أول مـــوضـــووع ..!!!

[طير الهوى]

،،

ألف مبروك الطير يالغالي .. والله يخليه لك ويحفظه من كل شر ..

مادام ان الطير جديد عندك وجديد على البيت .. احرص ان هالفتره تكون فترة تعارف بينك وبين الطير ..

احرص انك تتواجد أمامه بشكل دائم .. وانك انت اللي تعطيه الأكل .. وطلعه من القفص .. وحاول تكلمه وتلاطفه .. الكاسكو بطبعه اجتماعي ومايحب العزلة والوحده .. فكن انت حوله وتفاعل معه بحدود المعقول .. استمر على هالمنوال فترة من اسبوع ونص الى اسبوعين .. أو حتى لين تحس ان الطير تأقلم وتعود وجودك وعرف انك انت المسئول عنه ..

بعدها عاد خذ راحتك .. تبي تولفه زياده .. او تبي تعلمه الكلام .. تسوي اللي يريحك ..

بس فيه كم ملاحظة وانا اخوك :

1/ الطير لا زال يعتبر فرخ فاحرص عليه زين .. وانتبه من التيارات الهوائية البارده .
2/ ابتعد عن ترويش الطير بالوقت الحالي .
3/ الخروج من القفص شي مهم وله ضوابط .. مثلا قرر انك تطلعه يوميا مرتين .. مره الصباح .. ومره العصر .. واستمر على هالنظام لين يحفظه الطير ويعرف انه مافيه طلعه الا بهالأوقات فقط .
4/ عند تقديم الأكل عوّد الطير على كلمة معينة .. بحيث تكون فيه كلمات تربط الطير فيك .. تفهمها ويفهمها .
5/ اذا طلعت الطير من القفص انتبه له من البيئة المحيطة .
6/ لو كانت جنحان الطير كاملة وغير مقصوصة .. من الأفضل لك انك تقصها تحسبا ً لكل طارئ لا سمح الله .
7/ تجنب استخدام المعطرات والبخاخات حول الطير .
8/ لا تتسامح مع الطير نهائيا ً .. ارسم له حدود تصرفاته .. كافئه عند كل سلوك جيد .. وعاقبه وانهاه عند كل سلوك غير محمود .
9/ الطير لا يمكن أن يعيش بدونك .. فكن له كل شيء .
10/ لا تنسى ان تربية الطيور .. هي مرادف لكلمة الصبر .. لذلك اصبر على طيرك ولا تيأس أبدا ً .
11/ اذا استمريت مع طيرك بالعلاقات هذي وتقربت منه مايكفي .. ماتحتاج لتوليف .. الطير اذا وثق فيك راح يسلم نفسه لك طواعية .. ويألفك .. ويحبك ولا يتخلى عنك أبدا ً .

هذا ماطرى ببالي وانا اخوك .. وآسف على الإطاله ..

وبالتوفيق يالغلا وعطنا آخر المستجدات كل فترة .. وصور للحبيب ^.*

،،