[tarek elsayed]

السلام عليكم و رحمه الله و بركاته

ازيكم يا احلي شباب في احلي منتدي ؟؟

باذن الله تكونوا في احسن صحه و حال و سعاده يارب

عايز اتكلم معاكم في موضوع تدريب البادجي .. و نشرح خطوات سهله و بسيطه .. عشان تضيف لقائمه اصدقاءك صديق جديد .. هيكون من اروع الاصدقاء باذن الله




طب تعالوا نشوف هنعمل ايه

في البدايه باذن الله

انت هتحصل علي الطائر في عمر شهر او شهر و نصف

ممكن تشتريه او يكون فرخ من زوج شغال عندك او من احد الاصدقاء

اختار اللون و النوع المفضل ليك الالوان كلها متاحه ادامك




هتجيب قفص للطائر و هيكون الطائر فيه لوحده

بعد ما الطائر يتعود علي المكان المحيط بيه .. و الخوف يقل عنده

هتبدا اول خطوه

في البدايه احنا عايزين الطائر يتعود عليك و مش يخاف منك

عشان كده هنجوع الطائر

وبعد كده هتدخل ايدك للطائر و فيها اكل طبعا .. واحده واحده كده .. هتلاقي الطائر بيقرب من ايدك و بياكل منها

استمر علي الموضوع ده لفتره

تاكله حبوب او فواكه او خضروات

تجنب اي حركات مفاجئه ممكن الطائر يفزع منها .. او تجنب الصوت العالي عشان الطائر يكون مطمن ليك علي طول




دلوقتي الطائر بقي مطمن ليك و بياكل من ايدك و بيقف عليها

هنبدا تاني خطوه




هتدخل اوضتك .. و تاخد معاك صاحبك الجديد ..هتقفل عليك باب الاوضه
وهتطلع الطائر خارج القفص

قبلها هتجوع الطائر

وهتفتح باب القفص امامه و تحط ايديك برا القفص و فيها الاكل ( حاول تختار الطعام المفضل ليه )

الطائر واحده واحده هيبدا يخرج برا القفص و يجي علي ايديك

هو في السن ده مش هيكون بيعرف يطير اوي

فهتلاقيه بعد الاكل يحاول يطير فهيكون متلخبط و قلقان شويه

لكن مع التكرار و الوقت هيتعود علي الموضوع

وهتبدا انت تاخده و توقفه علي كتفك

وتمسح عليه بايدك و تطبط علي راسه و تلعب في ريش راسه زي القطط كده

طبعا انت مع الوقت و كل ما الطائر يتعود اكتر عليك

تديله مساحه اكبر

يعني لفتره هيكون وجوده خارج القفص مقتصر علي اوضتك بس

لما يتعود علي الجو و يتعود عليك

هتقدر تسيبه يطير بحريه في البيت كله لحد ما هيتعود علي المكان

المواضيع كلها هتتحسن بالتكرار باذن الله

مع الوقت هتقدر انك تسيب قفصه مفتوح دايما و هو يطير في البيت بحريه و يرجع قفصه وقت ما يحب


طبعا يا جماعه هناخد بالنا من سلامه الطائر :-
خد بالك من المرواح
القطط
اي مصدر للنيران او اللهب زي البوتاجاز مثلا
تاكد من اغلاق النوافذ حتي لا يطير الطائر
كمان اتاكد ان النوافذ الزجاج تكون متغطيه بستاير مثلا .. لان الطائر هيروحلها كمصدر ضوء .. من غير ما ياخد باله من الزجاج فيصدم بها

يرجي العلم ان هذا الموضوع منقول واتمني ان ينال اعجابك