اشترك في نشرتنا البريدية ليصلك كل جديد

تفاحه حمرا · 31-07-2007, 01:28 AM

السلام عليكم

اخواني اعتقد موضوعي واضح من العنوان

ابيكم تذكرون لنا اي موقف تعرضتوا فيه للخطر و صارلكم من تربية

الافاعي.. عشان المبتدأين مثلي يستفيدوون ..

اتمنى ذكر :-

نوع الافعى -

الموقف الي صار :-

وكيف تصرفتوا : -

والله يعينكم علي وعلى اسئلتي

صورة تتناسب مع حدث الموضوع << مجرمة

الطاير · 31-07-2007, 01:49 AM

ههههههههههه

شكلك يا اخت تفاحة عزمتي امرك تربين افعى .....

بالتوفيق .... لاكن

انا ماعمري ربيت افعى ..
بس اعرف عنها حاجات كثير من التلفزيون ....

1- واهم شي الافعى مافيها عقل ... ماتميز بين صديق وعدو ... فيجب الحرص اثناء التعامل معها ,,,
2- حوض الافعى او بيت الافعى الي تنام وتعيش فيه مليان بانواع واشكال من الجراثيم والبكتيريا !!!
ومن ابرزها السالمونيلا .... فالحذر الحذر .... (وخاصة على سكان المنزل الصغار ,,)
3- يمكن تحصلين نوع افعى مش سام .. وعادي لو لدغك مرة او مرتين .....
لاكن لدغة ورى لدغى ورى لدغة يمكن لاقدر الله بعد كم سنة تلاقين نفسك مصابة بعلة في الكلى

هذا الي اعرفه ,,,,
وبالتوفيق ....

الطاير

هاوي ثعابين · 31-07-2007, 02:06 AM

انا الحمد لله حتى الان ولا عضه سامه

اما الاصلات و الثعابين غير السامه فحدث ولا حرج من كثرها ما صرت اعد

الجدير بالذكر انو كان عندي اصله ملكيه طولها تقريبا 1,3 متر و المعروف عن الاصلات الملكيه انها اكثر الاصلات الفه و هدوء اما هذي كانت مجرمة ما كانت تخلي أحد يلمسها و لا حتى يقربلها و طول الوقت تنافخ حتى الفار لما تكون شبعانه و اعطيها فار تقوم تعضه و تخليه ينزف و يموت ولا تاكله و مرة سويت بطل و شلتها كان واحد من الشباب يبي يصورها و عضتني فوجهي الله ستر ما جت فعيني بس تركتلي نقط فوجهي(اثار الاسنان)و شويه دم.
و مره كنت ابي انقلها من الرياض للدمام حطيتها في قفص عادي (ابو شبك) مثل حق الدجاج(أكبر غلطه) ولله و طول الخط كانت تضرب و تعض في الشبك لين سوت فيه فتحات و طلعت (و ان بغيتو الحق الشبك كان ضعيف) و بعد ما طلعت من الشبك كنت بأصدم بسببها و على طول وقفت على جنب و مسكتها و رميتها في الدبه (صندوق السياره) بعد تأكدت من خلوه من الفتحات و بعد ما وصلت طلعتها و عضت فيني في كل مكان الى ان لقيتلها حوض و صرت ما امسكها ابد الى ان بعتها.

كانت اسوء اصله ملكيه مرت علي و آسف على الاطاله

madrule2002 · 31-07-2007, 03:34 AM

الحمد لله ما قد عضني سام بس الاصلات حدث ولا حرج

LiMiTeD · 31-07-2007, 04:29 AM

اختي تفاحه امر العضات عادي كل مربي ثعابين يجيلك يوم وينعض فيه بس مو شرط العضه اذا انتي الله رزقج بأفعا اليييفه جذا فانا في بدايات ما انعضيت لم دشيت بالعميق مثل ما يقولون حصلتي كم عضه ومن المواقف الحرجه الي حصلت معاي وانا احمل اصله بطول 3 امتار ونص لفت عن رقبتي والحمد لله اني تصرفت على طول ولا كان انا في عداد الاموات

بس نصيحتي لا تاخذين اصله لانها راح تكبر وتتوهقين فيها فخلج على الصغار مثل : (kung snake - milk snake - corn snake) وانا انصح المبتدئين بهالثعابين وخاصتًا البنات

ويعطيكم العافيه

العابر · 31-07-2007, 05:44 AM

الاصلات غير سامه وجميع انواع الثعابين تتروض واخوي الطاير الافعى لاتعيش في بكتريا جراثيم وفي امراض تصيبها وتجعلها تموت يوم يكون في فمها بكتريا

اتمنى ذكر :- ؟؟

نوع الافعى - انواع من الخليج

الموقف الي صار :- الحمدالله خير ماسار لي شي

وكيف تصرفتوا : -

الطاير · 31-07-2007, 10:08 AM

اقتباس:

المشاركة الأصلية كتبت بواسطة العابر

الاصلات غير سامه وجميع انواع الثعابين تتروض واخوي الطاير الافعى لاتعيش في بكتريا جراثيم وفي امراض تصيبها وتجعلها تموت يوم يكون في فمها بكتريا
: -

حياك الله يالعابر ,,,,

ياطويل العمر نا ماجبت شي من بنيات افكاري ,,,
اتذكر زمان وانا اشوف التلفزيون ...
في احد البرامج راحو لحوض زجاجي حق افعى ((الاصله على ما اذكر)) واخذو منه (الحوض) عينات ,,,
وارسلوها للمختبر ...
وحللوها هناك ..
ويوم طلعت النتيجه

جابو صور انواع واشكال من الجراثيم والفايروسات !!
وقالو ان بعضها قد تسبب امراض خطيرة ...!

وسلامتك يالغالي

الطاير

hellboy · 31-07-2007, 10:25 AM

اشتريت من نجيري (اصله افريقية) طولها مترين تقريبا..
شرسة جدا تاكل قطط صغار المهم روضتها,
يوم من الايام احد اصحابي ملقوف وقالي تكفى حطها بشنطة السيارة بخوف فيها الشباب..بعد الحنه وافقت جاني اخر الليل وقالي الاصلة خشت بين الشنطة والسيت الخلفي طبعن سيارتة سبورت..
المهم مسكت الكبس وهو طالع فيها (استيف) وخش يده وعضتة ويسحب يدة بسرعة ويكسر خشمي..
النتيجة هو ثلاث غرز بيده خيطوها له المستشفي وانا كسر في الخشم..

تفاحه حمرا · 31-07-2007, 12:41 PM

االطاير ..
شواسوي انا من دخلت هالمنتدى وانا مهوسة بالحيوانات لوول..
وتبي الصج ..كل الحيوانات تجيب الامراض والبكتريا لانه جسمهم مايكون نظيف..
ومشكور لانك عطيتني معلومات واشياء كنت غافلة عنها مثل الامراض وغيره ..

هاوي ثعابين
شكله العض في عالم الافاعي شي عادي ...ولله شي يخوف لوول
الغريب انه الي عضتك من نوع الاصلة والي اعرفه انه هالنوع متوالف ..
وانتبه مرة ثانية على نفسك...وان شاء ماتتكرر

madrule2002
حتى لو سامة .. العضه تسبب مشاكل لوول..

limited
اخوي انزين ماقلت لنا شلون تصرفت لمى الفت عليك؟؟انا هذا اكثر شي مخوفني انها تلتف..
لانه العض من الحيوانات خلاص تعودت عليه لوول ,.,وبنسبة لنصيحتك ان شاء الله قاعدة افكر فيهاا..

العابر
اخوي الطاير اعتقد كان يقصد انه البكتريا تعيش فالاماكن الي تعيشها الافاعي ..يعني التهيئة الي تحتاجه الافاعي يكون جو مهيئ للالبكتريا :d

hellboy
لوووووول صج من حفر حفرة لأخية وقع فيها.. وحمدللة ع سلامتك... وثاني مرة انتبهوا على اعماركم ..وان شاء الله ماتنعاد

sweets · 31-07-2007, 01:01 PM

السلام عليكم
الصراح انا صارلي موقف ان الأصله لفت جسمة على المبة وفجرت لي المبة حق الحوض
وهذي صورتة مع ولدي

http://www2.0zz0.com/2007/07/31/10/26878628.jpg