السلام عليكم ورحمة الله وبركاته

لهواة الببغاوات الأفريقية الرمادية ... ولأهل الخبرة

أنا سبق وشريت ببغاوات أفريقيه لكن كلها من فصيلة (الكاسكو)
اللي ذيله (أحمر)
وكلها عمرها فوق السنه .. واحد سنه ونص والثاني سنتين
بس بعتهم لأنهم ما تروضوا ..

ولي الحين سنه ما شريت شي
بس رجعت شريت من خمس أيام ببغاء (غيني) فصيلة (التمنه)
منقاره لونه "بيج" على "وردي فاتح" .. عمره 6 شهور تقريباً

بياكل من نفسه الحمدلله
ولاحظت إنه يهز براسه إذا أكل بعد ساعات تقريبا (مادري شي طبيعي أم لا)

وهو أليف نوعاً ما .. يعني لما أقرب ما يصرخ .. يرجف ويبعد أو ينزل تحت بالقفص
لما أعطيه شي يجي وياخذه من يدي ..
يعني ما شاء الله رائع جدا ..


بس بستشيركم فيه ..

أولا / أنا الحين أفتح له القفص من فوق .. من ثالث يوم تقريباً
وأحط له حق الأكل والماء فوق القفص .. وياكل ويشرب .. ويضل فوق
بس بالليل أشيلهم وأدخلهم بالقفص بعدين هو ينزل وينام

مادري أخليه دايم برا القفص ولا لا ؟؟

ثانيا / اللي شريته منه يقول لا تخلينه في مكان مثل (الصاله) إزعاج
وناس رايحه وناس جايه في البيت تمر من عنده .. وأطفال مزعجين بعد

قال خليه عندك فتره لحد ما يتعود عليك .. الفتره هاذي ما سئلته كم ولا حدد
إنتوا بحكم خبرتكم ... الببغاوات الصغيره هاذي كم تبي عشان تتعود علي
ومتى أنزله لأهلي وأطلعه بالحوش يلعب .. حددو كم يبي من يوم أو شهر


لأنه هو الحين عندي فوق بغرفتي ينام عندي .. وأنا قاعده عنده طول الوقت
على الكمبيوتر طبعا .. وأكلمكم الحين وهو قدامي ههههه
وعندي بلابل هولنديه ... مزعجه جدا .. بس هو مستانس فيهم وشكلهم مثله بعد
فـ هذا شرح كامل لكم عشان تفهمون الببغاء هذا وتفهموني أنا عليه

ثالثا / متى أبدا الترويض عشان يرقى على اليد ويتدرب على الأصوات ..
مو شرط (الكلام) .. النغمات تكفي

وكمان معلومه قالها اللي شريته منه ..
إن الببغاء الغيني أكثر نغمات من الكاكسو
مزعج ويحب يغرد مره ..

بس اللي شريته لحد الآن ما قال ولا نغمه إلا مره غرد تغريده وحده بس
عشان شغلت له تغريدات ورجعت أشغلها وما غرد .. وش السبب ؟؟

وآخر نقطه

(العسل) .. أتذكر الببغاء الكاسكو كان يعض وسئلت ناس هنا في الموقع وقلت لهم وش اللي يخلي الببغاء ما يعض
قال واحد امسحي اصبعك بعسل وخليه يعضه بعده ما راح يوجعك بيدور على العسل اللي في إصبعك

ينفع أسويها الحين مع هذا الببغاء .. ما يضره العسل وهو صغير .. ؟؟

وبس ..

أي إضافات تحبون تضيفونه أو معلومات عن هالببغاء أفيدونا جزاكم الله خير وجعله في ميزان حسناتكم

:)