ابغي فزعتكم ياخوان شما عندي كاسكو عور راسي

[السويدي]

السلام عليكم ورحمة الله وبركاته

يااخوان انا اشترت كاسكو من واحد من الاعضاء يجزيه الله خير

وتم عندي الكاسكو تقريبا حول شهرين اول مايبته عندي البيت وعمره حاليا بين 4-5 شهور كان وايد هادي لا يصافر ولا يسوي شي والحينه الحمد الله بصحه وعافيه يلعب ويتحرك وايد ويصفر بس حد يخوفه يجاعر ويرد يصفر مره ثانيه اول شهر كان عندي احطه على ايدي ومايسوي شي ولايعض بس من تعود على اهل البيت الحينه صار فضولي واخليه في البيت يتمشى يصافر ويلحق الصغاريه في البيت الظهر اطلعه من القفص وعلى غروب الشمس ارجعه في القفص من احطه في القفص يكره نفسه احسه يعصب ويتحرك كثير وياكل الجريده الي تحته والمشكله الثانيه ياخواني انه كل مالعب معاه يعض وايد ومرات مايعض يعني اذا احك راسه مايقولي شي وفجاءه اتشوف منقاره على صبعي ويعض شو الحل يااخوان ابا مساعتدكم لانه الحينه وايد يعض مش نفس قبل ق كان يعض وعضته خفيفه والحينه من يعض احس انه بيكسر صبعي وهو اليف مشكلته انه يعض شو الحل يااخواني

واعرف انكم مابتقصرون معاي اتريا ردودكم ....

[مجنون عويشق]

السلام عليكم

اختي العزيزه

بما انه استالف عليك ..

فهذا مايسمى عض ..هو يعض من ناحية اللعب ..ولكن ثقيل دم شوي

اذا عضك ..انهريه وغيري ملامح وجهك ..ومن هالقبيل

وان شاء الله يفهم

[Madrid Spirit]

كل ما يعض

قولي نوووووووووووووووو بصوت عالي

و اسحب يدك بهدوء عنه

و اتركه لمده 10 دقائق لوحده بالقفص

ثم عد و العب معاه من جديد

ان عضك عيد اكره

لين يعرف انه كل ما يعض حتتركه و ما حتلعب معاه

[السويدي]

مشكورين على ردودكم الحلوه ياخوان

بس المشكله يوم احط ايدي ويعضني واحرك ايدي بسرعه يزعل وشو الحل
وحتى يوم اطلعه من القفص واحطه على الستاند ينزل منه ويجي عندنا المجلس
بس ابغي مشكلة العض هو اليف بس يعض هذا عيبه الوحيد وشو الحل ياخوان

ماشاء الله 45 مشاهد و2 ردووود

[KAKA_MILAN]

انا اول مااخذت طيري كان كذا احك راسه ولايعضني وفجائه يعض
بس انا نوع الكاسيكو اللي عندي هولندي يعني مايجعر
ومع الوقت اخذ علي وصرت ادخل يدي داخل القفص ويطلع عليها ولاعاد يعض ابداً
دايما انت اللي نظف الطير وحط له الأكل والماء لغايه مايتعود عليك وبعدها لن يعضك بأذن الله

[السويدي]

مشكور اخوي KAKA_MILAN على ردك الجميل

وانتظر اصحاب الخبره

[zaherdb]

أخي الكريم مثل ما قال لك أخوي مجنون عويشق
هذا من زود الألفة ويبي يلعب معاك بس انه ثقيل دم شوي
ولو كان عض بمعنى العض كان طير اصبعك لأن منقاره ما شاء الله عليه مقص
ولكن حاول انك تعوده على كلمه معينه في حال سوى شي مايعجبك ومع المده راح يعرفها انا عن نفسي اذا سوى شي غلط او بدا يعض الكيابل او يتضارب مع الطيور الأخرى اللي عندي حتى لو من بعيد اقول له عيب بس لا يكون صوتك عالي مرة حتى لا يصير الموضوع ترهيب ويصير يخاف منك يعني هي الفكرة انك توصل له معلومة ان كلمة عيب مال تقولها له الا اذا سوى شي غلط وتقفل عليه في القفص من 10 دقائق الى ربع ساعة وبعدها تطلعه...
نقطه ثانية
تكلم مع طيرك كأنه واحد من افراد اسرتك ولا تقول هذا طير وما يفهم ..
سولف معاه بدون خجل وتأكد ان التواصل النفسي يقربك لطائرك اكثر من تنظيفك لقفصه واعطائه الأكل وجرب بنفسك النتيجة..
واسمح لي على الإطالة

[لوتيه]

لالالا ماظن هاذي خفة دم و يبا يلعب معاه
انته شكلك اهملته عشان جذيه زعل عليك و صار يعض
حط عسل على صبعك و حط يدك على منقاره بيتم يلحس العسل
و سوله هذي الحركه كم يوم لين مايتعود و يصير مايعضك وانته لي حطله الاكل و الماي
و خذله العاب حق يقعد يعضضهن بدال لا يقعد يعضضك بتلقاهن عند البيطري البريطاني و بعد كارفور يبيع العاب عند قسم اكل الطيور

[سكر]

اولا كلام الشباب فوق كله صحيح ان شاء الله

بس السبب في انه يعض هو انت يا سويدي

لأنه في البدايه كان يلعب معاك ومن زود المحبه يحب يلمسك بلسانه مثل الأطفال الرضع لما يمسكو خشم امهاتهم

لكن لما صار يشوفك تسحب يدك بسرعه صار فاكر ان هذي هي أصول اللعبة كذا

انه يعض وانت تسحب يدك بقوة

وهو ينتظر انك تهجم عليه بيدك مرة ثانية, يعني مرة هو ومرة انت, مثل الأطفال.

وبعد فترة صارت العضة أقوى, وكأنه تدريب له لفرض القوة بس باللعب.

لأنه لو ناوي يعضك بجد بيقطع اللحم بسهولة.

أما كلام اختي لوتيه

المشاركة الأصلية كتبت بواسطة لوتيه

لالالا ماظن هاذي خفة دم و يبا يلعب معاه
انته شكلك اهملته عشان جذيه زعل عليك و صار يعض
حط عسل على صبعك و حط يدك على منقاره بيتم يلحس العسل
و سوله هذي الحركه كم يوم لين مايتعود و يصير مايعضك وانته لي حطله الاكل و الماي
و خذله العاب حق يقعد يعضضهن بدال لا يقعد يعضضك بتلقاهن عند البيطري البريطاني و بعد كارفور يبيع العاب عند قسم اكل الطيور

فهي جزاها الله خير جابت لك طريقة صحيحة في التعامل مع هذي الحالة بغض النظر عن التفسير.

العسل في اصبعك بيخلي الطير يتوقف فترة عن العض لأنه بطبعه اذا شاف شي غريب يجلس يدرسه بحذر قبل ما يقرر انه يقوم بردة فعل معينه.

في هذي الأثناء لازم تستغل وقت تفكيره وما تقوم بردة فعل فجائية أو حذرة

خصوصاً أرجحة يدك, يعني تقرب اصبعك وتبعده, لأن هذا يدل على انك خايف
وهو في عالم الحيوان عبارة عن جس نبض لقوة الطرف الآخر اللي هو الببغاء استعداداً للهجوم.
فالببغاء يفهم هذي الحركة بهذا الفهم

ويقرر انه يعطيك عضه بقوة معينة عشان تخاف وتتراجع عن الهجوم.


اعذرني على الاطالة بس حبيت اوضح تفكير الببغاء سابقاً ولاحقاً.


وما قلته يحتمل الخطأ ويحتمل الصواب

تحياتي

[السويدي]

ومشكورين ياخواني على ثقتكم ويزاكم الله الف خير وماقصرتو

وانشاء الله بجرب الطريقه الي خبرتوني عنها وبرد عليكم خبر والسموحه منكم