عدوانيه القطط

[دلوعةقطوتي]

عدوانيه القطط



اهلين
صباح \مساء الورد

لي فتره وانا اقرا عن بعض الاعضاء اللي يدورو على حل لعدوانيه قططهم

بالبدايه عملت سيرتش ولقيت كثيرين يشتكوا من نفس المشكله

القطط معاهم لطيفه وحنونه ولكن لما تشوف احد غريب تتغير واحيانا تتخذ وضعيه الهجوم واحيانا تهجم وتسبب اذى للي حواليها

جلست ادور على الاسباب خصوصا اني اعاني من هالمشكله بس مو في البيت لما نكون رايحين للدكتور او للمحل

خلوني اتكلم شوي عن قطتي هي لطيفه وحنونه ولعوبه ماشاءالله شخصيتها اجتماعيه نوعا ما
ممكن تلعب مع الاطفال لما يزورونا

مره من المرات اخذتها للمحل عشان التزاوج وتركتها فتره
طلعت شرسه وضربت الذكر بيني وبينكم استبعدت ان قطتي اللطيفه تعمل هالشي واخذتها بعد فتره

وكانت خايفه مو راضيه تبعد عني لدرجه تنام وهي ماسكه يدي لو بتحرك شوي تمسك رقبتي وتدخل راسها فيني وتموي

ولما اتحرك في البيت تكون وراي وجلست كم شهر على هالحال

لما رحنا بعد فتره للمحل عشان اقص اظافرها بيني وبينها فيه مسافه كبيره واسمعها صراخ واقول بيني وبين نفسي ايش هالقطوه المزعجه طلعت قطوتي طبعا ماقدروا عليها واخذتها وقصيت لها في البيت لانها صارت تلهث بقوه وخفت عليها وجلست فتره على ماهديت

المصيبه عند اخذ التطعيمات الدكتور والمساعد ومايقدروا عليها بالاخير اضطر ادخل اهديها واتكلم معاه ويقدر الدكتور يعطيها الابره
لقيت انها لما تتاكد اني معاها تهدا شوي اجلس امسح على راسها واكلمها
ممكن ناس تقول بلا دلع بس انا عندي قناعه ان القطط زي الاطفال محتاجه للحنيه والعطف

الحمدلله مع الناس اللي يزورونا جريئه نوعا ما ممكن تدخل الغرفه تشوف مين فيه بس ماتحب احد يلمسها بعكس قطتي الثانيه اللي كانت لما تسمع صوت الجرس تركض تتخبى وماتطلع الابعد ماالناس يختفوا مع انها ماتعرضت لموقف بس السبب مني ماعودتهاعلى الاختلاط وبحكم ان البيت هاديء ومافيه اطفال فصار عندها الخوف طبعا هذا بتحليلي كل قطه شخصيتها تختلف عن الثانيه



طولت كلام صح؟
اللي ابي اوصله ان القطط حساسه وسبب عدوانيتها نابع من خوف او موقف تعرضت له القطط او بسسب تغير المكان او الرائحه او شعورها بالتهديد او الغضب واحيانا يكون للفت الانتباه

مرات تنونو لي وانا مو منتبهه تجي وتعضني او تضربني يعني شوفيني


راح اقول بعض المؤشرات اللي بتدل على ان القطط راح تاخذ وضعيه الهجوم عشان ناخذ احتياطتنا



الهسهسه او البخ

توسع حدقه العين



ارجاع الاذن للخلف

تقوس الظهر

نجي للحلول

الابتعاد عن المؤثر

عدم استفزاز القط بمسكه او لمسه من الغرباء

عدم رفع الاصوات او الحركه بسرعه لان هذا الشي بيزيد الخوف عنده وبيحاول الدفاع

التكلم مع القط بهدوء والنظر بعينيه مباشره

في حال القط بدا بالعض او الهجوم محاوله تشتيته باصدار صوت او رمي شي بعيد اوحتى استعمال قطرات من الماء الحلول التقليديه

في حال ان القط ما هدا واستمر بال امسك القط من القفا مع حمله ثقله باليد وتركه في غرفه لمده خمس دقائق مده كافيه لرجوعه الى حالته الطبيعيه

مافيه حلول فعليه فيه قطط تنفع معاهم انك تقربهم من الناس تدريجيا وفيه قطط لاماتتقبل الاختلاط وتستمر عدوانيتها مع الناس الا مع مربيها



لهنا خلصت موضوعي شويه بالفصحى وشويه بالعامي

اللي حاب يضيف تجربته مع عدوانيه قططه وكيف يتصرف معاهم لما يغضبوا يتفضل

الموضوع مطروح لتبادل الحلول