مساكن الحمام...............

[قطرررررررررررري]

بسم الله الرحمن الرحيم


السلام عليكم ورحمة الله وبركاته


موضوعي هذي المره بتكلم فيه عن لقفاصه اللي يحتاجها اي شخص حاب انه يبتدي في تربية

الحمام بشكل منظم بعيد عن المشاكل وعن العثرات اللي تصادف اي هاوي في بداياته

النوع الاول : المحاكر (( الخانات ))

التربيه فالمحاكر من أفضل الطرق في عالم الحمام لان هذي الطريقه مميزاتها وايجابياتها اكثر من

عيوبها وسلبياتها

من مميزات المحاكر (( الخانات )) التحكم في مستوى الطير والتحكم فاللون ومنع الاختلاط

بين فصيلتين مختلفتين

وبعد من مميزاته يحد من انتشار الامراض بين الحمام وحتى وقت المرض سهل العلاج

والسيطره تكون سريعه

لكن من عيوبه يحتاج المحكر فالعاده للنظافه اليوميه وبالتالي يحتاج لوقت كبير للاعتناء اليومي

وبعد كل ماكثر الحمام كل ماتحتاج الي محاكر زياده بالتالي التكلفه تزيد

محاكر جديده + معالف جديده + مشربيات جديده وهذي يمكن تسبب تكلفه عند بعض الناس

وحتى الاكل بعد يحتاج لكميه اكبر................وبعد كل ماكثرة المحاكر راح تحتاج لمساحه اكبر

لكن كلمة الحق تنقال مهما كانت عيوب المحاكر فهي الطريقه الافضل وكفايه انها تحد من الامراض







النوع الثاني : لقفاصه الكبيره (( الجمعي ))

من فوايد لقفاصه الجمعيه ان مهما كبر العدد عندك تقدر تخلي جزء من الحمام اللي مو متوالف

او لفروخ الجديده الل توها جاهزه ولا تركبت او اي جوز سابق ومات شريكه تخليه فالجمعي

لحد ماتحصل شي مناسب وتركبه عليه

وبعد من ميزاته ان التنظيف فيه اسهل مجرد ماتخلي الارضيه كلها رمل بحر

مراح يحتاج الا تنظيف مرتين او ثلاث فالاسبوع

وبعد استخدام الادويه الوقائيه اسهل لان الجمعي بيكون فيه مشرب كبير تخلي فيه الادويه وخلاص

وبعد الاستحمام فالجمعي اسهل ماعليك الا تخلي الماي لهم وهم راح يقومون بالمهمه


لكن من عيوبه في حالة (( الاهمال )) الاختلاط بين الفصايل وانتشار المرض مثل لمح البصر

لكن لو كان الانسان مهتم مراح يعاني من اي متاعب وانا اتكلم عن تجربه شخصيه







النوع الثالث : معزل لفروخ

المعزل اهم شي يكون قفص تعزل فيه لفروخ بعد فترة الحضان وانا عن نفسي دوم اعزل الفرخ

بعد مايكمل شهر تحت الجوز واخليه فالحضان لحد مايختفي منه صوت الصفير

لان الزغاليل دوم تطلع صوت خفيف وبعدها احولهم للجمعي

والمعزل حجمه يختلف من مربي لمربي

انا عن نفسي استخدم قفص قياسه تقريبا 1.50م * 1م

ومناسب لعدد لفروخ اللي تنتج عندي لان الاجواز ماتنتج كلها في نفس الفتره

وبعض الاحيان نوادر ماحتاج لقفص ثاني

فكل شخص عليه يوفر معزل للفروخ بالحجم اللي يناسب الكم اللي عنده








النوع الرابع : معزل المرضى (( مشفى ))

طبعا اي مربي لازم يصادفه مرض معين فالحمام فيحتاج لمعزل

وانا عن نفسي استخدم محكر 3 خانات للعزل لو في اي حاله احتجت يكون موجود المعزل








النوع الخامس : قفص التوليف (( تركيب الاجواز ))

والقفص هذا عباره عن خانتين متجاورتين والحاجز اللي بينهم شبك علشان الذكر والنثيه يشوفون

بعض وهذي الطريقه تسرع من التوليف

وبعد تسهل على المربي لو كان عنده نثيه متوالفه مع ذكر والذكر الثاني متوالف وحاب يركبهم

على بعض هذي افضل طريقه

تحياتي