تكفون فزعتكم يالنشاما..ضربت ببغائي

[أبو فهـد]

السلام عليكم

أولا انا عارف ان اللي سويته خطأ مية في المية بس اسمعوني

هذا افريقي شريته من عشرة شهور كان عمرة (ست شهور)

المهم الببغاء ياكل من ايدي بس مشكلته مرعوب دايم يخاف وبهذلني يقرررط الخشبه اللي يوقف عليها الين يخربها.. واغير جديدة ويقرطها.

معاي انا يعطيني راسه احيانا واحيانا اذا جبت ايدي عنده قرطها وكش. طبعا حاولت كل الطرق انه يرقا على ايدي وكان رده دايم "ضف وجهك".

مانطق الا كلمة "الو"

المهم مايبي اي احد من البيت ويخاف من الكل

انا عندي طفلين واحد عمره 4 سنين
اذا شافه الببغاء يحاول يهجم عليه وانا دايم ابعده عنه

رفقعت القفص متر ونص عن الارض لكن برضه استمر معادي للطفل ويصيح صياح مزعج

صحته تمام كل شهرين اكشف عليه عند مركز الببغاء اللي بمخرج 9 والدكتور يقول ممتاز ماشاءالله

قبل اسبوعين نزل من القفص وكان طفلي يمشي من جنبه وقرطه قرطه والله بغت تحتاج خياطه لكن ربي ستر

المهم انا بشر.... عصبت لما صار كذا بولدي ... رحت هاوشته وبدون ما ادري ضربته على راسه..قرطني وضربته مره ثانيه

الآن صار يخاف مني لما اجي عنده.. ياكل من ايدي بس لو تحركت اي حركه يعصب ويعض

انا الآن عزلته بالملحق عن الاطفال وصرت اقعد معه اطول مده

يصيح صياح مزعج احيانا واحيانا يصفر تصفير حلو

من بعيد خذ طير بس الا قربت له ارتز وخاف.

وش اسوي يا اخواني هل فيه حل ولا خلاص الطير ضاع مني