الكتين اعمى

[sdim]

انا باحاول القى له احد يتبناه سميته (مخطط) لأنه مخطط لونه مررره حلو
لكن اكيد ما ح ارميه حبيبي حرام ، يموت لو رميته ، بس باحاول القى احد متفرغ للقطط يرعاه ويهتم به .
المشكلة مش عشان نوسا وبس ، لكن بالبيت صعب جدا احط قطين ، لو ممكن كنت من زمان جبت قط ذكر عشان نوسا ما تجنني لما تطلب ،لكن ما اقدر ..

وكمان لما اسافر اي مكان ما اقدر اخده معايا
انا وقت السفر لو يومين لمكة او المدينة اتحايل على صاحباتي عشان يخلوا نوسا عندهم واقول لهم هي هادية وما تحتاج اي شي بس تكون بالبيت عندكم ..وهيك

فتخيلي لما اقول لهم خلوا نوسا و ومخطط! وهو لعوب وحركته كثيرة ماشاء الله عليه عشان الفنادق ما تقبل حيوانات اليفة

لا..ولسة ولما نتجمع في بيت العيله خارج جدة كللللللهم مستائن من نوسا اللي يقرف واللي يخاف, وكل شوي يرسلوا لي الامراض اللي تسببها القطط ,وانظري ماذا تحت يد القطة ,شوي ويطلعوني من العيله

المهم انا لو اعرف ادربه يدافع عن نفسه اخليه في الحوش واعطيه اكله كل يوم واحرص عليه بس مش عارفه يقدر يدافع عن نفسه بعد ما يقعد شهر بالبيت مثلا ؟ والا يفقد مهاراته ؟هو لما كان عند امه وهو مريض كان يقاتل اخوانه وياخد نصيبه من الاكل ،شاطر , لكن لما رجع من عند الدكتور ,لقيته حتى مو عارف يمشي يروح فين اتغير عليه المكان
طول الوقت احط له الاكل والموية والدواء واقعد ابكي ..مش عارفه كيف اعمل معاه

انا لو اقدر ارعاه ما كنت كتبت الموضوع هذا ..دعواتكم ربنا يسهل امره