[كاسكو البحرين]

يا هلا اخوي ببغاء اخضر

اولاً حبيبي خذ راحتك بالإسئلة وإن شاء الله إنت الحين تسأل تبي إجابة وبعد فترة تكون عندك خبره وانت اللي راح تجيب على الأسئلة

على العموم

الحلقة ياخوي واللي نطلق عليها (الحجل) بمعنى تحجيل الطيور

اولاً هي الفائدة الأولى يكون منقوش في الحلق هذا تاريخ الفقص و جنس الطير ومكان الفقص

وفي بعض الناس تكتب الإسم والرقم او العنوان عشان لو لاسمح الله طار الطير ويلاقيه ولد حلال مثلك يستطيع يرده ابكل سهوله



حالياً إنت شنو المغزى بالظبط يوم فكرت تركب الحلقه

مثلاً هل كتبت على الحلق عنوانك ؟ او تاريخ الشراء وإسم الطير عشان يكون ذكرى ؟

إحنا كبشر نحب ان تكون الإيدي فاظية بدون اي حلق بس غصبن على الكل يلبس (الدبله) في حال الخطوبة والزواج ، ولكن إنت شوف حالك هل ترتاح وانت لابس الدبله او بدون الدبله ؟

اللهم زوج كل أعزب

عزيزي اللي اريد اوصله لك ان مافي داعي تضايق الطير ولاتخاف هو مو مضر للطير ولا شي مجرد ان راح يتعود عليه وخلاص ، يمكن تشوفة يعضض فيها او يحاول خلعها ولكن مع مرور الأيام ان شاء الله راح يتأقلم مع الحلق لانه شي جديد عليه وعلى رجله

واحب اوضح لك نقطة انك لاتصرف بدون شور البيطري ، إنت قلت إنك دهنت رجل الطير بـــــ(فيكس)
فالأدوية اللي تخص الانسان تختلف غير اللي تخص الطيور والحيوانات ولكن في ادوية مشتركة بين الانسان والطير ولكن كنصيحة لاتتصرف بدون استشارة البيطري لانه يمكن لاسمح الله تسبب له اعراض جلدية ويكون بدال انك تخفف ضيق الحلق تسبب له حساسية او ماشابه من ذالك

بخصوص رفع الطير رجله



فهذا جداً طبيعي في الطيور بعض الاحيان وقت النوم تراها تقف برجل وحده لمدة ساعات كثيرة سبحان الله ، وبعض الاحيان يكون رافع رجله وقت هدوئه وسترخائه يعني يكون بدون نوم


آخر كلامي اقول انت خله كم يوم واذا صار الطير يضايق من الحلق بستمرار رجعه للبيطري وخلع الحلق ريح الطير فهذا رايي لك

والحمد لله رب العالمين

اخوك

كاسكو البحرين