كاسكو يريد حل

[parrot lover]

أنا عندي كاسكو ممتاز من ناحية الصفات العامه مثل الجسم والشكل ولكن الطير صارله عندي حوالي الثلاثة شهور أذا مو أكثر وهو يجعر على الغريب , وانا الشخص الوحيد الي يتعامل معي بحذر , حاله كما حل الجندي والضابط , الطير وانا بعيد عنه يصفر ويلعب واحلى ما يكون ولما أجي ( سمع هوس) على قولة أخوانه المصريين , ولما أحطه على الاستان بره القفص يروح يمين وشمل يخاف مني خوف الحمر وبعدين يوقف على ايدي بس مستحيل يطالعني و الود وده يطير وروح مثل الطفل لما وده يلعب وانت ماسكه عن الاعب بس تحده يطييييييييييييييييييييييير هوهز شنو الحل معاه أرجو الافاده:-

نقاط مختصره عن الموضوع:-
1- طير نشيط
2- عمره صغير حوالي سنه
3- يصفر بس مايتكلم وصارلة عندي حوالي ثلاث شهور
4- انا الوحيد الي مايجعر بوجهي ويخاف مني خوف الحمر
شنو الحل لكسر حاجز الخوف , على فكرة الطير محطوط في منطقة في البيت نوعن ما فيها حركه



وشكراً

[الجااارح]

المشاركة الأصلية كتبت بواسطة parrot lover

حاله كما حال الجندي والضابط


شنو الحل معاه أرجو الافاده:-


1- طير نشيط
2- عمره صغير حوالي سنه
3- يصفر بس مايتكلم وصارلة عندي حوالي ثلاث شهور
4- انا الوحيد الي مايجعر بوجهي ويخاف مني خوف الحمر
شنو الحل لكسر حاجز الخوف , على فكرة الطير محطوط في منطقة في البيت نوعن ما فيها حركه

أخوي الكريم / parrot lover

أحب أرحب فيك وأهنيك بدخول عالم تو زوو الله يحيك يا صاحبنا الجديد الغالي بها المنتدى الغالي اللي رايح تستفيد منه الكثير بإذن الله تعالى بس استمر ولا تقطع وراح تشوف الفواااائد اللي رايح تستفيدها مع الوقت ...

ههههههههههههههههههههههه


الله يهديك موتني من الضحك بالمثل حقك .......


تشبيه بليغ بصراحة


عموماً خذ العلم :

1- الحمد لله شيء راااائع وما شاء الله تبارك الله ...

2- وهذ شيء طيب يكون عمره حول السنة وأقل يعني من 6 شهور إلى سنة عمر مناسب حلو ...

3- شيء طبيعي وعادي وهذ النقطة جيدة جداً كون أنه يصفر لأنها أولى خطوات البداية ...

4- هذ بداية تكوين العلاقة بينك وبين الطير حقك إنشاء الله ولو لاحظت معي شوي كان لاحظت إن الطير حقك أختارك إنت من بين الباقين لتكون صديقه المفضل لإننا كلنا نعلم أن الزعيق هو احدى علامات العداوة وعلى قولك ما يزعق عليك ......

ولكن

وبما إنه معاك حول الثلاثة شهور الأفضل إنك تحطه في مكان مرتفع بوسط البيت علشان يراقب التحركات اللي حوله ويتعود عليها والشيء الثاني ما يحس بالملل ...

كسر حاجز الخوف هذا يجي مع الوقت ولا تيأس اصبر " إن الله مع الصابرين " والصبر زي ما انت عارف مفتاح الفرج وهو النقطة الأساسية اللي لا بد أن يتحلى بها المربي الصبر ثم الصبر ثم الصبر ....ألخ

معلومة بسيطة :

الطير حقي كان مواصفاته قريبة من اللي عندك أضف إلى ذلك مجرد مايشوفني يصارخ صراخ ربك العالم به

مع الوقت والتدريب البيسط

صار خويي ههههههههه ... ويطلع على يدي وكتفي ما شاء الله عليه وأزيدك من الشعر بيت صار يتكلم ويقول ( ألو ، والسلام عليكم )

وإذا كنت تبغى تعرف تاريخ شراء الطير هو بتاريخ :
29/12/1427هــ وإذا جيت اسوي مقارنة بين هذ التاريخ وتاريخ اليوم 14/4/1428هـ تحصل فرق كبير كبير بين الماضي والحاضر


أنــــــــــا أتأسف تماما على الإطالة أخوي الكريم parrot lover

ملاحظة /

إذا طفشك الطير حقك دخله التوقيف على أن لا يقل عن 48 ساعة عشان يتربى ههههههههههه
امزح معاك لا تصدق

لا تستعجل على بلوغ طيرك مرحلة الإنجاز الأعظم في خلال شهرين أو ثلاث أو حتى سنة بعد يحتاج له صبر وأنا أخوك ...
أرجوا من الله إني أفدتك يالغالي


عموماً :

إنشاء الله تعالى إنه رايح يمر عليك المشرف الأستاذ والحبيب الغالي
كاسكو البحرين
اللي ما تعدي عليه مواضيع زي هذا إلا وحط لمسه من لمساته السحرية فيها وراح يفيدك إنشاء الله تعالى أكثر مني لإنه متخصص في مثل هذ المواضيع


والسلام عليكم ورحمة الله وبركاته ،،،،

[الكسيكوالدره]

هلا وغلا
اخوي الجارح ماقصر معاك
وانا اشوف مشكلتك بس في الصبر ترى الطير يبيله واحد نفسه طويل وطول بالك عليه وم بتشوف الا كل خير منه الكاسكو ذكي ويحس بشعورك تجاهه فانت عامله باحساسك وانك تتودد له وخاصة في البداية كم شهر انك تشيل الاكل عنه ساعات معينة وما تأكله الا من يديك مثلا قطعة من التفاح او اي فاكهه او الفول السوداني ولما تقرب منه قرب بهدوء حسسه بالامان اهم شئ
واخواني الخبراء ما بيقصرون معاك
بالتوفيق

[كاسكو البحرين]

parrot lover يا هلا بيك يالغالي
والأخ الجاارح ماقصر كفى و وفا والحمد لله
وانا لا اريد أضيف اي كلمة على كلام الأخ المخضرم ( الجاارح )
فقط أتبع ما قاله وان شاء الله يكون طيرك بأفضل صورة
رد الأخ الجاارح رد في محل ثقة

تحيتي للجميع

[parrot lover]

أشكرك كثير الشكر على الايجاز والايفاده .... والله يحيكم على الترحيب و شرف لي التعرف عليكم , وأن شاء الله أفيدكم و تفيدوني من خلال هذا المنتدي الناجح و المميز وجزيل الشكر لكم مره ثانيه و على الاخوان القائمين عليه...و الله ولي التوفيق