بسم الله الرحمن الرحيم
السلام عليكم ورحمه الله وبركاته
وكل عام وانتم بخير اعاده الله علينا بالبركات
موضوع من زمان نفسي اكتبه ولكن كان يحتاج وقت طويل ..
كنت احاول بقدر المستطاع من الوصول الى الطير المناسب من تقريبا 4 سنوات
امتلكت من خلالها عدد من الببغاوات:
الافريقي تقريبا 5 او 6
المكاو عدد 2
البلوفرونتد عدد 3
اليلوناب عدد 2
الدبل يلو هيد عدد 2
وبعد تربيه دامت عده سنوات اطرح لكم الخلاصه
آولا : الافريقي لا انكر انه طائر رائع ومن اجمل ماربيت ولكن عيوبه حساس جدا جدا ومعرض للمرض بكثره و نسبه الذكاء صح عاليه ولكن نادره يعني من ال 6 الي ربيتهم واحد فقط كان مستواه عالي ام البقيه اقل من العادي .. شكله ممل وترديده للجمل نادر جدا جدا
ثانيا : المكاو بلو اند قولد اذكى ببغاوات على المستوى العام ومرحهه جدا ولعبوبه ..مستواها في الكلام ضعيف ولكن روحها الفكاهيه تغنيك .. وشكلها الجميل ..كل ما تنظر اليها لسانك يردد سبحان الخالق ..عيوبها اذا عودتها على اللعب والمرح اياك واياك ان تنساها لانها ستصبح مزعجه ومن الطيور التي تحس فيها لما تكون طفشانه تعرف تعبر عن الفرح والطفش والحزن فعلا ذكاء خارق
ثالثا :البلوفرونتد طائر رائع وحيوي ونشط ولكن في كل 100 حبه تلاقي 2 او 3 مستوى عالي والبقيه اقل من التوسط يعني يا يجيك آغبى وامل واشرس طائر في الوجود ام العكس تماما تماما ...ممتاز في الكلام ولكن صوته غير واضح ..ومزاجي درجه اولى ..شكله عندما ينفش ريشه آعجوبه
رابعا : اليلوناب مصنف في الخليج رقم واحد ولكن في الحقيقه عالميا هو رقم 2 ولكن اهل الخليج اشتهر بينهم فاصبح المميز لديهم .. طائر جميل وممتاز في الكلام وذكي وغيرها من المميزات الكثيره....عيوبه شكله ممل للغايه كانك حابس عجوز في قفص ومزاجي بدرجه تقهر ممكن يجلس 5 ايام يتكلم كلام مستمر مايسكت فجآه يسكت اسبوع من غير اي سبب ...طبعه رزين تقول ابن شيخ حركته ثقيله والله العظيم مستفز ههههه تحس انك انت الي شغال عنده
خامسا : العشق الحب الجمال الاناقه المرح خفه الدم الدبل يلو هيد والله العظيم كثير حيقولون ابالغ بس ترى ما ابالغ انا املك الخمسه انواع ولله الحمد ويوجد لي موضوع وانا عارضهم كلهم عشان لايزعل احد مني ..... الدبل يلو هيد مصنف رقم واحد عالميا (آمريكا-كندا-بريطانيا-استراليا- اروبا) مرح وحبوب والله دمه خفيف تحسه فعلا طفل صغير .. شكله كل سنه يحلو اكثر من الي قبلها يعني ماتمل الطير بعد كل سنه يزيد الصفار ويحلو ...يحب راعيه لدرجه الجنون ويعرف ويحس فيك ...والله ياجماعه ماشاء الله تبارك الله اقص اظافره وهو على يدي ولا يسوي شي عارف اني مارح اضره .. مايحفظ اغنيه ويقولها الا ويرقص .. دمه عسل عسل ماينمل منه والله ..العيب الوحيد لما يكون مبسوط وفايق ماشاء الله مايسكت لدرجه الازعاج .. خصوصا لما يكون عندك ضيوف ..احراج نوعا ما
وللتآكد من خفت دمه و حلاوه روحه شوف مقاطع كل هذه الانواع في اليوتيوب (بالانجليزي) وانت قارن بنفسك
ملاحظه هذا موضوع من اجتهادي الشخصي ومن تربيتي الشخصيه لجميع هذه الانواع في نفس الوقت ...رجاء الزعل ممنوع الموضوع كله عباره عن نقاش في نقاش
دمتم بود