مشكلة في أذن قطتي

[ayyad_76]

السلام عليكم ورحمة الله وبركاته


إشتريت قطتي الصغيرة وكنت فرحان بيها قوي


بس للأسف الفرحة ما تمت ,,,


بعد إن وصلت القطة بالسلامة من مشوارها الطويل وبعد ان قابلها كل أهل البيت بالترحيب والبهجة .
إذا بها تتجاهلنا وتقعد لوحدها حزينة .


قلنا لسة مخديتش عالبيت , وأديناها فرصتها ,
يوم والتاني ,
وبرضه .
ننادي عليها مترضش ,
نشخشخ لها باللعب تطنش ,
ننادي ولا سمع لمن تنادي .
القطة مش سامعانا أصلاً !!!


القطة بتهرش كتير في ودانها .
وينزل مع الهرش زي تفل الشاي أسود
بالنظر على أذنها النظيفة خارجياً = خارجياً فقط = وجدت الدنيا سودة ومسدودة .

محاولتش أتدخل وخدتها للبيطرية كشفت عليها وحطت لها بالسرنجة سائل أصفر - بتقول تركيبة - ونظفتها بالجفت ,وكانت القطة تحك رجلها كأنها تهرش أثناء التنظيف .
وحطت تاني من السائل ونظفت والودان مبتنضفش .
الدكتورة قالت ده فطر كتير في ودانها , وعطتها حقنتين , تقريباً مضاد حيوي و فيتامين .
وأعطتها في فمها تقريبا واحد سم سائل أبيض للديدان .


وقالتلي أحميها وأنضف لها ودانها بقطن وأجيبهالها كمان أسبوعين تشوف ودانها وتديها تطعيم ديدان تاني !

الدكتورة كانت عايزة تديها تطعيم سعار بس أنا مرضيتش , قلتلها لما نخلص من موضوع ودانها .

::: ملحوظة القطة عمرها شهرين وأسبوع وخمس أيام :::

وقالتلي حاتوصيلي على تطعيم رباعي علشان بيجي بالطلب .

الدكتورة كانت عايزة تطعمها ضد السعار وعمرها شهرين وأسبوع , وانا قرأت أن السعار مش قبل أربع شهور وده اللي خلى ثقتي تتزعزع في الدكتورة . حسيتها عايزة تشتغل وخلاص , انا ما طلبت منها تطعيم .
انا همي حاليا حل مشكلة الأذن وبعد كده هاظبطها .
ثالثاً الدكتورة ما أعطتني قطرة ولا حاجة علشان أنظف بيها !!
كمان أسعارها غالية , بس مش مهم لو هاتجيب نتيجة .

القطة الحمد لله بصراحة هية متعبتنيش في موضوع الحمام , وشهيتها معقولة.


ياريت تفيدوني لأني صحيح ربيت قبل كده بس أول مرة أتعامل مع البياطرة , وأول مرة أفكر في التطعيمات .


في إنتظار المساعدة العاجلة .