نبذه عن دجاجتي بسم الله عليها

[Budgerigar]

المشاركة الأصلية كتبت بواسطة ام ماجد

السلام عليكم ورحمة الله وبركاته

احلى شي يوم تكون دجاجتك شاطره
صراحه وبكل شفافيه الى 25 يوم من شرائي لـ ببغائي كنت اقول ببيعه بس
تعبني نفسيا

عرفت ان الصبر هو ثمرة كل شي وقلت بصبر عسى الله يفرجها
وفرجت الحمدلله

اليوم كمل عندي شهر و10 ايام

طريقتي بالتفصيل
خليته 10 ايام بالقفص بس اغير له الاكل والمويه وانظف القفص
بعدها عطيته من ايدي واكل الحمدلله اسبوع على هالحركه
بعدها طلعته برا القفص يتمشى على راحته واذا وصل المغرب سكرت الانوار ورجع القفص
بعدها عطيته من ايدي وهو برا

بعد ماخلصت الثلاث اسابيع فكرت بالمسح على الراس استخدمت المنشفه ومانجحت عضني وجعر
مع اني اعطيه اصبعي بدون عسل مايعضني (طبعا ماجربت هالحركه الا بعد 20 يوم وهو عندي)

قلنا بلاها المنشفه

وتركته اسبوع امسح على المنقار
قبل اذا بمسح على منقاره ينزل راسه يخبيه ورا الشبك والا ورا الاستاند علشان ماالمسه
كم يوم وتقبل امسح عليه ووعادي شكله حاب الموضوع

حاولت اخذه بالمسايسه واعامله مثل مااعامل الاطفال
كل شي يريحه اسويه واخذت قاعدة (بالراااااااااحه) يعني متى ماتعود وبغاني بحاول امسحه واطلعه على ايدي

كل يوم عن يوم اشوف تقبل منه

وهذي اخر اربع ايام امسح على راسه بكل هدوء وهو على الاستاند صح بالبدايه يحاول يهرب بس مايجعر ويرجع على الاستاند يسكت شوي ويحرك راسه شويات

وتوه دجاجتي يبدا يصفر من 5 ايام بس

انا اقعد معاه 24 في 24
من اصحى الصباح ادخل عليه واقوله صباح الخير حياتي افتح الباب ادخل يدي وامسح منقاره
واغير الاكل والمويه وانظف القفص
اطلعه الصاله نكون موجودين قريب منه يصفر شوي ويطامر بيفتح القفص
لأني لاحظت عليه لما يكون برا اذا صفر لازم يطير بعدين يرد الاستاند بعدين يصفر بعدين يطير بعدين يصفر بعدين يطير وهكذا
يعني الصبح ينقهر يصفر ومايقدر يطير

بعدها اطلعه من الساعه 2 او 3 العبه واوكله من ايدي
والساعه 4 نبدا ساعة تدريب

بعد التعب اقدم له الاكل وزعلان مني لاني تعبته
مايرضى يآكل بس يرميه طبعا الام ماتقدر تخلي دجاجتها جوعانه كل مايرمي اعطيه وشوي وادخله بفمه غصب
اقوله حياتي علشاني شوي بس شوي بعد مايرمي 20 حبه
يآكل وويشرب
وانا احب حتى المويه اقدمها له لأني توي ماشريت استاند فيه حق الاكل والمويه
بس عندي خشب فيها درج يصعد عليها

لاحظت عليه الساعه 6 المغرب يصفر ويكون نشيط

اليوم اللي هوالعاشر من بعد الشهر قربت الفوطه بشيله علشان يدخل القفص هو تعود على هالشي مايجعر الساعه 7 خلاص نوم نوم

اخذه بالفوطه ادخله واسكر عليه بعدين افتح الباب وامسح عليه علشان نراضيه
اليوم قربت الفوطه وايدي من تحته طلع برجل قلت له شاطر اطلع وكررتها عليه طلع بالثانيه
رفعت ايدي بخفيف وقلت شاطر ثلاث ثواني وطار شكله مااستوعب
بعدين راح القفص ودخل من نفسه

بسم الله على دجاجتي وشطارتها

وهذي صوره الريش تالف نوعا ما

ابي منكم تعطوني كم عمره وووو معلومات يعني

الكلمات اللي اعلمه عليها:
ماء - ام (الاكل ) - نوم - الصلاه (كل ماجيت بصلي عنده)
- صباح الخير - برا (اذا بطلعه)

احسه يستوعب يعني لما اقول (ام) يطل بالصحن اذا قلت (برا) طالع فوق القفص يبي يطلع
لما اقول (نوم) يحاول يهرب لأنه بيدخل القفص

رايكم بصراحه وهل عندي غلط بالطريقه اللي اسويها من كل ناحيه ابي منكم ياخبراء
لأني وان تعلمت تلميذتكم

ما شاء الله تبارك الله... الله يبارك لك فيه اختي ام ماجد وصراحه ما شاء الله عليك ما قصرتي يعني فيه ناس يتوهقون يوم يشترون ببغاء وما يعرفونله ويملون منه بسرعه بس طريقتك ما شاء الله حلوه ومفيده الله يحفظه لك يا رب