[ام ماجد]

المشاركة الأصلية كتبت بواسطة أبوالعينين

وعليكم السلام ورحمة الله وبركاته

أختي الفاضله / أم ماجد

معليش على التأخير اليومين اللي طافت كنت جدا مشغول

ماتشوف شر اخوي مسموح

أختي الصور واضحه ماشالله عليكي بس يا أختي أم ماجد الصراحه أختي الطير وعلى أساس الصور اللي شايفها ألحين إنوا الطير أبدان مو بفترة تبديل الريش المعروفه " بالقلش " وعلى حسب ردك إنوا الطير يتحرك كثير ويلعب ! وهادا دليل قاطع مع الصور إنوا الطير مو بفترة القلش ! لأنوا فترة القلش يا أختي الغاليه يصاحبه تغيرات كبيره في الطير أهمها الخمول والنوم الكثير ويكون ثقيل الحركه يعني بإختصار اللي يشوفوا يقول مريض ! بعكس طيرك ماشالله

فعلاً طيري طبيعي يلعب ويصفر انواع التصفير نشيط بالقفص برازه طبيعي الله يكرمك


والقلش يأتي على أنواع وهيا :

القلش الطبيعي وهاذا يأتي مره واحد في السنه وخاصه في الصيف يصاحبوا تأثيرات سلبيه في الطير ! والنوع الثاني القلش الطارئ والنوع الثالث وهو الأخطر القلش الفرنسي . والحاله إللي عند ببغائك أختي أم ماجد وأعيد على حسب الصور إللي أنا شايفها

( القلش الطارئ ) : والقلش الطارئ يا أختي يأتي بسبب عدة عوامل مختلفه أهمها الميكروبات وعدم التغذية السليمه وغيرها والقلش الطارئ يتساقط الريش على بعض مناطق الطير دون أي تغيير في حالة الطير .

وإن شالله يا أختي أم ماجد العلاج بسيط بس بالله عليكي إتبعي العلاج تمام لأنوا يا أختي بقولك معلومه طبيه مهمه والكثير يجهلها وهي إنوا جميع أنواع القلش يتبعها حالة إزعاج الطير مما يسبب نتفه لريشه ! وهنا حتصير مشكلتين القلش الطارئ ونتف الريش ! بس إنشالله أمورك سهاله أختي وإتبعي الآتي :

يعني اللي بطيري قلش طارئ؟


العلاج
ــــــــــ

1 - تغطيه القفص بمنشفه على ناحيه الجانبين والسقف ووضع القفص في مكان شبه مظلم .

بالنهار ؟؟


2 - تنظيف القفص يوميا على 24 ساعه .

اذا تقصد علب الاكل والمويه واللي تنسحب حق المخلفات انظفهم 3 مرات واول مره الصباح بالفيري,
الشبك اللي يفصل بين الطير والمخلفات والمجثم انظفهم مره باليوم ,
الشبك كامل اغسله يوم وامسحه يوم يعني الغسل يوم ويوم لا

جميع الاشياء بالاسبوع اغسلها بديتول للتعقيم



3 - تنظيف الماء يوميا وعلى مدار الساعه 24 ساعه .
4 - بعض الأخوان قالوا ( لاتروشيه ) كلام خاطئ أختي الطير روشيه بطريقة الرشاش " الرذاذ " الخفيف أربعه مرات في الأسبوع يعني يوم ترويش ويوم لا ويوم ترويش ويوم لا وهكذا ويكون رش خفيف بس يوصل لجيع المناطق في الجسم . وياريت تحطين على ماء الترويش قطرات من عصارة الصبار من نوع ALOE VERA . لأنوا فعال جدا بعد الله عز وجل في العلاج ويرجع ريش الطائر ومنظره بطريقه عجيبه وأحسن من الأول وبطريقة سريعه ومناسب جدا لجميع أنواع القلش . وياريت وقت الترويش وبعد الترويش جنبيه التيارات الهوائيه . ووضع الطير بعد الترويش في مكان يأتي عليه أشعه الشمس الطبيعيه بدون تعريض مباشر الطير للشمس فقط الأشعه في غرفه حتى يجف وأفضل وقت رش الببغاء فترة الظهيره أو في مكان حراره معتدله .
5 - قبل نوم الببغاء يكون مره حلو إنك تدهني جسم الببغاء بالكامل بزيت الزيتون ! لمدة أربع أسابيع متتاليه لأنوا منتج فعال للريش وأيضا طعموا مر يبعد الطائر عن لمس ريشه .


الصبار اقدر اجيب زيت صبار جاهز والا ؟؟
وكيف لما ارشه يوم ويوم لا مااسبحه بعدها علشان ازيله والا بس الرش وخلاص ؟
وزيت الزيتون كذلك يوميا قبل النوم؟؟
واغسله بكرا والا كيف ؟؟


6 - أهم نقطه في الموضوع وسبب المشكله : تقديم جميع أنواع الغذاء المحتويه للفيتامينات والبروتينات وتقليل الحب الشمسي وعدم إعطائه في هاذي الفتره فورا " الفول السوداني " وتقديم الخضروات والفواكه . وياريت لاتحرميه من الغذاء المطبوخ المفيد جدا لدجاجتك

انوع له بس مره باليوم نوع يافاكهه والا خضروات والباقي حب شمسي بس
الفول السوداني قليل اعطيه يمكن كل ثلاث ايام حبه

وهل ينفع اعطيه نوعين يعني حمص وخس والا جزر وتفاح بيوم واحد والا ممكن فيتامين يتعارض مع فيتامين ؟؟؟




7 - جنبي الطير أي روائح كريهه أو كيميائية

8 - وأهم ثاني نقطه : النوم للبغاء يا أختي أم ماجد مره ضروره في هاذي الفتره والهدوء وعدم الإزعاج بمعنى إذا أذن صلاة المغرب على طول ضعي الببغاء في مكان هادئ ويكون مظلم وخليه نايم مرتاح بدون إزعاج لمدة 12 ساعه !

اكيد احطه في مكان هادي ومظلم 13 ساعه علشان لو ساعه ضاعت عليه يعوضها
بس لابد من صوت من برا الغرفه يعني احنا بعد 10 متر عن غرفة نومه هو داخل ومسكر عليه بس اظن يسمع بعض الصوت


9 - وأهم ثالث نقطه : الطير يكون تحت ملاحظتك 24 ساعه تلاحظي على الطير ينتف ريشه بنفسه من عدمه أو أي تغييرات بس بعون الله مايكون فيه شي إلا كل خير .

تحت ملاحظتي 48 ساعه بالاربع وعشرين
بس انا اشوفه يحك نفسه كثير ويسحب من الريش الوسط والنهايه زي اللي بالصوره
يعني مب ريش كامل يطيح لا بس زي الخيوط رماديه


10 - أهم رابع نقطه : الطير لازم تلهيه بأي حاجه ولاتحرميه من طلتك كل شوي إلا عند النوم وألعبي معاه وخليكي حنونه معاه لأبعد الحدود وأحيانا طلعيه برا القفص عشان يخفق جناحه مهم في هادي الفتره ولاتخليه وحيد طول الوقت وخليكي حريصه إنوا المكان اللي حوليه يكون هادي خاصه وقت النوم .

اخوي ابو العينين انا مع الطير طول الوقت العب معاه وامسح عليه اشيله بالعصا على كتفي واوكله من ايدي تقدر تقول مااقعد طول الوقت واقفه له لأنه يحب اتمشى فيه
حنان الام الحنونه على طفلها الاول
واطلعه برا القفص باليوم من الخمس ساعات الى سبع ساعات , يعني اغلب وقته برا
ويكون بيننا يعني مب لحاله

ــــــــــ

وهذا والحمدلله وخليكي على هالعلاج والله الشافي لين تشوفين تغييرات إيجابيه على الطير وياريت يا أختي الغاليه تلاحظي التغييرات وتابعيها جيده جدا

وإن شالله أكون أفدتك بعد الله جل جلاله وأي إستفسارات انا تحت أمرك أختي

جزاك الله خير ماقصرت وانا بإنتظار ردك على استفساراتي بالاعلى
وشكرا لكل من ساعدني واعطاني بعض النصائح شخص شخص انا ممنونه لكم