكليه التربيه او العلوم الاجتماعيه او الادرايه

اما الطالب اللي بكليه الطب او الهندسه او العلوم يقعد يعد الايام متى يتخرج لانع صراحه كرف وماكو وقت لما ترجع للبيت بالغصب تقدر تنام وتقوم تتغدا ( بوقت العشى ) وبعدين جابل الريبورتات وادرس للكوزات والمدتيرمات

بس في شغله بين المدرسه والجامعه

بالمدرسه يعاملوننا كاننا بالجيش قوانين ونظام لـ لبس وهذا ممنوع وهذا مسموح .. وهالساعه تعال للصف واذا ما جيت او تاخرت حاسبوك واذا غبت لازم عذر طبي واستدعاء ولي الامر

يعني نظام نظام

انا بالجامعه از يو لايك تبي تحضر اهلا وسهلا .. ماتبي تحضر شي راجعلك بس انت الخسران وانت اللي بتاكلها .. الاستاذ مو ملزوم يركض وراك ويشوفك انت فهمت او لا

بس فيه بعض الدكاتره صراحه اكثر من ام او ابو او اخت بعد

يعني ساعات ينصحونك بشغلات خارج اطار الدرس ممكن يسمعونك قلت شغله فيحبون يوجهونك ويبينون لك انها مو زينه

وفيه دكاتره تروحلهم وتسالهم عن ماده واذا اهي صعبه وينصحونك

وطبعا فيه العكس اللي نفسيتهم بخشومهم ..

فكل شي له عيوبه ومساوئه بس اللي يبي يدش الجامعه خل يحط في باله انه اهو اللي يركض ورا الدكاتره مو اهم اللي يركضون وراه نفس المدرسه ..