قصتي مع طائري الجميل روميو

[سوالف رحلتي]

كان الكاسكو مالي "روميو " ليس كأي كاسكو ، لم يكن طائرا عاديا بل كان صديق صغير ، طفلي

وحبيب قلبي ، ولكنه رحل وتركني وحيده اعاني غيابه ..


اشتريته من شهر بالضبط من سوق الشارجه وكان محجل بحجل فضي ،وانتقيته انه صغير وعمره

تقريبا 4 شهور ، كان شقي ويتحرك كثير فقلت هذا هو ..


ومن بعد ماحطيته في البيت عندي ، كل يوم اجلس معاه واسولف له ويسمعني ويتصدد كان يجعر

في البدايه وبعدين بسرعه تأقلم عليه وكان لما يشوفني يدور في القفص عشان اطلعه منه


كان يرفس بريوله في القفص تحت اروح يمين اييني يمين اروح يسار اييني يسار لين مااطلعه

كان يوقف فوق على القفص ويوم يحيدني غافله عنه يطير في الصاله ويمشيء


كان يلحقني من غرفه لغرفه من مكان الى مكان وان شافني جالسه في مكان كان اييني وينخش

تحت ملابسي .

كنت امسكه عادي ..امسح راسه عادي ، امسك منقاره عادي ..ولكنه لم يكن عاديا بل كان طائرا مميزا


وكان يعاني من الاسهال ولكني لم انتبه له ولكن كان بكامل حيويته ونشاطه ..


كان لما يشوفني لابسه العباه ..يعرف اني بظهر من البيت يرفس ولما اجيب له سله صغيره يعرف


اني سأخذه معي في السياره ، وكنت يوميا الصبح اخذه اوديه بيت امي لاني ساكنه في شقه

واخاف يكتئب

سبحان الله من يشوفها على طول يصعد السله ..


رحت العمره 3 ايام وتركته عند امي ـ ولما شافني طار من القفص وياء عليه بالرغم من ان جنحانه مقصوصه بس

كنت اشعر بحبه لي وبصدقه ..لا اعرف مالذي ربطني به

فجاه انتكست حالته ، وتم يجابل الجدار ، لا ياكل ابدا ..اسهال اخضر مع ابيض


واخذته الى البيطري في سوق الشارجه - الجوارح


عطوني دواء احطه في السيريلاك بالرغم من ان قبل كان ياكل دوار الشمس فقط


وتميت اعطيه الدواء واعطيه انتسكت حالته اكثر


ياه شلل في رجل وحده وكان يقاوم ويحاول يركب السله مالته

بس تخور قواه ..وعقب رجله الثانيه وكان لما يشوفني يزحف على بطنه وبمنقاره يمسك ملابسي

كنت اتعذب واتالم وانا اشوفه يعاني ..

صدقوني مااكذب عليكم ..كنت قبل لا يمرض لما اناديه باسمه روميو يرد ..بتصفيريه طفوليه

حتى الخدم ينادونه يرد


سبحان الله ماعاش ربي خذه وهو اخذ روحي معاه ورحل

وكل يوم ابكي على فراقه لما اشوف صوره والفيديو ولا استطيع نسيانه

ارجوكم افيدوني ماسبب مرضه ؟

كيف اعرف ان الطائر مريض ؟

هل اشتري طائر اخر ولا انسى الموضوع ؟

ماهي مواصفات الطائر الغير مريض ؟


زعلي عليه مش المبلغ اللي دفعته ، زعلي على روحه التى تركتني ..


تحياتي سوالف رحلتي