هل يختلف مقدار خوف الكاسكو حسب المكان؟+كاسكو نصف أليف كيف أدربه؟+الخروج من القفص+بسة

[Need not to know]

السلام عليكم ورحمة الله وبركاته,,


دايما أكون أنا سبب شرا البغبغانات في بيتنا,, وبعد كدا بابا اللي يربيها مو أنا "^^
في بغبغان أشترينا زمان من جدة محجل بعمر أختي بالتمام ستة سنوات,, في المحل البغبغان كان جدا أليف لدرجة إنو لو تحط أصباعك في فمو ما يسويلك شي ويطلع على يد أي شخص بس ما يتكلم,,

جا البغبغان عندنا وأتدرب عالكلام واتعود على بابا لأنو هوا اللي أكلو وشربو واعتنى بيلو وسار جدا حيوي ولعوب بعد ما كان في المحل مرا هادي (لما اتخيلو في المحل ودحين ما أصدق إنو نفسو),, فسار أليف مع بابا بس العض عندو رجع تاني من أول ما جا على بيتنا,, يعني لما كنا في المحل كنت أحط أصباعي في فمو عادي بس دحين لا يعض,,

دحين أبغا أعود البغبغان عليا,, أول خطوة أنا اللي حأعتني بيلو (من اليوم),, الفترة الأخيرة سرت كل ما أمشي من جمبو أتكلم معا أو أقلو هات راسك,, سار يتكلم معايا ويعطيني راسو وياكل من يدي (أعطيلو الشي ويدي برة القفص لأني الصراحة أخاف من عضو لأني أكلت كم عضة قبل كدا، حتى لما أحط راسو أحكو وأنا حزر),,

أبغا الخطوات اللي أقدر أخلي أليف معايا وما يعض زي لما كان في المحل بس ما أبغا يسير هادئ,,
والمشكلة الأساسية واللي أنا مستغرب منها إنو لما نخرج قفصو في الحوش الصبح وأنا رايح المدرسة بعد ما أتجهز أجلس أتكلم معا أقلو هات راسك يخاف ما يجعر بس إنو يجلس كدا ما يتكلم بس يتكلم لو رحت,,

--

في بغبغان كان عند عمي بس يجعر ويعض فأعطانا هوا,, بابا أعتنى بيلو,, جلس كم يوم وبطل جعير وعض (مدري إيش كانو يسوولو هناك!!),, البغبغان بدأ يتكلم وسار يتفاعل معايا لما أكلمو وما يخاف,, بس إنو لو قربت يدي منو يبعد ويطل بحزر كدا,, وشويا يحاول يقرب بس يرجع يبعد تاني,, ولو جيت أبغا أعطيلو أكل بيدي نفس الشي يسوي,,
وهوا كدا أليف ويصفر ويتكلم ويتفاعل معايا لو كنا في البيت أو في الحوش بعكس التاني,,

--

للأسف ما أقدر أحط البغبغانات عالستاند أو حتى عالقفص لأنو ماما وأخواتي وأخواني الصغار يخافو منهم ويقولو إنهم يوسخو البيت ومش عارف إيش ,, إيش الحل برأيكم؟

--

سؤال مستقبلي شوية,, طبعا إحنا يدوب والبغبغانات راضيين إنها تجلس في البيت فكيف لو بسس!!,, فلو في المستقبل مثلا نزل على أهلي الرضا عالحيوانات والبساس وسارو ما يخافو منهم (وأنا في سبيل تحقيق دا الشي) هل أقدر أجيب بسة وأنا عندي بغبغانات تسير أليفة معاهم؟ ما أدري هوا دا السؤال ينحط في قسم البغبغانات ولا البسس إيش رأيكم تسوو قسم في النص بينهم؟

--

عارف إني طولت وقلت تفاصيل التفاصيل لكن قلت إمكن يساعدكم عالجواب أكتر "^^
وإنشالله أنجح في تدريب البغبغانات وبعدها أبدأ أدربهم عالحركات اللي تم شرحها في المنتدى وبعدها أطلب منكم تسوو الحركات اللي ما شرحتوها (مو تنسى يا سكر أمزح إنتا أكيد عندك مشاغل حياتك مو بس المنتدى )


في امان الله ^^

(ما أبغا ردود تقلي إنشالله الأعضاء يفيدوك ومن دي الردود,, لأنو دي الردود أبدا ما تفيد المنتدى ولا تفيد كاتب الموضوع ولا تفيد أي شخص في العالم,, يعني جريمة بحق الإنسانية )