وعليكم السلام...اهلا بيكي وبليلي ..ماشاء الله تجنن
واضح انك مربية ممتازة ..انا كنت مبسوطة وانا اقرأ كلامك ورجعت قرأته كذا مره
شوفي...ابعدي عن المعلبات نهائيا مهما قالولك فيتامينات ومدري ايش انسي...كلها سمووم
ولو ادمن عليها القطوة راح تتعب وتتعبين معها (تذكرت معاناتي الله لايعيد هذيك الأيام)
خليكي عالدجاج المسلوق لأنه القطط بطبيعتها حيوانات لاحمة يعني تاكل لحوم في كل وجباتها
مافي مشكلة ...بس زيدي شوي خضار للمرق وانتي تسلقي (قطعة جزر صغيرة وكوسة شوي
واهرسيهم مع المرق وقطعي الدجاج معهم ...او ممكن الدجاج مع الشوفان
تقدرين تخترعين اكلات كثيرة اساسها الدجاج المسلوق مع اظافات
عطيها سيريلاك مرتين في الاسبوع بس لو لاحظتي اسهال او امساك وقفيه
الحليب ممنوع الا لو كان خالي من اللاكتوز والحديد
البهارات ممنوع بكل انواعها....الملح ذرة بسيطة ولو انه ماله داعي ابدا بس البعض يقولون
ممكن تحطين بين فترة وفترة علشان الصوديوم في جسمه (ولو قدرتي تعدي كم حبة ملح عدي)
كثرته مضرة لهم
الدراي فود المناسب لسنها كويس بسسسس لاتعتمدي عليه وعطيها بمقدار ملعقتين في اليوم
لأنه يسبب امساك واحتباس للبول وكله كربوهيدرات ممكن مع الوقت تسبب السكر اللي يسبب العمى
القطط يحبونه وهو مفيد بس لا تكثري واعتبريه فيتامينات
ومش شرط تطريه لها بالعكس راح تقوى اسنانها
الشوفان ممتاز (هو الكويكر)وممكن تاكله زي ماهو وممكن تطبخيه مع مرقة دجاج (المويه اللي
تسلقين فيها مش ماجي )
راح يعجبها او اظيفيه مع الزبادي بس لا تكثري مرره
الجبن المثلثات كويس بس يوم اي يوم لا وتدريجيا لحد مايصير مرتين في الاسبوع لانه ممكن يسبب اسهال اذا كثرتيه
الدجاج الني ما احبذه يقولون ممكن يخلي القطة تتوحشن وكمان ممكن ينقل لها امراض
وفي فرق بين اللحوم النية وحمية اللحوم النية....اقرأي عنها لو حابة تتبعي معها حمية اللحم النيء
القشور اذا ناشفة ومتكتلة ممكن بموية دافية افركي المكان وبتروح انشااء الله
لو الجو غبار والحوش تراب الأفضل ماتطلعيها لأنها لسه ما اخذت كل التطعيمات ومناعتها ضعيفة
انا شخصيا ما احب اطلعهم الحوش اخاف من الجراثيم اللي تعلق بإيدهم ويلحسوها او ممكن تسبب ديدان ....القفص فكرة حلوة بس مدة عشر دقايق ...بس في هالجو البارد لاتطلعيها من البيت ابد ودفيها قد ماتقدري عشان ماتمرض وتزكم
لو مصرة تعطيها حليب ابقار مع انه مضر جدا لها ويسبب اسهال وتلبك معوي فالافضل يكون مره كل اسبوع او عشر ايام وتخففيه بماء ولو لاحظتي اسهال امنعيه فورا اساسا مش مهم بعد الفطام تشرب حليب
بخاخ البراغيث مش مهم و لو كان فيها حشرات اكتفي باستعمال الريفلوشن (قطرات عالظهر)
معجون الاسنان مش من الحين انتظري لحد مايصير عمرها 6 شهور وابدأي استعمليه لو شفتي تصبغات في اسنانها(لازم معجون انزيمي خاص بالقطط )لانها راح تبلعه ومعجون الاطفال ممنووووع
الكات نيب تستعمليه لو تبغي تسيطري على سلوك معين زي النوم في سريرها او تجذبيها للوح الخدش علشان ماتشمخ الاثاث ....انا انصحك تحطين اعمدة خدش او الواح خدش (لها عدة اشكال) علشان القطة راح تبدأ تسن اظافرها في اي شي قدامها بس لو عودتيها عالمكان الصحيح راح تستعمله...واشتري مقص اظافر وحاولي تعوديها من الحين انك تقصينها( وانتبهي وانتي تقصي لأن في حد لو تعديتيه راح تنزف ) ابحث عن طريقة القص وراح تفهمي قصدي
لو ما تعودت تقصين اظافرها راح تتعبك لما تكبر وترفض حتى لو وديتيها البيطري وبتكون عملية متعبة فقصيلها في البيت من الحين افضل
محلول الأذن ما اعرف ايش فايدته هل هو علاج او وقاية!!
اذا اذنها سليمة ماتحتاج منك اي شي وانتبهي من المحاليل لأنها ممنوع تدخل جوا الأذن
اذا حابة تنطفي اذنها في محاليل خاصة تحطيها على قطنه وتمسحي صيوان الاذن او ممكن بيبي اويل وبقطنة تمسحي الاذن بدون مايدخل لجوا طبعا
الفيتامينات ممتازة بس اختاري النوع اللي تحتاجة وابحثي في الموقع عن المواضيع الخاصة فيها
الاستحمام انا ما اشوفه مهم واغلب المربيين المحترفين مايحمموا قططهم اكثر من مره في السنه
او مرتين وعدم تحميمها في الشتاء ابدا
هذا كلام دوكتور بيطري كبير ومهم
ومادام القطة ماتطلع من البيت ولا انكب عليها شي يلزم الاستحمام
ممكن تكتفي بمسح المنطقة المتسخة بفوطة ماء دافي معصورة وتنشفيها على طول
الاستحمام اسبوعيا مبالغ فيه ويسبب مضار للجلد والشعر تساقط بشكل كبير
شامبو الاطفال مش كويس للقطط يسبب تساقط الشعر والبودرة كمان
انتي بس اهتمي بتمشيط شعرها مرتين او ثلاث في الاسبوع حسب طول الشعر
ولو كان يتكتل شعرها بسرعة مشطيها مره كل يوم
مناديل جونسون مش حلوة
فيها كحول ولو لحستها القطة ممكن تأذيها
ريحي نفسك القطة تنظف نفسها بنفسها صدقيني
حبوب الديدان مهمة بصراحة لأن ممكن تصاب بالديدان حتى لو ماتطلع من البيت ولازم تلتزمين بها دوريا زي ماقالك الدكتور ....
انتي مبدأيا ماشية ممتاز وعنايتك فيها سليمة بنسبة 98% استمري
وياليت تقرأي عن تعقيم القطط وفوائده لو حابة قطوتك تعيش بصحة وعمر طويل بإذن الله