الصبــــ أفضل طريقة لتدريب الكاسكو ـــر

[sqo0ore]

السلام عليكم ورحمه الله وبركاته ...

أولا احب ان اهنيكم على هذا المنتدى الرائع والي يضم ويجمع كبار محبي ومربين الحيوانات ونا من المتابعين لهذا المنتدى والمنتديات الاخرى المختصة في الحيوانات لاحظت نقل المواضيع مع التعديل ونادراً تحصل احد يكتب تجربته الشخصية في التدريب أو استراتيجيته في التدريب وأعذروني لاني أول مرة اكتب في منتدى لاني فقط قارىء
واليوم راح اطرح تجربتي كاملة في تدريب الكاسكو وترويضه واتمنى اني افيدكم

مواصفات الكاسكو / فرخ لم يتجاوز السنة , مصيود وشرس جدا, بنيته الجسمانية كبيرة بنسبة لعمرة (ماشاء الله تبارك الله ) ,خائف جدا جدا والتجعير عالي ولايثق بالبشر ودائم الجلوس في أرضية القفص مع العلم اني لما اشتريتة من السوق لم يكن يجلس على ارض القفص لاكن تغير لما وصلت للبيت .

بداية الترويض/ طبعاً أغلب المواضيع والأبحاث الي قريتها عن الكاسكو تطلب منك وضعة في مكان مرتفع وجعله يراقب وووو, لاكن انا حبيت اعتمد طريقتي في الترويض الي تكون برضا الكاسكو والصبرعليه الا مايتعود على البشر , أول شيء قصيت ريش الجناح وثاني خطوة رشيت الكاسكو بمحلول خاص لتنظيف الريش من الحشرات , وحطيته عند مدخل البيت عشان يتعود على الدخله والطلعة وأصوات البشر ومايخاف , وتركته اسبوع تقريبا بداخل القفص , طبعاً التجعير لم يذهب وحدث بلا حرج عن الصوت والخوف , ثاني اسبوع فتحت سقف القفص ونقلت مكان القفص الى المكان الي دائما يتجمعون فيه الأهل وتركته هناك , أول يومين لم يخرج فوق القفص نهائياً لسبب الخوف , بعد فتره صار يطلع فوق القفص ويراقب ويتحرك وطبعاً لازم تصير محاولات هروب ,
بعد ماتعود على هذي الطريقة وعطيت الكاسكو مجال انه يتعود على الأوضاع الجديدة الأن لازم يمشي على طريقتي وتدريبي والاشياء الي انا ابي اعوده وأعلمه عليها



1-التنويع في الأكل (كان ماياكل الا الحب الشمسي فقط ) والأن اتبعت طريقة تقليل الاكل المقدم له ليشعر بالجوع ويضطر انه ياكل ومع الأيام صار ينوع اكله

2- شراء العاب الخاصة بالببغاء ووضعها بالقفص وحصلت نتيجة رائعة مع الألعاب خليت الكاسكو يصير لاعب جمباز لووول

3- تعليمه التغريد والتصفير << وهذي النقطة راح اتكلم فيها في موضوع مستقل لاني بحاول اسوي فيه حركه خنفشارية اذا نجحت تجربتي راح اطرحها لكم للأستفادة

4-ايقاف الجعير المزعج( راح الجعير تدريجياً بعد ثلاث اسابيع) وانصح الاخوان بتجريب العسل الطبيعي لانه خفف التجعير لدى ببغائي ولاكن لا أعلم مدى صحة كلامي

5-المسح على رأس الكاسكو وملاعبته بدون العض ( أصعب نقطة بالنسبة لي )


قبل مابدأت معه التدريب صار وقت التدريب معروف ومايتغير الا نص ساعة او ساعة وهذي النقطة لها فايده بأنك لما تجي تدربة في وقت واحد راح يعرف متى وقت التدريب ويركز معاك ويتلقى منك التدريب بكل سهوله وتركيز.

ولما بدأت لبست القفازات واخرجته من القفص وصرت اطالع فيه ولما قربت مني عضني ويجعر ومايخليني كنت ادربة كل يوم تقريبا 20 دقيقة وأرجعة مكانة وكل مره ازيد في الوقت بس ما ازيد الوقت اكثر من ساعه ولله الحمد قدرت اني اسيطر على الكاسكو واروضة في شهر واحد وخليته يتخلى عن خوفه من البشر والجلوس في ارضيه القفص ومحاولات الهروب وطريقة اكله المحدوده
ويتبقى من التدريب الكثير الكثير لاكن مع الوقت راح اكتب لكم التجربة كاملة وأنصح كل واحد يشتري الكاسكو والي يبي يحقق معه الى ماكان يرجوه ويكون الببغاء متعلق فيك ويحبك لازم تصبر عليه لان لو صرت تدربه غصب وتروضه غصب ماتوقع راح تحقق النتائج المرجوة ,لازم تكون لين الجانب وتحفزه على التدريب ويعرف متى وقت التدريب



وفي الاخير احب اشكر منتدى تو زو الي جمعنا وياكم واسأل الله التوفيق واني وفقت بالطرح ولما اخلص التدريب الفعلي للببغاء بأذن الله راح اكتب عنها .