تحضير السلاحف للسبات الشتوي..

[عروس الجليل]

أح ح ح ح..
أحوووووو..

الطقس بارد ودرجة الحرارة عم تنخفض, أكيد لاحظتو الخمول والكسل وقلة الاكل اللي عم بيصيرو مع سلاحفكو ان كانت برية او مائية..

كلنا منعرف انو السلاحف من ذوات الدم البارد, يعني درجة حرارة جسمهن متعلئة بدرجة حرارة البيئة المتواجدين فيها, يعني ادا كانت درجة الحرارة عالية متل بالصيف دمهن بيحمى وبتزيد فعاليتهن وبتكتر حركتهن, بس ادا انخفضت درجة الحرارة بتنخفض كمان درجة حرارة جسمهن وبتساو مع بعضهن وبتصير مشكلة لانو درجة حرارة جسم منخفضة بتقلل من فعاليتهن وبتأثر عالقلب وعملية التنفس وعملية الهضم.. ومنلائيهن يتخبو تحت الصخور وبالجحور وبين القش والاوراق وحتى بيحفرو ليتخبو تحت الارض عنشان يعدلو حرارة جسمهن ليمتص حرارة الارض والصخور اللي درجة حرارتهن اعلى من درجة حرارة السطح, وبيضلو متخبيين ونايمين وما يتحركو وبيفوتو لمرحلة السبات الشتوي حتى أول الربيع وهايا ردة فعل الجسم الطبيعية بعد متنخفض الحرارة..

بالطبيعة ما في مفر وكل السلاحف بتفوت لمرحلة السبات الشتوي لانها مرحلة من مراحل تطور حياتهن, بس بالمربى ممكن السلاحف ما تفوت السبات لانو احنا بنوخد كل الاحتياطات وبنتحكم بدرجة الحرارة بالتدفئة واللامبات المخصصه.. ومع هادا انا كل فصل شتا بحضر سلاحفي ليفوتو بالسبات الشتوي ( ما بفوت السلحفاة للسبات ادا كانت أقل من سنة وما بحب تفوت هالتجربه) لانو برايي هايا مرحلة مهمه بدورة حياتهن ليطورو حالهن ان كانو مش بالغين وليحضرو حالهن للتزاوج ادا كانو بالغين لانو بعد ميصحو فترة التزاوج.. بس في كتيير مراحل عملتها..


الشروط لتفوت السلاحف بالسبات الشتوي;
- تحدد الموعد اللي بدك تفوت سلاحفك فيو للسبات يعني باخر شهر نوفمبر - ديسيمبر ( 22/12 بيبدا فصل الشتا).
- شهرين ئبل الموعد بتزيد من وجبات أكل السلاحف ( بالجمعة شي اربع خسات ), عنشان يخزنو بجسمهن للفترة اللي رح يناموها.
- ئبل الموعد باسبوعين ما بعطيهن الاكل عنشان يتخلصو من الفضلات اللي بجسمهن, لانو ادا ما اخرجو الفضلات بتضلها بجسمهن وهادا بيأثر عليهن وهني بالسبات لانو جهازهن الهضمي ما بيكون يشتغل!!
- توقيف التدفئة, وتقليل ساعات الاضاءة ( بالشتا النهار قصير والليل طويل يعني عتمة أكتر ونوم أكتر).
- نقل السلاحف لمربى او علبة او صندوق بلاستيك او خشب ( بالقاع 15 سم تراب ليدفنو حالهن)
- ما ترتفع درجة الحرارة عن 25ْ, لانو سيعتها رح يكون اكترو نوم ومش سبات بمعناه وبيصحو ليوكلو ويخرجو, يعني شغلو مكيف ادا ارتفعت الحرارة ( ما تعملوها بالشتا عم بمزح) الافضل انو تحطو المربى بغرفة ما بيدخلها شخص لانها بتضلها باردة متل انا بحطهن بمخزن خارجي ( اقل من 18ْ درجة رح نشوف انهن ما عاد تحركو وفاتو لسبات).


اللي عندي متلو بس بلاستيك, والغطى نصو مشبك ونصو مسكر.



مدة فترة السبات;
شهرين - 3 شهور, وممكن تقللها او تزيدها حسب درجة الحرارة, بس ادا كانت شهر كمان مش عاطل عالاقل بتخفف عنهن اشهر الشتا والبرد لانو بعدها بيجي الربيع وبيجي التزاوج .

ملاحظات مهمه كتييييييييييييييييييييييييييييير

- ما تحاول انك تضايق السلاحف وتصحيهن من نومهن وقت السبات.
- كل اسبوع تتفقد المربى والسلاحف وما تنسى انو عندك سلاحف.
- انتبه منيح انو التراب تحت السلاحف يضلو ناشف وافحص السلاحف ادا عليهن قراد او نمل ..

لمن يصحو السلاحف- بعد السبات;
لمن تشوف درجة الحرارة ارتفعت مع بداية فصل الربيع بترجع السلاحف للمربى اللي كانو فيو قبل السبات, وبعد بيومين بيكونو صحيو منيح بتحطلهن أكل, رح يكونو كتييييييير جوعانين عنشان هيكا بتعطيهن كمية قليلة من الاكل عنشان ما تضغط عجهازو الهضمي اللي بعدو مش متعود, وبعدين بتعطيهن الاكل عادي (وجبات كبيره للذكر والانثى ادا كانو بالغين عنشان التزاوج)..

י
י
י
י
י
وسبات موفق..
عروس الجليل