[مجنون الامازون]

السلام عليكم ورحمة الله وبركاته

اعزائي اعضاء منتدانا الرائع .. تعددت الاسئلة والطرق .. وكثرت المناقشات .. وجاءت الردود .. على كيفية ترويض الببغاء .. ها انا جربت طريقة جميلة اثمرت لله الحمد .. وسوف ترون نتائجها بأعينكم ..


طبعا في الاول .. ليش الببغاء يكون شرس حتى لو كان محجل ؟؟ طبعا المصيود شئ طبيعا انو حيكون خايف من البشر بسبب الطريقة الوحشية في اصطياده .. ولكن المحجل يمر بظروف لو مرينا بيها نحن بني البشر لتصرفنا مثلهم واكثر .. طبعا ظروف الشحن وكيفية تجميعهم في الجمارك وقبل هذا و ذاك طريقة تطعيمهم ضد الفايروسات .. وبعد هذا كله ما تبغونه يدافع عن نفسه؟؟ حرام والله .. واستغرب من الناس الي تبغى تشتري طير وتبغى يكون اليف في يوم وليلة او في غضون ايام معدودة .. ويبغى يطلع على اليد .... الخ.


انا عارف اني كثرت كلام .. بس والله عشان امهد للهواة ان تربية الببغاء تحتاج لصبر .. والطرق المستخدمة اغلبها طرق (تجارية) بحتة يستخدمها التجار ولا يعرفوا انها ما راح تنفع على المدى البعيد .. وللاسف يستخدمها الهواة وما تنفع معهم .. واذا نفعت فإنها لا تدووووووم. مثل الرش بالماء .. التجويع .. الخ

طبعا الطريقة هي كالتالي:

- خلي بالك طووووووووووووووووووووووووووووووووويل (هذا اهم شئ).

- اذا اشتريت الببغاء حاول انك تسيبه في مكان هادئ بدون ما تزعجه او تطلعه او حتى تحاول تلمسه لمدة 4 الى 5 ايام.

- في هذه الفترة حاول انك تحط الاكل في الوعاء المخصص للطائر (مو تأكله من يدك) وتغيرله الموية وتنظف القفص .. وتكتفي فقط بالنظر اليه وبكل ثقة.

- بعد مضي هذه الفترة .. تفتح باب القفص للطير ((فقط)) وتخلي الباقي عليه .. هو يخرج من نفسه ويطلع على السقف .. خليه يسمعك وانت تتكلم ولا تحاول تسوي حركات فجائية لانه راح يخاف ويسترجع الذكريات الاليمة الي قضاها في الجمارك .. استمر بهذه الطريقة ايضا لمدة لا تقل عن خمس ايام ..

- راح تشوف انو الطير ارتاح للمكان واول ما يشوفك راح يتحرك ويلفت انتباهك عشان تفك باب القفص ..

- تخليه يطلع على القفص وتحاول تشيله (بعصا الاستاند) او (تفك سقف القفص) وتبعده عن القفص .. وتنزله على الارض بهدوء .. ((طبيعي)) راح يدور على زاوية عشان يحتمي بها لكن بكل هدوء وثقة قرب يدك من رجله وقول (تعال) راح تلاحظ انو خايف ويمكن يحاول ((يعض)) .. عااادي .. طول بالك .. وحاول تكرر العملية مرتين الى ثلاثة يوميا لمدة خمس ايام ايضا .. وراح تشوف الفرق ..

* ملاحظة: اذا حاول يعضك لا تخاف حاول تتفادى العضة بذكاء لانه اذا خفت راح يفرض سيطرته عليك وراح تتعب معاه.

- اذا تم بحمد الله وطلع على ايدك حاول تنقله من ايدك اليمين الى ايدك اليسار وتكرر كلمة (تعال) والغرض من ذلك هو ان يتعلم الطير انك ما تبغى تأذيه وانو كلمة (تعال) معناها اطلع على اليد لا اكثر .. كذا راح يكتسب الثقة.

- حاول تمسح على جسم الببغاء وهو على ايدك .. الين ما يتعود عليها ويحفظ ريحتها.

- طبعا الين دحين كملنا 15 يوم تدريب واذا كان الطير عنيد رح تأخذ العملية من 20 الى 28 يوم انا عارف انها طويلة .. وعشان كذا قلت في البداية يبغالها طولة بال .. بس صدقوني انها راح تنفعكم على المدى البعيد وراح يصير الطير اليف جدا .. واعتقد انو ((شهر)) لتعديل سلوكيات ببغاء مظطرب وزعلان تعتبر حلوة ..


طبعا الكل يبغى يشوف النتائج اخليكم معها .. قولوا ما شاء الله ..

- هذه صور اول ما يطلع على القفص.











- هذه طريقة وضع اليد بدون ما تشيلها اذا حاول يعض.













- طريقة التمسيد على الرأس تحت الجناح.










.


- بعد كذا تقدر تسوي مع الطير كل شئ زي :






















وهذا المقطع سجلته بعد مرور 17 يوم بالتحديد من شراء الطائر ..