الله الله ..
مشكورين على إمتاعنا بتحفكم ..
سواءً كانت قصيرة أو طويلة..
وتسلمون كلكم عالمشاركات الروعة،
من قصيدة مستر لايون..و إلى آخر قصيدة 
..
---
وهذه الأبيات سمعتها مُنشدة، وحسيتها مؤثرة مرررة..
فـحبيت أنقلها لكم..
يا يمه مِنتِهي جِيتِـك وطالِـب مِنِـك الغفـران
أقبّـل قاعـة أقدامـك وأغسلـّهـا بدمعـاتـي
يـا يمـه كـل ما فينـي يناديني: أنـا ندمـان
طلبتِك قولي: سامحتَـك. و ردِّي لوجهـي بسماتـي
أنا أدري قلبِِك الطيب كسرتَه بصدمـة النِكـران
غلطت وغلطتـي هـذي تعيِّـر كـل غلطاتـي
***
تشوفي الشيب يا يمه ترى ما جا وأنـا فرحـان
وربِّي إللّـي رفـع ذاتـك ونـزلّ للـردى ذاتـي
فقدت الراحة من بعدك .. فقدت الطيبة والتحنـان
بدونك راحتـي غايـة بيدينـك هـذي راحاتـي
أنا بعدك ولا حاجه أنا بعـدك تـرى عَميَـان
أشوف ولا أشوف إلي يورينـي مساواتـي
أنا وسِيد الشِقا والهم.. من بعدِك غَدِينـا إخوان
يجيب هموم هـا العالـم ويرميهـا بمتاهتـي
***
صدقتي يوم قلتي لي :تدين اليـوم بـس تنـدان
رميتِك فـي بدياتـي .. رمونـي فـي نهاياتـي
أنا من شالك بـإيـده .. رمـاكِ بأسفل البركـان
نخيتينـي وطلبتينـي ..ولا حصلتـي نخـواتـي
مثل ماهِنتِي بعيوني عليهـم قلبـي يمـه هـان
رموني وطعتهم فزعه وأنا الدمعـات فزعاتـي
يايمـه لا تظنينـي أنـا مـن فعلهـم زعـلان
سوات(ن) فيـكِ سويتـه وسـوو فينـي اسواتـي
***
يـا يمـه يالله ضمينـي ودفينـي بهالأحضـان
أنا ادري فيكِ مشتـاقة وهمِـك بـس ملاقاتـي
يا يمه حيل ضمينـي أبــي أرتـاح أنـا تعبـان
تعبت اهرب من ذنوبي أبـيك آخـر مسافاتـي
ابسمع منكِ أي كلمة.. لصوتك مسمعـي ولهـان
ابسمع يمـه بصوتـك أبذكر فيه نشواتـي
أشوفك ساكتة يمـه..! غفيتـي ولا أنا غلطـان
غفيتي يا بعد عمري تعبتـي مـن مواساتـي؟
***
يا يمه طالبك قومي إذا لي في عيونك شـان
أشوف الموت بعيونك.. عساها تخيـب هقواتـي
تعالوا يا بشر شوفوا أنـا محتـار أنـا تلفـان
أنا أمي مدري وش فيها أنا مدري أنا احاتـي
***
شنـو أُمي أنا ماتـت!! لااا لا لا تـرى غلطـان
أنا أمي مـا تخلينـي علـى حزنـي و وناتـي
أنا أمي قلبها طيـب ولا يمكـن تبكِّـي إنسان
أنا أُمـي مـا تبكينـي ولا تتمنّـا آهـاتـي
يا يمه صح ما مِتي ؟ وصح الموت لا ما حـان
إذا مِتي أنـا بعـدك أبقضـى ويـن ساعاتـي ؟
يا يمه قومي يا يمه وقولي: المـوت لا ماكـان
أنا جيتِـك وأنـا نـاوي أببدا فيـكِ جنـَّـاتـِي
***
أنا الجاني وأنا المجني وأنا المخطي وأنا الندمان
أنـا بيـدي رميتـك.. إيـه.. وبعثرتـه ملفـاتـي
وجيت من الهنا مِفلس وقلبي من الضنا خسران
تركتينـي علـى نـاري ..اعـدد فيـكِ زلاتــي
ولاني مرضي(ن) ربـي ولانـي تابـع الشيطـان
أنـا بعـدِك تـرى مابيـن نهاياتـي وبداياتـي
***
يا يمه منتهي جيتـك وكـلِّي مرتجـي غُفـران
وشفت الناس تلعنـّني ..تحذرنـي مـن الآتـي
وسلامتكم..
الله يرزقنا البر بأُمهاتنا،
ويحفظ لنا من كانت على قيد الحياة ،
و يرحم من ماتت منهن.