رفض الاهل في تربية القطط بالمنزل << الاسباب و الحلول ..مجربة و مضمونه

[milk cat]

السلام عليكم و رحمة الله و بركاته ..

بعد تفكير و حوسه اللموضوع اللي بحطه قررت احط موضوع لحلول رفض تربية الاهالي للقطط (الاسباب, الحلول)


الاسباب: باللون الاحمر

الحلول: باللون الازرق

بسم الله نبدأ:

1-الحيوانات الثانيه الصغيره في المنزل: قد يكون بسبب طيور او هامستر او ارانب في المنزل فخافوا ان تاكلهم القطط فياثموا .. اذا كان عندكم حيوانات صغيره ممكن تاكلها البسه يا بيعوها يا خلوها بمكان ما تقدر توصل له القطه يا بغرفه مسكر عليها البابـ و ممنوع تدخل للغرفه حتى لو تجربون اذا راح تهجم او لا لان بعض الناس يجربون و تنطلق البسة قبل ما يقدر يمسكها و خلاص راح الحيوان الصغير فانتبهوووا

2- الناحية الصحيه:الامراض اللي يتكلمون عنها الناس و اللي يقول البسة تجيب العقم و اللي يقول مدري وشو .. هذا كله كلام غلط .. البسة لا تصيب بالعقم الا اذا تم لمس فضلاتها -اعزكم الله- فكل ما عليكم ان تثبتوا صحة كلامي عشان تورون اهلكم الموضوع و ان هذا كلام خاطئ اللي يربي بسة يكون عقيم !! .. ثانيا.. وجوب تعقيم القطة في مواعيدهاا المحدده و الاهتمام بهاا يعني مو تخلونها بالحوش تروح مع بسس الشوارع و ترجع لكم مريضه .. طبعا اللي يبي يطلعها للحوش هذا مو ممنوع بس لازم تجلس معهاا عشان ما يقربون بسس الشوارع منها او ما تطلع من البيت و تروح مع البسس الثانيه

3- القذارة: بعض الناس يعتقدون ان القطة تقضي حاجتها -الله يكرمكم- بأي مكان و هذا غللللط فالبسة الي اصغر من شهرين او التي فصلت من امها و هي صغيره و لم يعلموها اصحابها هي التي تقضي حاجتها بأي مكاان لان امها هي اللي تعلم القطط الصغيره سبحان الله .. و سبحان الله القطط انظف الحيوانات حيث تقضي معظم عمرها في تنظيف نفسها .. و عند قضاء حاجتها -الله يعزكم- تدفنه بالرمل

4- كثرة مصاريفها: و هذا بعد غلط فالبسة تقدر تصرف عليها من 0- 10000 !! .. يعني الي بيشتري بيكي فيس مثلا و ياكله معلبات و يشتري له كل اسبوع العاب ..الخ بيتكلف كثير اما اللي بيتبنى بسة و ياكلها اكل بيت و صحن من عنده و العاب من عنده زي خيوط و كور و عرايس و ليزر ..الخ فما راح يتكلف عليها ولا ريال صحيح هو لازم تتكلف عليها عالاقل 500 بالسنه للتطعيم و اذا مرضت لا قدر الله و اذا سافرت تخليها عند احد مثلا و تشتري دراي فود 4 كيلو بـ 75 ريال \\\ و الشامبو ممكن تستخدمون لا دموع بعد اليوم البلسم (الاصفر) هذا كويس للبسس و يصلح للانسان بـ 30 ريال

5- الحساسيه: و هذي لازم توعد امك انك اول ما تبدا تعاطس و كذا تتركهاا << ما اقصد ترميها .. اقصد تخليها و ترجع لها بكرا مثلا ... و انك ما تخليها تنام بالغرفه معك و تقولها انك اذا نامت معك خلاص ودوها .. عشان يقتنعون

6- تخريب الاثاث: طبيعة البسس انها تحب تقلم اظافرها بالاثاث و هذا يخرب شكل الاثاث فاذا اهلك معيين عشان كذا قولهم انك راح تقص اظافرها كل ما طولوا يعني ما راح يخربون الاثاث و لا ياذون احد

7- الولاده-الرش: اذا عندك انثى و اهلك يقولون ودها لانها حامل مثلا او لا تجيب بسة عشان ما تولد عندنا فيه 3 حلول:

1- انك تبيع اولادها كلهم و الفلوس تروح لاهلك و تولد بغرفتك و انت تهتم فيهم الى ما يكبرون ..

2- توديها يا عند فندقه و بعدين تبيع البسس او عند صديق يحب البسس و يعرف يربيهم شرط تكون متعوده عليه او عالاقل خلها تحبه و تتعود عليه اول ما تتزاوج

3- عملية التعقيم و هذي ما انصح فيها ابد ابد ابد اولا غالية ثانيا تحرم القطة من الامومه

اما بالنسبة للذكر .. فاول ما يطلب التزاوج يا توديه محل يا بالمنتدى و انتبه توديها للشارع يتزاوج


و طبعاا ما ننسى اكبر حل و هو الدعاء و طاعة الوالدين و برهم خااصة برمضان .. او اذا ما كان رمضان ادع بالسفر او اثناء نزول المطر او يوم الجمعه او و انت ساجد لربك و طبعا مو تدعي اسبوع باستمرار بعدين توقف و تقول مليت لانه easy come easy go اللي يجي بسرعه يروح بسرعه فانت لازم تتعب عليها