السلام عليكم... عضوه يديده واستفسارات عديده :)

[قطو_Q8te]

انتي قلتي قاعده تعافر واهم يقصون لها .. هذا اكبر غلط
لو صار جذي جان خدروها ...

ابيج توصفينلي حالتها بلضبط
لوتقدرين تحطين فيديو بعد والله يكون احسنـ !!
وحاضرين اختي ماسوينا شيـ .

[kuwaitia]

اي والله اخوي قعدت تعافر وتموء (( يعني تقول ميو .. يعني طالعه فيها)) بصوت يعو رالقلب والله ان عيني دمعت وانا معاها... والمصيبه جنها تقول ساعديني وانا ما اقدر اسوي شي

ومن ردت وهي يا حياتي حايشها اكتئاب وبس ترجف وتكح.. توني مشربتها ماي وغصت بكحتها ... وانتبهت اليوم ان بعينها دموع... حسبي الله عليهم من بيطري

وان شاء الله بصورها فيديو او صور عاديه بعدين لانها نايمه حاليا...

ومشكور اخوي صج صج ما تقصر مااقدر اعبر عن شكري

[dr_mido]

الله يعينج بان انك متوهقة مع هل القطوة لاكن انشاء الله تتحسن

[قطو_Q8te]

يفضل فيديو وبالحاله الي فيها ...
الحين بس حاولي اتلمسين عليها ..
اهي يديده وخايفه .. مسئلة اسبوع وتتعود عليكم
حاولي ناديها بصوت مو عالي وبأسمها

[kuwaitia]

السلام عليكم
صارلي جم يوم احاول اصورها ومو قادره.. يا تنحاش يا ترجع قري وتندعس تحت الصوفا... ومن امد ايدي تحت الصوفا بتشمخ او بتعض

حتى الاكل ما قمت انا اللي احطه اخلي الخدامه لاني اذا حطيت تنحاش .. وبروحها مسيكينه كلش ما تاكل طول اليوم لقمه ولا لقميتن... بس لاحظت شوي الحكه خفت مو مثل اول

اخوي صج تعبتك معاي مشكوور على مساعدتك وايد

د.ميدو.. مشكوور اخوي على الدعوه وان شاء الله تتحسن.. لانها صج كاسره خاطري وعليه

[Lonely Hunter]

قطو ما شاء الله عليه ماقصر معاج

كفى ووفى

حلوه هذه سالفة البوي فرند P:

شوفي... القطاوه اللي بسوق الحمام يعطونهم بس دراي فود و بكميه قلييله فتشوفينهم دايما ضعاف.

على شان جذي مالتج ماتاكل الا الدراي

فمالج الا تروحين حق الصيدليات و تشترين مشهي اكل تحطينه مع اكلها

ان شاء الله جم يوم و ترد لها شهيتها , حاولي اتجربين معاها بعض انواع اللحم المطبوخ:لحم ,دياي , ربيان

بالنسبه للخوف هذا شي طبيعي : قطوه كبيره و شاريتها من سوق الحمام, طالعي عاد صاحبها السابق شمسوي فيها.

لا تيئسين معاها ....كلها اسبوع اسبوعين او شهر و ان شاء الله على اتعود عليج .

اهم شي: لاتشيلينها, و انتي كله حطيلها الاكل.

و بالوقت اللي تكون كسلانه و ماتحرك .. لمسي على راسي و جسمها , لاتحاولين و هي نشيطه و لا بتبخ بويهج و تحاول اتعضج .

اذا شفتيها تماوي بصوره غريبه و بصوت مزززعج لايام , معاناها تبي "بوي فرند" (;;^^)

بس اذا انتي ماتبينها تحمل و تييبلج كيتي خليها بحالها و استحملي الازعاج...الطرق الثانيه كلها فاشله الا نزع الرحم مره وحده.

اما اذا تبين يصير عندج كيتي تقدرين انج تشوفين اي واحد من اهلكم عنده ذكر و اخذيه و خليه جم يوم عندج يلاحق القطوه , و اذا ماحصلتي تقدرين اتروحين محل اسمه بت هاوس صاير على شارع سنتر بوينت اللي بالري ,نفس الشارع الداخلي , اذا انتي يايه من الغزالي و دشتي على لفة سنتر بوينت , روحي يسار و كملي شوي و بتشوفينه على يمينج.

بس غالي تأجير الذكر عندهم (30 دينار) بس الانواع اللي عندهم كلها اصليه و طيبه و حلوه
فما تاتحين على انتاج قطوتج.

تقدرين اتاجرين من سوق الحمام بعد بس مانصح ابد , صج ان بيكون ارخص بس ماتدرين شنو الامراض اللي بالذكر اللي بتييبينه

على فكره .. اذا قطوتج احملت بتشوفينها من الشهر الاول بتصير حنونه و حبوبه
الهرمونات تصير شغاله P:

[Lonely Hunter]

نسيت اقول شغله عن التسبيح

تقدرين اتسبحينها بعد بالحنفيه او البانيو و دير بالج يدش ماي بأذونها .. مو زين لها

لمه تسبحينها غسلي راسها بايدج

و بعد ماتخلص لفيها بفوطه و نشفيها .. يبي فوطه ثانيه و نشفيها اكثر

بعدين اخذيها و حطيها بغرفه مافيها تكييف و صكي الباب عليها

تعالي بعد ساعتين 3 ساعات و بتشوفينها تلق من النظافه و شعرها ناشف

اخذيها و حطي عليها بودر جونسن مال اليهال على شان تكتمل النظافه و تصير ريحتها حلوه (من فوايد البودر ان يطرد الحشرات اللي معششه بشعرها)

الاستشوار اذيه ... لازم قطوه ماتنخاف و ثابته بمكانها ولا ماينفع ابد

[kuwaitia]

اخوي لونلي هنتر ... تشكراااات جزيلا

اهي ما تطلع اصوات يا نايمه يا منخشه

و شكرا على نصيحه الاكل والمحل... اذا بدت تسوي حركات باجرلها قطو ... قطاوه اخر زمن...هههه

واذا على الاكل والله قاعده اطبخ لها سوالف مسويه روحي الشيف اسامه السيد هههه

الله يعين وتاكل وتبطل خوف من تشوفني جنها شايفه عدو


شكرا مره ثانيه على الرد الكافي والوافي

[-= pink =-]

اهلا كويتيه

ويه يحليلها قطوتج ..

تشبه قطوتي بس انا قطوتي عمرها شهرين ونص

شوفي في اكل انا كله اوكله حق قطوتي اسمه على ما اعتقد ( بيني ) موجود بالجمعيه عل دياي ;p

فانتي جربي معاها هذا الاكل

[kuwaitia]

هلا بنك مشكوره على النصيحه
وبجربه لها اذا لقيته