عضو جديد وكاسكو رمادي جديد

[ولد الديره]

السلام عليكم .... وكل عام وأنتم بخير .... منتدى رائع للأمانه تعلمت منه امور كثره من خلال

مشاركات الاعضاء يشكرون سلفا على المعلومات القيمه


شريت كاسكو رمادى صغير بالعمر من اول يوم حمدالله قدرت اخليه يقعد على ايدي

يعنى شي يبشر بالخير حمدالله احاول اصبر عليه علشان يأمن تماما فينى وفي البيت


وانا اكتب لكم المشاركه كنت فاتح باب القفص وطلع منه وصعد فوق القفص لوحده

حدى مبسوط طبعا بس ناطر امسح على راسه وهالشي للحين احسه يخاف مني وانا احب

انه من تلقاء نفسه علما بانه ياخذ الطعام من ايدي بس عدة محاولات

السؤال يا شباب لما طلع الكاسكو لحاله من القفص وبدأ ياكل منى احيانا يعنى هنى الكاسكو

خلاص تأقلم ولا اعطيه مجال اكبر حتى يتأقلم اكثر ويحس بأمان أكثر ؟

ولكم جزيل الشكر .

[fan]

أول شئ اهلا وسهلا فيك في المنتدى معانا
وبعدين ماشاءالله باين أنه ببغاء مدرب وماراح يتعبك انشاءالله
انشاءالله بس شوية وقت وراح يصير اللي تبغيه وتقدر تمسح على راسه
بس يبغيله شوية وقت علشان يطمن عليك أكثر.

[ولد الديره]

مشكور fan على المرور والنصائح بس راح اخليك تعيش معاى التطورات عشان احطك بالصوره

وتفيدنى وتفيد الجميع


بعد ما طلع الكاسكو فوق القفص لوحده عطيته اكل من ايدى واكل ويا خوى عطيته كازو اتصور

عجبه كيف عليه وشوى شوى صعد على ايدى بس ما يطول ينزل بسرعه وانا مخليه على كيفه


يصعد وينزل استمر الوضع 15 دقيقه فجأه زارنى صديق وحبيت أخلى الكاسكو بمكانه خفت

يخترع من صديقى قلت ارجعه للقفص وقدرت ارجعه للقفص صعد على ايدى ودخلته القفص بس

حسيت انه زعل منى لما رجعته للقفص اعطيه اكل ما ياخذ ورد يجعر على الخفيف خليته شوى

وديت له بعد زعلان الحبيب ففتحت له القفص من فوق وبسرعه طلع وقف فوق القفص واشوفه

يتحرك فوق القفص ويحرك جناحه يعنى ماخذ راحته الكاسكو

ومنتظر الكاسكو يرجع لوحده للقفص عشان اسكر عليه منتظر من نفسه يبادر بالدخول

عشان ما يحس انى احبسه

شرايك تتوقع يرجع منطقيا اقول يرجع اذا جاع ؟ وشرايك انى ابيه هو من نفسه يرجع للقفص ؟

فيدنى ولد العم ومشكور

[كاسكو البحرين]

السلام عليكم ورحمة الله

ما شاء الله أخوي FaN

ماقصر ولا خله لنا شي نقوله كفا و وفا بالموضوع ولي كلمة أحببت اشارك فيها

انا بصراحه استغربت من الموضوع ونفس الوقت فرحان لانه اذا طير غير أليف وخاصة الكاسكو صعبة ان يكون من اول يوم يجي على اليد فاعتقد ولله الحمد طيرك مدرب مما سيسهل عليك امور كثيرة ومنها فترة الترويض العويصة

الكلام اللي ذكرتة عن الطير أخي ولد الديرة مميزاتة جداً عاليه وخصوصاً هذه الامور تحصل في اول يوم

جوف اخوي الحين انت عندك عجينة وراح انت اتقوم بعجن هذه العجينة بتدريبك للطير وبكلماتك اللي تبي طيرك ينطقها وبالتغريد اللي تحبه

أنصحك أخي انك تاخذ قفص من فوق يفتح الباب (في حال ماعندك ستاند طبعاً)
وايضاً حاول بإكثار اطعام الطير بيدك
ونقطة المسح على الرأس لاتستعجل على هذه النقطة لانها احسها اصعب نقطة بتكون

وإن استدعى الأمر الى رفق صور للقفص او لستاند اذا مو واضح عندك كلامي راح نخلي لك صور ان شاء الله

تقبل مني خالص التحية والإحترام

[ولد الديره]

فديت البحرين وكاسكو البحرين تسلم ولد العم على المشاركه

للتوضيح الكاسكو عندى من أسبوعين مو أكثر وهو صغير بالعمر خلال الاسبوعين دلعته على كيفك

ويوميا احط له الاكل بنفسي واكلمه واقوله يالله اتمنى ينطقها اول شى هى ( يالله ) باستمرار

خلال تنظيف القفص وخلال اعطائه الأكل وطبعا وقتها كان يجعر بس خفيف مو وايد والشي الى

شجعنى ان اول يوم واول مره شفت الكاسكو عند صديق طلعه من القفص على يده وقال لى

تعال حط ايدك راح يصعد وحمدالله صعد من اول مقابله بينا لمده بسيطه ونزل ومن بعد ما اخذته

للبيت شريت له قفص الى يفتح من فوق وقمت اهتم فيه شوى شوى وبديت افتح له الباب واليوم

بروحه طلع فوق القفص وقمت اوكله من ايدى اخذ ياكل وانبسطت طبعا خبرك شعور واحد حاب

يروض الكاسكو خليته مده طويله بس مارجع القفص لوحده صعد على ايدى ودخلته بس على

مزاجه يعنى اول مره من حس انه بيدش القفص غير حركته ورد فوق القفص خليته براحته

ورجعت عقب فتره وحمدالله صعد على يدى اكثر من مره ودش القفص وهو مبسوط بس للحين

ما قدرت امسح على راسه احسه خايف وانا منتظر ومطول بالى والبركه بالنصائح الى ناخذها

منك ومن الاخوه الاعضاء وناوى بكره اكرر نفس الحركه واطلعه من القفص اخليه يحس بامان

والشي الى سعدنى اليوم ان لما كان فوق القفص العيال كيفو عليه وهو كان بعد عادى ماخاف

منهم وجلسنا قريب منه لمده طويله وهم كان عندى وخليت العيال يشوفونى وانا اصعده على

ايدي يعنى قوى وصعد ونزل وصعد يعنى حمدالله بس للحين ما نطق ولا كلمه بس يصفر

جم صفاره وقليل يصفر مو وايد .

طولت عليك ولد العم بس انت عارف احساسى وشعورى حدى مكيف من الكاسكو

مشكور كاسكو البحرين ومشكور fan وطبعا بانتظار تعليقكم ورأيكم للأستفاده ومشكورين

[المميز1000000]

اهلا وسهلا
والاخوان ما قصرو

[Mr. MeMo]

اخي ولد الديره


ما شاء باين انه طير شبه اليف و سوف تسعد به ان شاء الله

و عليك بالصبر وان شاء سوف يتكلم و يتعلم كل ما تريد
فلا تستعجل الامور

و اليك هذه المعلومه

جميع انواع الببغاوات سوف تصعد الي اعلي نقطه يستطيع
التسلق اليها ما امكن فهم يفضلون المكوث في الاماكن العاليه
و تشعرهم بالامان و هذا هو سبب صعود ببغائك الي اعلي القفص

و ايضا لدي شعور بأنك قد وضعت القفص علي الارض!!!!
فأن كان ذلك صحيح فيجب رفعه من علي الارض و وضعه بمكان
اعلي بحيث يصبح الطائر علي مستوي يوازي وقوفك

و انظر الي صور هذه الاقفاص و ما هو مستوي ارتفاعها عن الارض
لكي تتضح الصوره اكثر

[كاسكو البحرين]

هلا بيك ولد الديرة

والله إحنا المبسوطين لانك انت مبسوط نعم كما قالوا العلماء والخبراء إن الطيور والحيوانات الأليفة تبث في الانسان الفرحة والسرور وهذه اشيااء نلتمسها عن تجربة

ولد الديرة عليك بتحاشي الاستعجال اسبوعين يعني مو كفاية للطير عشان يتأقلم على المكان وعلى عليك بس طيرك مثل ما قلت لك مميزاتة ممتازة فلا تستعجل عليه فعليك بالصبر فالصبر مفتاح الفرج

وركز على نقطة الاستاذ MR.MEMO ترى مهمة للطير ان يكون ارتفاع القفص مترين او مترين ونص والصور بينت لك و واضحه اللي ارفقهم الاستاذ MR.MEMO

فالمغزى من ارتفاع القفص عن الارض هو : إحساس الطير بالأمان عشان هو اللي يشاهد اللي حواليه من فوق لانه اذا كان تحت وانت فوق يضايق خله فوق عشان يحس بالأمان


وأخيراً فديت ديرتك انت بعد مثل ما فديت البحرين وكلنا نفدي ديار البعض ان شاء الله وتمنى لك كل خير وحياة سعيدة


تحياتي للجميع


كاسكو البحرين

[ولد الديره]

كل الشكر لكم جميعا mr-memo والمميز وكاسكو البحرين مشكورين على المرور

وعلى النصائح وعلى السايت والصور حقيقه انا تثقفت حيل بالكاسكو من دخلت المنتدى

ماشاءالله عليكم صج دكاتره وانا معلوماتى بسيطه بس صارت اكثر


بالنسبه للقفص انا يا جماعه معلقه بالصاله على مستوى مترين بس وايد انزل على الارض

واشوف الكاسكو عادى يعنى تاقلم على الوضع يصعد وينزل وهاذا شى يسعدنى

مستقبلا لما ينطق باذن الله راح اشترى له قفص اكبر اكشخه يعنى

حقيقه ادمان الكاسكو مخلى شغلى ومجابل الكاسكو بس متعه لما احس انه بدأ يرتاح

وراح اكون معاكم اول باول وانا ناطر بس ينطق اى كلمه علما بانى اردد عليه كلمة ( يالله )

يوميا باستمرار بس للحين ما نطق وربك كريم ومشكورين على جهودكم مع كل الاعضاء

تحيه من الكويت وشعب الكويت ومطيرجية الكويت وهواة الطيور الى اجمل ناس وارقى منتدى