اشترك في نشرتنا البريدية ليصلك كل جديد

اتحداك · 27-05-2013, 07:47 AM

السلام عليكم ... يا جماعة انا بجد اسقط فى يدى ... انا عندى قطة انثى عمرها سنة و 4 شهور تقريبا اسمها توتا ... من حوالى 10 ايام ... جبت قط ذكر عمره شهر اسمه بوبوس

اسفة انا هشرحلكم الحالة بالتفصيل من اول ما جبت بوبوس لغاية النهارده ... معلش استحملونى لو هطول عليكم بس عشان اديكم الداتا كلها

المشكلة ان توتا مش طايقة بوبوس ومش حباه خالص ... انا قلت ده شئ طبيعى لانه قط غريب عن البيت و هى طول عمرها اتربت على انها القطة الوحيدة اللى فى البيت ومش عايزة قط يشاركها فيه .... هى كل ما بتقرب منه او يقرب منها بتشمه من بعيد و بعدين تبخله و تسيبه و تمشى بس مبتضربوش و مبتعملوش حاجة

بس قعدت حوالى يومين او تلاتة فى وسط الاسبوع اللى فات مش راضية تاكل خالص يادوب تشرب ميا بس عشان متموتش ... لدرجة انى دوبتلها كام معلقة سكر فى الميا بتاعتها عشان تسند جسمها ... ومش عايزة تقعد فى اى مكان هو قعد فيه لانها شمة ريحتة فى المكان ده ... غير انها كانت واخدة موقف مننا احنا اصحاب البيت طبعا ... فكنت بحاول ادلعها و احايلها على قد ما اقدر وعلى قد ما بتكون فى حالة هادية تسمحلى اقرب منها فيها من غير ما تتضايق

انما الحمد لله بدات تاكل شوية بشوية ... و بدات تتجاوب معايا و تخلينى اشيلها و تقعد فى حضنى تانى و متجريش منى ... و كمان بقى ممكن تسمح انها تنام او تقعد فى نفس الاوضة اللى قاعد فيها بوبوس .... بس مش جنبه ولا قريب منه طبعا ... من بعيد ... و لو عدت من جنبه بقت تسيبه و تمشى ... او ممكن تزوم بس تفضل واقفة فى مكانها متقربش منه او تأذيه

انما امبارح حصلت حاجة غريبة جدا ... بوبوس لاول مرة اتجرا و حاول يلعب معاها بايده ... و يمسك رجلها ... و يدخل فى حضنها ... وهى ساكتاله خالص ... مش بتقاومه ... و بعدين بقت تجرى منه و هو يجرى وراها و يلاعبها تانى .... انا شفت المنظر ده فرحت اوى و قلت انهم بداوا يتجاوبوا مع بعض شوية ... و فجاة توتا خرجت عن شعورها اخر مرة ... و راحت جاية وراه و بخت فى وشه و لطشته بالقلم .... ومن ساعتها و هى كل ما تلمحه حتى من بعيد فى اى حتة ... تجرى وراه حتى من غير ما هو ييجى جنبها خالص ... و تروح بخة فى وشه ... و ضارباه قلم

و بوبوس مهما كان لسه بيبى مش بيعرف يدافع عن نفسه فلما بتمد ايدها عليها بيروح مرمى ع الارض و يخاف منها اوى ... و ماما بتروح مزعقالها جامد عشان تحوشها عنه

ارجوكم ساعدونى انا من ساعتها و انا حايشاهم عن بعض خالص دايما اخد واحد فيهم معايا الاوضة و اقفل عليها عشان افصلهم من امبارح و انا ع الحالة دى لدرجة انى معرفتش انام ... وفى نفس الوقت الوضع مش هيستمر كده لانى عايزاهم ياخدوا على بعض ... فى نفس الوقت عايزة توتا تبطل ع الاقل تضرب بوبوس ... و بعدين تبقى تاخد عليه على مهلها ... بس ع الاقل ابقى مطمنة ان مفيش خطورة على واحد فيهم من التانى و انا نايمة مثلا

مع ملاحظة ان توتا بطبيعتها شرسة مع الاغراب بشكل عام و خصوصا الاطفال الغرب و طبعا الحيوانات ... و من ساعة الحالة دى ما جتلها و هى لطيفة جدا معايا و مقربة منى زيادة عن اللزوم لدرجة انها مش عايزانى افارقها ابدا من امبارح كل ما اقوم من جنبها تجرى ورايا و تنونو عايزانى اشيلها او احضنها ... منامتش الا لما فضلت نايمة جنبها وواخداها فى حضنى ... انا ببعتلكم و انا قاعدة جنبها دلوقتى

ارجوكم ادونى اى حل ولو مؤقت انا مش عارفة انام ... و اسفة لو طولت عليكم مرة تانية

شاهستا · 27-05-2013, 08:58 AM

اهلا بيكى
كل الى قولتيه دة طبيعى جدا
كان المفرةض من الاول تعرفيهم على بعض بشكل سليم
دلوقتى هاتى قكعه قماش مبلوله وامسحى بيها على توتا بعدين علر بوبوس
والعكس امسحى على بوبوس بعدين على توتا
عشأن ريحتهم تختلط ببفض
وهرجع لموضوعك تانى بس جربى الحركه دى

Octopus · 27-05-2013, 12:33 PM

اول شي مرحبا بكي و بقططك في المنتدى و كما قالت شاهستا هذا شي طبيعي و على فكرة خذي و قتك و مايهمك

اتحداك · 27-05-2013, 10:49 PM

شكرا يا جماعة لاهتمامكم .... هى توتا النهارده هديت عن امبارح الحمد لله ... انا لاحظت انها وقفت قدام بوبوس كذا مرة و بيعدى من قدامها كتير مش بتعمله حاجة ومش بتروح وراه

بس عامة انا هجرب طريقة القماشة المبلولة مؤقتا عشان ياخده على بعض و هشوف النتيجة ازاى و اقولكم

و شكرا لاهتمامكم مرة تانية بجد انا مش عارفة كنت هعمل ايه من غيركم

شاهستا · 27-05-2013, 11:47 PM

ان شاء الله هتتعود على وجوده مع الوقت متقلقيش

دى حاجه بتحصل مع اى حد

اتحداك · 04-06-2013, 06:52 PM

[B][COLOR="Navy"]متشكرة قوى يا شاهستا ربنا يخليكى يا قمر ... انا مش عارفة تكبير الحروف راح فين بس مش مشكلة ... طب ممكن سؤال بخصوص المنتدى ... انا من كام يوم حاولت ادخل المنتدى كذا مرة كان بيقوللى انه فى عطل ياترى ده حقيقى ولا انا اللى كان عندى مشكلة؟؟

Octopus · 04-06-2013, 07:34 PM

اقتباس:

المشاركة الأصلية كتبت بواسطة اتحداك

[B][COLOR="Navy"]متشكرة قوى يا شاهستا ربنا يخليكى يا قمر ... انا مش عارفة تكبير الحروف راح فين بس مش مشكلة ... طب ممكن سؤال بخصوص المنتدى ... انا من كام يوم حاولت ادخل المنتدى كذا مرة كان بيقوللى انه فى عطل ياترى ده حقيقى ولا انا اللى كان عندى مشكلة؟؟

طمني هذه الامور متعلقة بالصيانة