ببغاء جديد
 

اسعد الله صباحكم بكل خير
ناوي ان شاء الله اشتري اليوم بلوفرنتد وعندي كذا سؤال
اولا انا ناوي احط القفص في الصاله
هل فيه اشكالات في تنقلات القفص مره الغرفه مره الصاله بحكم نوم الببغاء واحيانا ابعاده عن الاطفال
يعني لاني سمعت انه لازم يتعود على مكان محدد
ثانيا راح اشتريه بعمر الست الى ثمان اشهر هل اشتريه بكامل جناحه او اقصها
ثالثا هل ابدأ التدريب معه ع طول او اخليه فترة او تعتمد على الفة الطير..ومتا يتم ترويش الطير كل يوم او الاسبوع مره لاني سمعت الفرخ مااحد يروشه
رابعا متا يحين الوقت المناسب او متا اوصل لمرحلة اني اطلع برا واشيله معي. زي البر او البحر وافكه واكون ضامن انه يطير ويرجع لي ولا ذي الحركة ماتصلح للببغاوات وتعتبر مجازفة>>>صقر على غفلة😁😁
وشكرا لكم مسبقا
تحياتي🌹

رد: ببغاء جديد
 

الافضل خله بصاله هو يحب الازعاج وعشان يلقط كلمات ويتعود

رد: ببغاء جديد
 

شكرا لك مازلت انتظر اجابه اكثر شمولية ولاقصور فيك

رد: ببغاء جديد
 

صباح الخير :)
انا اشتريت بلوفرنتد في نفس عمر ببغائك ، بالبدايه حاول تخليه بالصاله عادي ، وحاول انك ما تنقله من مكان لاخر طول الوقت لمدة اسبوعين تقريبا ، ببغائي يحب الاطفال والازعاج والحركه .. بس المهم ما يأذونه ويخوفونه ،

طالما غير اليف الافضل تقص جناحه حتى تقدر تدربه ويتعود عليك مو يهرب ويطير منك ،
تسبحه بعد فتره لين يتعود ع المكان ترشه بالماء بشكل خفيف مره بالاسبوع ،
الاكل تنوع له فيه من خضار وفواكه وحبوب مشكله ووووو

حاول تأكل الطير من يدك بس ابدا لا تحاول تمسكه باللحظه هذي ، خله يتعود ع يدك ،
بعد كذا اعطيه العاب بيدك وهو جوا القفص خله يقرب منك ويلمس يدك لا تخوفه وتحاول تمسكه ، وبعد كذا مره حاول تمسك راسه بهدوء وتحكه الطيور تحب هذي الحركه

استمر ع هذا النظام فتره شهر تقريبا ، خل في بالك اول شي لازم يتعود عليك ويحبك ، عشان يكون تدريبه سهل عليك ، هو تلقائي لما يحبك بيسوي اللي تبي ،

بعد الشهر خرجه من القفص في غرفه مقفله وشيل القفص من الغرفه حتى يجي يجلس عندك ،

فيه كثير مواضيع بالمنتدى اخوي تقدر تستفيد منها ، اللي اقوله لك انا مجربته مع ببغائي والحمدلله سنه كامله وببغائي ماشاءالله ،
ركزت على انه يتعلق فيني اكثر من اني ادربه ومااشاءالله يتكلم ويسمع كلامي والحين اعلمه كيف يطير لعندي لما اناديه :)


انا مبتدئه ترى وكلامي اللي قلته كله عن تجربه ، اتمنى تستفيد مثل ما انا استفدت من اخواني هنا جزاهم الله خير ،

معليش اختصرت الكلام لكن فيه كثيير مواضيع هنا بتستفيد منها ان شاءالله حاول تقرأ كثير عنها ،،

رد: ببغاء جديد
 

رد: ببغاء جديد
 

بيض الله وجيهكم جميعا فعلا اجابات كافية ووافية
مانستغني عنك شكرا لكم جميعا لمن شاهد ولمن رد ولمن فصل