|
الفاضل ابو محمد وخبراء الببغاء الغيني الكريه مساعدتكم جزاكم الله خيرا
بسم الله الرحمن الرحيم السلام عليكم ورحمة الله اخواني شفت كم مقطع باليوتيوب لببغاء الغيني وماشاء الله ماودك الا تشوفه هادي ويلعب ويصفر ويتكلم ويزيد الطين بله اني رحت لاحد محلات الرياض ولقيت غيني منتهى الولافه ويطلع على اليد ويتكلم لكن ضاربين بسعره يقول 3000 ريال قلت مايلزم احد الاصدقاء جزاه الله كل خير قام شرى لي غيني فرخ عيونه رماديه لاهي سوداء ولا بيضاء ولا صفراء ولونه غامق 300 ريال لكن ياسبحان الله عليه صوت ماسمعته بمخلوقات ربي كلهن يجعر جعير ولا بعير بينذبح لين فكرت اقتله لكن قلت خل اشوف وش تشورون علي عشان مايجعر ويستانس مثل ببغاوات عباد الله قريت باحد المنتديات يقول غطي قفصه بقماش وافتح فتحة صغيره للاكل تبدله منها وايضا تكلم وانت تبدل له الاكل عشان يسمع صوتك لمدة ثلاثة ايام وش رايكم ؟ انتظر توجيهاتكم بفارغ الصبر وشكرا |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
وعليكم السلام ورحمه الله وبركاته كتبت تفاصيل خبراتي وطرق تدريب وعصارت حياتي مع الافريقي ولكن في لحظه راحت الصفحه وما فيها :wao: لكن ابشر لي عوده ولا يصير خاطرك الا طيب.:freind: تعبت بروح اناااااااااااام. |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
يكفي انك رديت علي الله يجزاك الجنة
انا بانتظارك يابو محمد وبارك الله فيك وللمعلومية تراني حاط الببغاء في الحوش تحت المظلة يشوفني كل ماطلعت ودخلت واسمعه تو بدأ يصفر والحمد لله |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
بعد ما يتوالف في البيت و تخليه بالقفص او الاستاند مدة اسبوع
جيب فوطه ولا اي قطعه قماش سميكه و امسكه بها و خلك ماسكه لمن يوقف جعير و بعد ما يوقف جعير امسح على راسه راح يحاول يعضك انت لا تعطيه فرصه خلك تمسح على راسه لمن يوقف جعير بعدين رجعه الفقص و عطه وجبه حلوه :) و بعدها بكم ساعه او يوم ثاني سوي نفس الشي بس زيد الجرعه و حرك ظهره ولا بطنه ولا ارجوله الين يوقف جعير استمر على هذي الحاله اربع ايام ولا اسبوع و انشالله راح يوقف تحياتي |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
والله ياخوك انا مثلك
شريته قبل اربع ايام بنفس السعر اللي معك صوته تقول بعير من الطفش رحت امس شريت اللي لونه فاتح وكبيييييييييير وسعره حلو بعد ب900ريال وطلع صوته اقوا من الغيني بعد اللحين ياطويل العمر حاطه جنبي كل حركه يجعر بس اشوا له نص ساعه ماعاد يجعر اذا تحركت. انا ماضحكني الا ((الغيني الكريه)) |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
لقيت هالصوره نسخة من الببغاء اللي عندي نفس لون العيون تماما لكن ريش اللي عندي افضل بكثير الحمد لله
كم عمره هالكريه ؟ http://up.7cc.com/upfiles/ayn94804.jpg مشكور اخوي FedEx وماقصرت يالغالي اخويlil1vip الحال من بعضه جعار وصراخ لكن قل امين عسى ببغاءك يتدرب ويتكلم ويطلع احسن ببغاء |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
مرحبا ابو الجوري اسف ع التأخير وبحاول اتذكر الكلام اللي كتبته اليوم الصباح ,, شوف عزيزي انت شكلك جديد ع الهوايه صح؟؟؟ انت تنازلت عن الاليف ابو 3000 ريال واخذت ابو 300 ريال شيء طبيعي ,, والحين عندك مثال حي والفرق واضح بين الاثنين هذا مدرب وصار مثل الحمامه واللي عندك مصيود وجايك بقفص وشحن وزحمه وخلها ع ربك والمفروض تحطها في الحسبان,, انا واعوذ من كلمه انا اول ما اقتنيت كاسكو غيني وكنت غشيم في الموضوع ولا كان فيه انترنت ومنتديات يعني بالعربي مييييح,, وكان يجعر مثل اللي عندك واكثر لكن حبي للهوايه جعلني اصبر واتحمل الصراخ والعض والحمد لله من بعدها صار عندي الوضع تمام,, اعطيك نبذه بسيطه عن الغيني لأنك ذكرت كلمه ((كريه)):angry: الغيني أفضل الطيور من ناحيه الكلام اذا الله وفقك فيه,وعنده مناعه وقليل ما يمرض,وصوته واضح ويتقن الكلمه مثل ما لقنته,لكن فيه عناد شوي في التدريب. جب قلم وورقه وابدأ سجل معي اوكييييه 1-ارفع الطير في مكان يكون مثل الممر او الصاله بمستوى رأسك 2-لا تبدأ معه التدريب الا بعد اسبوعين او ثلاثه 3-انت من يضع له الاكل والماي واذا عطيته الماي كرر كلمه ماي ماي ماي واتركه 4-لا تعرضه للتيارات الهوائيه او المكيف ولا تروشه نهائيا في هذه الفتره 5-حاول تقعد معه ويكون هو اللي يراقبك فقط وانت تجاهله 6-اذا شفت الطير بدأ يشقلب او حركه زايده في القفص شغل له نغمه جوال ولاحظ انتباهه لك 7-اذا قربت منه وقام يجعر لا تتحرك وكأنك لم تسمع منه شيء وخلك ثابت حتى يسكت واذا سكت اتركه وارجع له بعد ربع ساعه 8-بعد اسبوعين يبدا الجد وتبدأ تشيل منه الاكل في الليل فقط 9-اذا طلع الفجر نزل القفص عندك في الارض وحاول تكون انت وياه في الغرفه ولا في احد يلفت انتباهه وسكر النوافذ واتركه ربع ساعه حتى يروح الخوف 10-افتح باب القفص اذا كان له باب من الامام وحط حاويه الاكل فاضيه 11-ارجع له بعد 5 دقايق وابدأ دخل يدك طبعا راح يجعر لا تخاف ابد وخل يدك ثابته حتى لو طاح من القفص او جعر والفول السوداني في يدك وابتسم وكلمه بصوت هادي ولا تطالع في عينه عشان ما يرتبك زياده 12-اكيد ما راح يأكل لكن الجوع يجبره يتجرأ 13-خذ حب شمسي او فول سوداني وابدأ قرمشها باسنانك راح يتعجب ويصير عند استفهام :wao: 14-اذا حاولت ولا أخذ من يدك سكر باب القفص وحط في الحاويه حبه وحده فول سوداني 15 اكيد راح يتجرأ ويأكلها وينتظر منك الثانيه والثالثه 16-بعد انت وشطارتك تبدأ تحاول تعطيه بيدك ويمكن ياكلها ويقطها اكثر من عشر مرااات لا تيأس لأنه مثل ما قلت لك عنيد شوي طبعا كل هذا يجي بالتدريب لكن لا ترهقه ابد مجرد تشوفه يلهث رجع القفص مكانه وابدأ معه بعد ساعه او يوم ثاني واهتم فيه بالتغذيه والفتمينات . ملاحظه: اهم مافي التدريب اترك الطير ينام اقل حاجه من 10 ساعات الى 12 ساعه اتمنى اني افدتك. |
رد: الفاضل ابو محمد وخبراء الببغاء الغيني الكريه مساعدتكم جزاكم الله خيرا
جزاك الله الجنة ابو محمد
نبدأ بعون الله بمثل ماقلت وبوافيك بالتفاصيل ان شاء الله تعالى شكرا جزيلا |
| جميع الأوقات بتوقيت GMT +3. الساعة الآن 04:53 PM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو