[The Cat Whisperer]

فكرة جميلة تسلم ايدك

اعرفكم ببنتي

الاسم: كاطو
العمر: 4 شهور
النوع: أنثى
السلالة: شيرازي مون فيس
اللون: أبيض ولون العينين عسلي
الشخصية: لعوبة وحنونة وصاحبة صاحبها

الصور: المعذرة على رداءة التصوير والإضاءة

ما شاء الله







طبعاً دي الغالية والحب كله عانيت سنة كفاح مرير مع الأهل عشان يقبلوا اني اتبنى قطة

ولما جت الحمد لله حصل بينا حب وارتباط من أول دقيقة لدرجة انها طلعت رائحتها الشخصية عليا ونامت جنبي من أول يوم

القطة عمي جابها هدية من حيث لا أحتسب عشان قطته ولدت ودي كانت كيتين شهرين ونص ومكانوش الجماعة عارفين

في الأول حصلت حملة شعواء مغرضة (واوصاف من دي من هنا للصبح) ضد القطة لأن لهم تجارب سيئة مع القطط

المهم حاولوا يستغلوا اي شيء يحصل عشان تمشي القطة وكنت بتهدد كل شوية هسربها هسربها عقدوني وقلقو راحتي

قلتلهم لو مشيتو القطة هموت وتشبثت بيها بكل استماتة وتكفلت بكل شؤون رعايتها وحليت كل المشاكل وأقنعتهم وزنيت عليهم لحد ما تقبلوها الحمد لله

دلوقت بيغيرو منها لاهتمامي بيها وتوبيخي للأطفال لما يضايقوها وخوفي عليها من المرض

واللعب اللي عملتها لها ومصاريفها ويستغربوا من خبرتي بالقطط ومعاملتي ليها بيقولوا انت دلعتها حاسين اني مديها قيمة زيادة

رغيت كتير معلش ندخل في الموضوع دغري

الأكل المفضل



الدجاج اكثر لحم بتحبه لو حطيتلها عالغدا استحالة تسيب منه نتفة ما شاء الله بعكس اللحم الأحمر



كييفة شيبسي بس انا بأكلهولها Treat وبكميات قليلة عشان الملح والتوابل اللي فيه



نيسلي سيريلاك بالقمح الله يكرمها دلوعة قطوتي قالت انها بتأكله لقططها ودلتني عليه

فجبتهولها بأكلهولها مرتين في الأسبوع بس لأنه معظمه كاربوهيدرات وحبته جداً



صفار البيض النيء عليه شبهات كتيرة خاطئة اطلعت على بحوث علمية ومقالات وتأكدت من أهميته بعكس البياض لا ينصح به نيء

وبحاول ائكلها منه 3 مرات في الأسبوع في وجبة العشاء عشان مفيد جداً وصحي لشعرها وجلدها وللتنويع وما شاء الله بتحبه جداً

البرنامج اليومي:
ويبدأ من 6-7 صباحاً:

الهانم بتصحيني من النوم عايزة تلعب معايا لأنها بتنام جنبي على السرير وأحياناً في نفس الأوضة في مكان تاني

وتبتدي شغل العفرتة والخربشة والعضعضة واجيبلها لعبها تلعب شوية وبعدين اخدها عالمطبخ

افطرها بيضة نيئة او جبنة مثلثات (مع قطع خبز صغيرة) او رومي او فلمنك أو سيريلاك احب انوعلها

وتشرب وبعدين تبتدي الجنونة بتاعتها تجري في البيت زي المجانين كأن حد بيجري وراها أو بتطارد فار

وطبعاً الأمر ميسلمش من شوية دلع ومساج وأحضان وخرخرة مهي الدلوعة ربنا يحميها ويقدرني اسعدها

قبل ما انزل شغلي بعملها شوية صيانة امسحلها عينيها وآذانها واسرح شعرها وبعدين انظف حمامها

وبعدين اسيبها وانزل شغلي مرجعلهاش الا الساعة 9 بالليل تكون والدتي غدتها ودخلت نامت نوم القيلولة العصر

لما اجي من بره بتكون صاحية وبتستقبلني قدام الباب باطبطب وادلع شوية كمان وبعدين اعشيها ونلعب شوية

ممكن بعد ساعتين انشغل عنها باللاب توب والإنترنت وهي تروح تلعب مع الأطفال أو تصطاد شوية أو تجري

وأحياناً تحس بالغيرة من اللاب توب وتيجي تقعد جنبي وميحلاش القعدة الا على الكي باد في اللاب توب

وبالليل انام وتيجي تنونو عالباب افتحلها تنام جنبي على السرير

انتهى البرنامج

على فكرة كل اللي شاركوا قططهم جميلة ما شاء الله