كيف يكون يومك مع طيرك ( اتمنى من جميع الاعضاء الدخول )

[(المتألق)]

السلام عليكم ورحمة الله وبركاته...امابعد

اخباركم يا اعضاء هذا المنتدى الرائع


:: بالبداية ::

اتمنى انه يكون الموضوع غيرر مكرر

ويكون الموضوع يحوز على رضاكم



هناك الكثير من الاخوان اللي يشتري ببغاء ( كاسكو - امازون - كوكاتو - مكاو - الخ...)

ويكون مبتدئ ما يعرف كيف يربيه او يعتني فيه او ينوعله بالاكل .....


وهذا الموضوع يهدف الى تعليم المبتدى

يعني اللي ابغاه

كيف يكون جدولك مع طيرك

يعني متى تبدا تدربه

الصباح - الظهر - العصر

وباقي اليوم وش تسوي معه

وش الاوقات اللي تجلس معه كثير

وش الالعاب اللي تلعبه

الاكل وش المفيد وش الضار

والتنويع في الاكل

اذا كان هناك اسئلة نسيتها اتمنى تذكروني فيها

[ndman]

انا اللي عندي الدرهـ لبى كلها ..طبعا غرفة طيوري الكناري البادجي الخ..

الساعه 8 الصباح افتح النور عليهم اغير الاكل الماء .. اعطيهم جرجير فواكه

واخليهم يصفرون وكذا اجي عند الدرهـ مثلا اليوم ابي القنها اجلس معاها ربع ساعه ونا

اقولها كلمة خلصت منهم الساعه اربع او خمسة العصر اطلع طيوري كلها في الحوش

اروش طيوري مع الببغاء واخليهم في الشمس الاآذان المغرب آذن المغرب

على طول<< كلهم على الفراش <ض1 وهاكذا

ومن ناحية الاكل الببغاء حقي .. أشكل في اكله مثلا اليوم تفاح بكرا موز بعده خضروات الخ..

ونا طيري اتجنب الشوكلاته والبطاطس والحاجات هاذي يقولون انه سامه

والله يعطيك العافيه .. وموضوع حلو

[(المتألق)]

مشكور اخوي

على ردك وجودلك رائع للطيوركـ

بس ما كأنك تنومهم بدري

مشكور على مرورك

[ام ماجد]

انا اصحى الصبح على السبعه الى الثمانيه على حسب
اشيل عنه الغطى واطلعه بغرفه بغرفة اللعب يفرفش ويطير لي واكون وانا اجهز الاكل وانظف اخليه على كتفي علشان يحس انه تمشي ^^
ساعه الى ساعه ونص

بعدها انزله المجلس يكون بزاويه بيننا اجيه كل ساعتين اعطيه امسح راسه والا ارفعه على يدي

قبل المغرب بساعه ارجعه لغرفة اللعب نفس الشي العبه واتمشى فيه واخليه يطير لي ويمشي على الارض
اذا الجو حلو اطلعه برا بالسطح نص ساعه

بعدها انومه



من ناحية التدريب من كثر مااكلمه بروحنا اخذ كلمات مني




الاكل على المشكل البلجيكي بس هو ينقي الشمسي ويخلي الباقي
طبعا اخليه عنده لين يآكله حتى لو 3 ساعات جوعان شسوي


والعصر احط له نوعين : يوم جزر وخس ويوم تفاح وبرتقال ويوم طماطم وخيار ويم عدس وبطاطس ويوم بازيلا

وعلى كذا مادري صح طريقتي والا لا

وشكرا اخوي على الموضوع الحلو ^^

[نووووووون]

انا مااهتم بطيري مره صراحه

اول شيء اطلعه 9 او 10 ع حسب

وحطه بالصاله وافتح له واحط الاكل ولازم اذا كنت افطر اعطيه خبز ويبداء سواليف الله اكبر.. يااادينو كوكي..السلام عليكم ..والخ ....

ويكون جالس بالصاله طول الوقت اذا جاء الغداء نزل يتغداء وبعض المرات يأخذ عظمم ويركض فيه لقفصه

وطول الوقت يجي فوق القفص عاد هو اذا احد مر من عنده يأكل يصفر الا نعطيه

بعض المرات اجي امسح ع راسه

واذا جاء العشاء ينزل يتعشاء عاااااااااااد النوم سالفته سالفه ماينام الا بشيء عصاء او... حتى يدخل واسكر القفص الساعه 11 ينام ويزعل يبي يجلس بعد>>الله يصلحه

قبل اطلعه بالحوش بس اللحين يطير هو واخليه طول الوقت داخل بس افتح له >>مرات افكر ابيعه بس احس اني بفقده لاني مليت

[(المتألق)]

ماشاء الله اختي ام ماجد

جدولك رائع

مشكورة على المرور

ـــــــــــــــــــــــــــــــــــــــــــــــ

مشكور اخوي نون على طرح جدولك

واعجبني ببغائك ينزل يتغداء معكم

الله يحفظه لك

ومشكور على مروركــ

ــــــــــــــــــــــــ

[زاهي الكحل]

أنا طول الوقت معاه الا اذاكان عندي مشاوير زيارات

قفصه بالصاله بيننا امام التلفزيون علشان لما اكون نائمه او مافي احد اشغل له قنوات الاطفال يتفرج

طول الوقت اناديه وااكلمه وااكله يعني ملازمته وانا مااغير مكانه ابد يعنيي وقت النوم ماادري طريقتي صح ولا افضل ادخله غرفه لوحده

بالليل الساعه 1 اطفي الأنوار عليه ينام والصباح لما أصحي العيال للمدرسه اكلمه قليل بس بعدين ارجع اطفي

النور واسيبه يكمل نومه حتى تصحى الشغالة على الساعه عشره تفتح عليه الأنوار وتشغل التلفزيون حتا اصحا واكمل معاه الجلسه

اذا طلعت الاستراحة أخذه معاي او رحت عند اهلي سهرهطويله ومافي احد بالبيت أخذه معاي يغير جو لان بيتي مافيه صغار احس الببغاء بحبويتعلم من الاطفال

*

[(المتألق)]

جدولك اخوي حلو

لكن الافضل اذا عندك غرفة ثانيه فاضية

تنومه فيها ( لانها تعتبتر عن الببغاء تغير جو )

وثاني شيء تنومه متأخر انت

انا انومه بالكثير 9

ومشكور على مرورك العطر

[ابو محمــد]

متابع الموضوع من اول يوم لكن لم تسمح لي الفرصة بالمشاركة

اخوي المتألق دائماً متألق في مواضيعك وفي طرحك جزاك الله خير

بالنسبة لوضع الافريقي عندي وضع خاص حاليا مع دخول الصيف في درج البيت

ومكيف متنقل شغال ٢٤ ساعة على حرارة ٢٧ ثابتة والشمس تدخل عليه من خلال النافذه

طبعاً الاكل يومياً مع الماء يتغير وبالنسبة للترويش مره في الاسبوع والتلقين وقفت حالياً

بسبب الانشغال لكن ماشاء الله علية ما يحتاج تلقين يردد كل كلمة يسمعها ويقلد بكاء الاطفال

اتمنى اني ما طولت عليكم بالتوفيق

[(المتألق)]

المشاركة الأصلية كتبت بواسطة ابو محمــد

متابع الموضوع من اول يوم لكن لم تسمح لي الفرصة بالمشاركة

اخوي المتألق دائماً متألق في مواضيعك وفي طرحك جزاك الله خير

بالنسبة لوضع الافريقي عندي وضع خاص حاليا مع دخول الصيف في درج البيت

ومكيف متنقل شغال ٢٤ ساعة على حرارة ٢٧ ثابتة والشمس تدخل عليه من خلال النافذه

طبعاً الاكل يومياً مع الماء يتغير وبالنسبة للترويش مره في الاسبوع والتلقين وقفت حالياً

بسبب الانشغال لكن ماشاء الله علية ما يحتاج تلقين يردد كل كلمة يسمعها ويقلد بكاء الاطفال

اتمنى اني ما طولت عليكم بالتوفيق

يشرفني دخولك في موضوعي

والرد عليه

الله يجزاك خير

وان شاء الله تصير من المميزين دوما

مشكور على مرورك يالغالي

اخوك المتألق - محمد