وعليكم السلام ورحمة الله وبركاته
بص يا جميل القطط الصغيرة لما بتوصل شهر المفروض ان المربي يأكلهم جنب الرضاعة جبنة مثلثات او اي نوع جبنة وخضار (مع اني مش مع تقديم الخضار للقطط) وممكن سريلاك بحيث نخفف الحمل من على الأم شوية في الرضاعة وشوية شوية نحاول ندوقهم اللحوم ونزودها لحد ما يوصلوا لسن الفطام اللي هو شهرين
يعني انت ممكن تأكلهم جبن وسريلاك وخضار لو حبيت وبيض وشوية شوية تزود اللحوم
بالنسبة لليتر بوكس بقى الليتر بيتغير على حسب النوع هو لو معطر يتغير لما مفعوله ينتهي والرائحة تظهر ولو رمل طبي او كريستال يتغير لما يدوب ويبقى في رائحة ففي ليتر بيقعد اسبوعين وفي ليتر بيقعد اسبوع او اكتر على حسب النوع
اما البراغيث فالقطة بتهرش شوية في ودنها ودقنها لما يبقى عندها براغيث وكمان بتلاحظ وجود ذرات سودة منتشرة كتيرة جداً في شعر القطة وخصوصاً في منطقة العنق ودي بويضات البراغيث وفضلاته
علاج البراغيث في نوعين ريفوليوشن امريكي وبارس روسي هي امبولات بتفك الأمبول وتحط النقط على رقبة القطة وهي بتنتشر لوحدها في الشعر كله بس احذرك من بارس لأنه سام الأفضل ريفوليوشن مش سام حتى لو لعقته القطة مش هيعملها حاجة والامبولات دي موجودة في محلات الحيوانات الأليفة والصيدليات البيطرية
نيجي بقى للفيتامينات عندك في فيتامين B المركب وفي فيتامين C الفوار والتاني ده كويس قوي للبرد وممكن تديه للقطط ربع قرص للقطط كل اسبوع كوقاية من البرد في الشتا لكن الأفضل انك تستشير بيطري قبل استخدام الفيتامينات دي
فيتامينات الشعر معنديش فكرة بصراحة بس صفار البيض هو احسن فيتامين طبيعي لجلد وشعر القطط لو كلته نيء أو مسلوق الصفار بس مرتين في الأسبوع حلو قوي وفيه نوع من فيتامين B اسمه بيوتين وفيه دهون وكاليسوم وبيخلي جلد القطة صحي وشعرها ناعم ولامع
القطة لما تولد محتاجة أكل صحي لحوم ومنتجات ألبان ويكون غني بالدهون عشان تعوض اللبن اللي بترضعه للكيتنز مقصدش يبقى فيه دهن كتير طبعاً لكن الطعام فيه دهون زي الفراخ والجبنة
اتمنى اكون فدتك واي استفسار تاني في الخدمة