منتديات تو زوو - .. ~ فرخ الكروان والعمل ~ ..

منتديات تو زوو (http://www.2zoo.com/vb/index.php)

- قسم هواة الكروان ( الكوكاتيل ) (http://www.2zoo.com/vb/forumdisplay.php?f=61)

- - .. ~ فرخ الكروان والعمل ~ .. (http://www.2zoo.com/vb/showthread.php?t=182334)

.. ~ فرخ الكروان والعمل ~ ..

السلام عليكم ورحمة الله وبركاته ...

اخواني واخواتي الكرام ..

أنا هذي اول مرة اشارك بموضوع في هذا القسم الرائع ..

بداية أنا من عشاق طائر الكوكاتيل المعروف بـ(الكروان) ..

ولي فترة في تربية الكروانات وانتاجهم والحمد لله عندي ازواج وفروخ وانتاجات متميزة بفضل الله لكن ما كنت ادخل هذا القسم وماكنت اعرف إن فيه مواضيع رائعة ومهمة وأعضاء رائعين متابعين يومياً بمواضيع رائعه ..

أنا الحمد لله عندي خبرة بسيطة في عالم الكروان ويمكن حبي الشديد لهذا الطائر يخليني أربيه بطريقة نقدر نقول شبة ممتازة بفضل الله ..

ورح أحاول في هذا القسم اشارككم تجاربي مع طيوري من جميع النواحي ..

اطعام الازواج

اطعام الفروخ يدوياً

انتاج الازواج

كيفية التعامل مع الازواج في بعض الحالات المختلفة

الى غير ذلك من الأمور ..

مارح اطول عليكم في هذا الكلام ورح أبدأ في الموضوع الأساسي اللي جايبه لكم اليوم ..

قبل 3 أيام يعني بالظبط يوم الأحد في المساء ..

كلمني أحد الأصدقاء وقالي انو في واحد جابله 5 أزواج كروان يبغى يبيعهم عشان مسافر وكلمني اروح اذا حاب اخذ شي منها لأنه يعرفني اعشق الكروان ..

توكلت على الله ورحت له البيت ..

لقيت عنده الأزواج الـ5

زوجين معاها فروخ وزوجين معاها بيض وزوج ماعنده شي ..

طبعاً وجدت جميع الطيور في حالة يرثى لها من جميع النواحي وتضايقت جداً ..

أولاً الرجال من مكة وجاب الطيور لجدة .. خرج من بيته قبل العصر يعني تقريبا من الساعة 3 وانا رحت شفتهم كانت الساعه 10 في الليل يعني 7 ساعات تخيلوا والطيور في السيارة رايح وجاي فيهم وبهذلة

اللي تحتها بيض قامت واللي معاها فروخ طلعت ووضع سيء جداً

عموماً اخترت زوج من اللي معاهم فروخ واشتريته منه واخذته ورحت للبيت ..

اخذت اكثر من ساعة في البداية عشان انظف القفص واغسله واحط لهم اكل لان مالقيت عندهم لا اكل ولا موية ولا اي اهتمام او رعاية..

والله اول ماحطيت لهم الاكل نزل الزوج زي اللي جاي من مجاعه على الاكل بجنون ..

والفروخ كانت مافيها اي ريحة اكل في حوصلتها .. سويت لها من الخلطة اللي عندي واطعمتهم بالابره .. ونسيت صح اقولكم لما فتحت العش لقيت الرجال حاط لهم بدل النشارة تراب من الشارع معدوم وحالته حاله وكله حجار وحصى

الفروخ تقريباً عمرها أسبوع توهم صغار جداً وكان واحد منهم طايح مو قادر يوقف وكنت خايف يموت

المهم بعد ما انتهيت من هذه العملية واطعمت الزوج والفروخ طفيت لهم النور عشان يناموا

ورحت نمت :)

لما صحيت وصحيت الطيور وحطيت لهم الأكل والبيض المسلوق للازواج اللي معاها فروخ

وانتظرت الزوج الجديد عشان يأكل الفروخ لكن للأسف كان سلوك الزوج عصبي جداً

كان الذكر واقف عند البياضه زي الحارس ويمنع الانثى من الدخول ويضربها اذا قربت وهو يدخل شوية ويطلع واذا دخلت الانثى يطلعها بالضرب طبعاً كل هذا بسبب الرحلة المأساوية اللي مرو فيها اليوم اللي قبله ..

واطعمت الفروخ بالابره ورحت للعمل .. طبعا انا اتأخر في العمل يعني احيان من 8 الصباح الى 6 المغرب

وطبعاً هذا الوقت طويل على الفروخ بدون اكل .. لما رجعت من العمل كنت على أمل ان الزوج هدأ وأكل الفروخ ولكن للأسف لم يطعم الفروخ والوضع على ماهو عليه من سلوك الذكر والانثى ..

اتصلت بصاحبي وقلت له ع الموضوع واللي حصل وفكرت اني ارجع له الزوج ورحت له البيت ومعايا الزوج والفروخ فقال اذا تبغى بدله بأي زوج من الباقيين او بدل ببغاء او او ..الخ

وجلست افكر في الموضوع واشاور نفسي وافكر في الفروخ وخفت اني لو تركته عنده الفروخ ماتاكل وتموت ومايعرف يهتم فيهم لانه قال بحطهم مع زوج ثاني معاه فروخ وهم يأكلوه وبرضو حسيت انه شي غير مضمون ..

فبعد طول تفكير توكلت على الله واخذت الزوج ورجعت للبيت وعرضتهم في النت للبيع مع زوج اخر عندي وقلت اذا جاب سعر مناسب ولقيت شخص مناسب يرعاهم رح ابيعهم لكن للاسف مالقيت لا السعر المناسب ولا الشخص المناسب فلغيت البيع تماماً ..

وشلت الفروخ من عند الزوج وفصلتهم تماماً ومباشرة بعد فصل الزوج دخل الزوج للبياضه وبدأو يمارسو حياتهم عادي وانبسطوا وصاروا يدخلو ويطلعو والذكر لقح الانثى ماشاء الله وصاروا اغلب الوقت في البياضة ..

وبدأت أطعم الفروخ الصغيرة بنفسي واهتم فيهم ورحت اشتريت لهم انواع واشكال من الفيتامينات وانواع الخلطات للتغذية لأني ما اعترف أبداً بشي اسمه سريلاك للفروخ (كله سكريات ومايعطي التغذية المطلوبة) لما صحيت ثاني يوم الصباح وجلست افكر اش رح اسوي اذا جاعو الفروخ وانا في العمل فقررت أخيراً اني اخذهم معايا للعمل :D واخذ الابره والاكل وكل شي واذا جاعوا اعطيهم الوجبة في موعدها :) واليوم هو ثالث يوم يداوموا فيه الفروخ معايا في العمل وتم تعينهم على وظيفة قهوجي لاني حطيتهم في البوفيه حق الشاي والقهوة :D لانه أدفأ مكان في العمل كله..

ادري طولت عليكم السالفه ..

والحين مع الصور ..

هذي صورة الزوج ..

http://www.2zoo.org/get-9-2010-2zoo_org_l553ejjj.JPG

http://www.2zoo.org/get-9-2010-2zoo_org_m3ya4sp5.JPG

وهذي صورة الفروخ بعد تنظيف العش وحط النشارة اول ماجبتهم طبعاً قبل مايصير فلم عدم تأكيل الفروخ وقبل ما افصلهم عن الزوج ...

http://www.2zoo.org/get-9-2010-2zoo_org_wde9x4i7.JPG

وهذي صور للفروخ وهم معايا في العمل بعد ماكبرو شوي خلال الثلاث ايام ولاحظوا الفرق ماشاء الله

اهم شي شوفوا وين حاطهم عشان ادخلهم العمل بدون احد ينتبه خخخخخخخ

هذا كيس باتشي حق العيد :D

http://www.2zoo.org/get-9-2010-2zoo_org_ktixoifs.jpg

http://www.2zoo.org/get-9-2010-2zoo_org_p7jhk66r.jpg

http://www.2zoo.org/get-9-2010-2zoo_org_vtq0fs82.jpg

http://www.2zoo.org/get-9-2010-2zoo_org_d6z439o3.jpg

وان شاء الله رح احدث هذا الموضوع بصور جديدة للفروخ الى ان يكبروا وايضاً تحديثات للزوج اذا باضوا قريباً او شي باذن الله ...

واعتذر على الاطالة ..

وبانتظار ارائكم وتعليقاتكم واستفساراكم

قلبته مطعم ومقترحاتكم :P

في امان الله :)