[الدلع]

حياكِ الله

الله يعين أجل السالفة فيها توزي وخشخشة
بالنسبة لي .. ما في أحسن من الوضوح والصراحة حتى تكتمل فرحتي بوجود البسة .
وش الفايدة مستانسة بها وفي نفس الوقت مرعوبة من ان احد يكتشف وجودها
والله ما يرضينا يجيك انتِ واخوك أي ضرر بسبب ذا البسس حتى لو كنتم تحبونها وما ألومكم تراهم ينحبون ويستاهلون ذا الحب
أنا جبت بستين للبيت مع معارضة الوالد لكن الجميع كانوا في صفي وفي مقدمتهم الوالدة وخوفه كان من انهم يوصخون ويعدمون البيت لكن لما شاف ان الشي الي كان يخاف منه مو موجود واني وباقي الاهل مستانسين بهم ومسوين جو رضى بالأمر الواقع يعني حصّلت رضى الجميع فما صار عندي رعب وصرت مرتاحة وما دام ما معكم إشارة خضراء من الوالدين فأنا ما أأيد تدخلونها للبيت إلا بعد ما تاخذون موافقتهم قبل اي أحد ثاني و مع ان رأيي ممكن يزعجكم لكن أبغى مصلحتكم وأنا مع الآختين شاهستا وغيابك طول علي يا سحر في توفير الأكل والمكان الدافي لكن من بعيد يعني تربية من دون علم الاهل ما أنصح فيها وأيضا مع الاخت ludta في ضرورة الجلوس مع الأهل وخصوصا الوالدين وشرح وجهة نظركم مع تقديم التعهدات على النظافة وغيرها اذا لزم الأمر .
شوفي أبيك تجلسين مع نفسك وتفكرين قبل ما تدخلينها اذا اخذنا بعين الاعتبار انك عزمتي من دون رضى الجميع على تدخيل البسة للبيت يا ترا هل عندك استعداد مادي للرمل لأنه مو معقولة تقعد في السطح من دون رمل ولو افترضنا جبتِ رمل من الشارع من بيرقيه للسطح أخاف بترقينه بسطل وسلك وصعبة تطلعين انتِ للشارع واخوك هو الي يرفع واعكسي الوضع فياترا بتقدرين ترفعين السطل وتخيلي لو انقطع السلك وطاح السطل على راس واحد منكم أو الأهل بتصير الكارثة ثنتين بسة وإصابة مميته لا سمح الله ( الله يحفظكم جميع لكن ابغاك تتخيلين فقط ) أو انكم مثلا بتدخلون الرمل بعد ما ينومون الناس ( متشائمة لكن الحقيقة كل شي وارد حدوثه وما تدرين وش مكتوب في الغيب )
وشي أهم من كل الي فات وهو ان البسس الي توخذ مباشرة من الشوارع تكون وسخة جدا وممكن حاملة لأمراض ربما ما تكون ظاهرة للعين المجردة فلا بد من عرضها على البيطري ولا تنسين انها تتغذى على اشياء ثانية يعني هذي قمة المخاطرة بصحتكم وصحة الأهل
فيه ناس تربي بسس بلدي تطلع الشارع وتدخل وموفرة لها الاكل والشرب بشكل متواصل ويومي وتعالجها لو لاحظت عليها اي شي وممكن تعرضها على البيطري عند الضرورة فهل عندكم استعداد مادي ومقدرة بدنية للعناية الصحية بالبسة ولا أعتقد انك بتسامحين نفسك لو مرضت البسة ولا قدرتِ تعالجينها وماتت بين يديك وايضا لما تجي فترة التزاوج وأصلا طبيعة البسس ما تحب أحد يحبسها فما بالك لو مروا بذا الفترة أكيد بينتهزون الفرصة وينحاشون وهذا شي مفروغ منه فبتموتون حسرة وتبدون تدورون بسة ثانية .
وتخيلي معي لو حملت البسة من بيرعى بزورتها لو انحاشت أو ما رضت ترضعهم أو مرضوا
>>>>>> ادري عقدتها لكن فكري قبل ما تقدمين على اي خطوة والمثل يقول ( قوس قبل ما تغوص ) و ( الباب الي يجيك منه الريح سده واستريح ) .
والله تربية البسس مسئولية كبيرة ما يعلم فيها الا من جربها
بصراحة وضعكم غير مؤهل لإدخال بسة بطريقة الخش والدس لأن ذا الموضوع له عواقبه الوخيمة مع الاهل وربما الحرمان الحقيقي من التعامل مع أي بسة ولو من بعيد
باختصار خذي الاذن من الوالدين وتأكدي ان كل أمر عسير بعد موافقتهم بيصير يسير وبترتاحين آخر راحة وبتسعدين مع الزائرة الجديدة والي بتكون فرد من افراد العائلة بإذن الله .
موفقة حبيبتي وان شاء الله يرضون الأهل وتجيبينها وتفرحينا معك وتسمينها وتحطين صورها في المنتدى