مرحبا ابو الجوري
اسف ع التأخير وبحاول اتذكر الكلام اللي كتبته اليوم الصباح ,,
شوف عزيزي انت شكلك جديد ع الهوايه صح؟؟؟
انت تنازلت عن الاليف ابو 3000 ريال واخذت ابو 300 ريال شيء طبيعي ,,
والحين عندك مثال حي والفرق واضح بين الاثنين هذا مدرب وصار مثل الحمامه واللي عندك مصيود وجايك بقفص وشحن وزحمه وخلها ع ربك والمفروض تحطها في الحسبان,,
انا واعوذ من كلمه انا اول ما اقتنيت كاسكو غيني وكنت غشيم في الموضوع ولا كان فيه انترنت ومنتديات يعني بالعربي مييييح,,
وكان يجعر مثل اللي عندك واكثر لكن حبي للهوايه جعلني اصبر واتحمل الصراخ والعض والحمد لله من بعدها صار عندي الوضع تمام,,
اعطيك نبذه بسيطه عن الغيني لأنك ذكرت كلمه ((كريه))
الغيني أفضل الطيور من ناحيه الكلام اذا الله وفقك فيه,وعنده مناعه وقليل ما يمرض,وصوته واضح ويتقن الكلمه مثل ما لقنته,لكن فيه عناد شوي في التدريب.
جب قلم وورقه وابدأ سجل معي اوكييييه
1-ارفع الطير في مكان يكون مثل الممر او الصاله بمستوى رأسك
2-لا تبدأ معه التدريب الا بعد اسبوعين او ثلاثه
3-انت من يضع له الاكل والماي واذا عطيته الماي كرر كلمه ماي ماي ماي واتركه
4-لا تعرضه للتيارات الهوائيه او المكيف ولا تروشه نهائيا في هذه الفتره
5-حاول تقعد معه ويكون هو اللي يراقبك فقط وانت تجاهله
6-اذا شفت الطير بدأ يشقلب او حركه زايده في القفص شغل له نغمه جوال ولاحظ انتباهه لك
7-اذا قربت منه وقام يجعر لا تتحرك وكأنك لم تسمع منه شيء وخلك ثابت حتى يسكت واذا سكت اتركه وارجع له بعد ربع ساعه
8-بعد اسبوعين يبدا الجد وتبدأ تشيل منه الاكل في الليل فقط
9-اذا طلع الفجر نزل القفص عندك في الارض وحاول تكون انت وياه في الغرفه ولا في احد يلفت انتباهه وسكر النوافذ واتركه ربع ساعه حتى يروح الخوف
10-افتح باب القفص اذا كان له باب من الامام وحط حاويه الاكل فاضيه
11-ارجع له بعد 5 دقايق وابدأ دخل يدك طبعا راح يجعر لا تخاف ابد وخل يدك ثابته حتى لو طاح من القفص او جعر والفول السوداني في يدك وابتسم وكلمه بصوت هادي ولا تطالع في عينه عشان ما يرتبك زياده
12-اكيد ما راح يأكل لكن الجوع يجبره يتجرأ
13-خذ حب شمسي او فول سوداني وابدأ قرمشها باسنانك راح يتعجب ويصير عند استفهام 
14-اذا حاولت ولا أخذ من يدك سكر باب القفص وحط في الحاويه حبه وحده فول سوداني
15 اكيد راح يتجرأ ويأكلها وينتظر منك الثانيه والثالثه
16-بعد انت وشطارتك تبدأ تحاول تعطيه بيدك ويمكن ياكلها ويقطها اكثر من عشر مرااات لا تيأس لأنه مثل ما قلت لك عنيد شوي
طبعا كل هذا يجي بالتدريب لكن لا ترهقه ابد مجرد تشوفه يلهث رجع القفص مكانه وابدأ معه بعد ساعه او يوم ثاني واهتم فيه بالتغذيه والفتمينات .
ملاحظه: اهم مافي التدريب اترك الطير ينام اقل حاجه من 10 ساعات الى 12 ساعه
اتمنى اني افدتك.