من يروض ببغائي
 

السلام عليكم ورحمة الله وبركاته
تحيه طيبه
انا سبق كتبت عن ببغائي الرمادي الافريقي
بانه صعب ترويضه وانا واحد ماعندي فكره بالمره
بس احبهم بأنواعهم
سؤالي هل يوجد مكان او شخص متخصص يروض لي ببغائي ويعلمه الكلام
بالدمام
وجزاكم الله خيرا

رد: من يروض ببغائي
 

والله أخوي لو عندي وقت ابشر

بس اللي اقدر افيدك فيه انك تجيبه عندي تخليه كم يوم وبعدها بعلمك كيف تتعامل معاه.

انا حالياً عندي أمازوني وعندي غيني تمنه

بس واضح انك انت تحتاج للتدريب مو ببغاءك

انا في الدمام خلينا نتقابل وننقل التجربة للأعضاء بعد ما تظهر النتائج.

وان شاء الله تلاقي نتيجة

تحياتي

رد: من يروض ببغائي
 

انا بالرياض مشكلة

لكن اقرا في المواضيع المثبته

انا كنت مثلك ما اعرف اي شيء قالي واحد من العيال سجل وشف والله سجلت وهذا انا ما شاء الله

رد: من يروض ببغائي
 

اخي العزيز سكر
تحيه طيبه
انا سبق عرضته على قريب لي من اصحاب الخبره في الترويض
جلس عنده شهر ورجعه وقال لي عنيد وراسه يابس ولاقدرت عليه
عندك استعداد تقابلني وتاخذه تدربه
واكون لك شاكر

رد: من يروض ببغائي
 

ايه ابشر من عيوني

اليوم ان شاء الله في أقرب وقت نتقابل ولا يهمك وآخذه عندي كم يوم وان شاء الله نلاقي نتيجة يا قمر

تحياتي

رد: من يروض ببغائي
 

عزيزي سكر شيك على الخاص ارسلت لك رقمي
انا بانتظارك
ولك كل الاحترام والتقدير

رد: من يروض ببغائي
 

بالتوفيق لكم جميعا

رد: من يروض ببغائي
 

قبل كم ساعة قابلت الأخ أحمد حمادة وأخذت منه الببغاء حقه.

وصراحة شكله مفجووووع مرة

لكن ربي يسهل

شوف الفيديو هذا يا غالي, هذا ببغائك المتوحش شوف صار أحسن شوي.

التحميل من هنا

حاول تحمله على جهازك اذا كان عندك برنامج ام بي 4

أما اذا ما كان عندك أجل انقله على جوالك عن طريق البلوتوث وبيشتغل ان شاء الله.

وبعد شوي بنزل لك صور عنه ان شاء الله


تحياتي

رد: من يروض ببغائي
 

هذا ببغائك الجميل اللي للحين ما تعرفت على اسمه



http://www.pusup.com/up/get-3-2009-3mdelmg8.JPG

وأبشرك أكل من يدي وخف جعيره عن أول بكثير, لكن ما زال يجعر اذا أحد لمسه.
لكنه ما يقول شي اذا بتقرب منه بس زي منت شايف في الصورة جالس أأكل التمنة وهو يطالع.


http://www.pusup.com/up/get-3-2009-z65kr5lq.JPG


هذي صورة جناحه قبل ما أقصه كان مبهذل وتالف بسبب عدم الاستحمام.
وكما هو واضح كان فيه محاولة قديمة لقص جناحه بطريقة خاطئة, ولكن لم تكتمل.
http://www.pusup.com/up/get-3-2009-c04uwhwq.JPG

أعتقد ان اللي كان بيقصها بطل من شدة توحش الببغاء. (وبيني وبينك معاه حق :D )

هذي صورة ريشه قصيته اليوم بعد ما اعطيتني اياه.

http://www.pusup.com/up/get-3-2009-uz9b85pz.JPG

وترى بخليه في علبة واعطيك اياه عشان ما تقول اني رجعت ببغائك ناقص :D

على فكرة .

انجرح جرح بسيط لما نزلناه من السيارة, الظاهر انه صدم في الشبك بقوة وجرح من عند خشمه.

ما يأثر ان شاء الله بس شكله خايف بشكل غير طبيعي ومستعد يأذي نفسه ولا يسمح لأحد يقرب منه.

أضن انه يحتاج فترة أطول عشان يتأقلم.

دعواتك لي بالتوفيق في ترويضه لأنه فعلاً تحدي.


تحياتي

رد: من يروض ببغائي
 

بسم الله الرحمن الرحيم

سكر يعطيك العافية على مساعدة الاخ احمد

ومتابعين الموضوع معاك للنهاية ان شاء الله

بالتوفيق لك في هذا التحدي الشييق.

رد: من يروض ببغائي
 

رد: من يروض ببغائي
 

السلام عليكم ورحمة الله وبركاته

تسلمون على الدعم والتشجيع

الحمد لله اليوم طلع على يدي

والحين بنزل صوره ان شاء الله بعد دقايق

رد: من يروض ببغائي
 

ما شاء الله عليك سكر

بالتوفيق و متابعين معاك

يعطيك العافية صدق انك سكر على اسمك

رد: من يروض ببغائي
 

اليوم العصر روشته وطلعته بعد ما نشف برى السطوح

وجلست معاه شوي

صار يطلع من خشبة الى خشبة لما اقوله اطلع.

وبعدين بحمد الله طلع على يدي (أضافيره طويلة مرة)

بس مو مناسب نقصها الحين.

علماً ان الطائر كبير في العمر ويوصل حوالي من سنة وشهرين الى سنة ونص تقريباً

وهذا رد لكل من يقول أن الببغاوات الكبيرة غير قابلة للترويض.

هذي صورته

http://www.pusup.com/up/get-3-2009-666kbxow.JPG

http://www.pusup.com/up/get-3-2009-cv8dm37w.JPG

http://www.pusup.com/up/get-3-2009-v3ej3p1e.JPG



طبعاً هذا اللي صار يعتبر نقله كبيرة, لأن الببغاء كان مرعووب بشكل غير طبيعي, وعمري ما شفت مثله في الخوف, والعناد.

لكن المهم الحين ان اللي صار مجرد بدايه, وممكن ينتكس مثل أول ببساطة.

هذي تعتبر أصعب مرحلة, اللي هي تعزيز التدريب وترسيخه حتى يصير عادة مألوفة عند الطائر.

وان شاء الله أحاول قد ما أقدر أفهم طبيعته وأختار الأسلوب المناسب له في التدريب بعون الله.


أخوي stavol75 أشكرك على تعليقك وأتمنى لك متابعة ممتعة

والناس لبعض يا غالي.





كلامك سليم أختي لي لي.

احنا اللي نحتاج للتدريب قبل ما ندرب ببغاواتنا


أشكرك على مرورك


تسلم افريكانو على دعواتك وعلى المتابعة.

وعسى الله يعافيك يا قمر.

تحياتي.

حياك لله أخي

رد: من يروض ببغائي
 

والله ما قصرت يا سكر والله يكثر من امثالك

رد: من يروض ببغائي
 

وربي أنك فنااااان
ماشاء الله عليك
الله يوفقك

رد: من يروض ببغائي
 

ماشاء الله عليك

أستاذ سكر

<< شرايك تاخذ اللي عندي

بالتوفيق يااارب

رد: من يروض ببغائي
 

ما شاءالله عليك :)
الله يوفقك ويجي من يخدمك بوقت الشدة

رد: من يروض ببغائي
 

والله يعجز اللسان عن التعبير صراحه ماشالله عليك . انا توقعت انك بتقدر لكن ماتوقعت بهذه السرعه بس من يوم ماشفتك عرفت انك رجل بروفيشنال
وانت شفتني يوم اعطيك اياه كنت يائس منه . انا قلت اذا ماضبط هالمره بسوي عليه كبسه:D

بصراحه احرجتني عند الاعضاء. ليتك رافع الصور بعد اسبوع على الاقل مو يوم واحد بس:D

وريت الصور للاهل في البيت مومصدقيين انه نفس الببغاء اللي عطيتك اياه امس بس الفيديو ماشتغل على الجهاز وحاولت اغير امتداد المقطع وبرضو ماشتغل يمكن فيه مشكله

انت سألتني عن اسم الببغاء وبصراحه ابوالشباب ماعطاني فرصه اني اتعرف عليه

وانا تاركلك الخيار عشان تسميه وانت واللي يعجبك

عموما حبيبي مشكور وانت كسبت التحدي قدام الاعضاء الكرام

ويعطيك الف الف عافيه يا قمر.

رد: من يروض ببغائي
 

الله يسعدك كاسكو ويجزاك خير

تسلملي عبود على التعليق يا قمر

أم صوفي وشفيك مستعجله هههههه احمد حمادة من ثلاث شهور ونص وهو يعاني عشان كذا قلت له يجيبه.
انتي لسى ما كملتي حتى اسبوع, اصبري شوي وحاولي, واذا ما نفع ابشري بس بعد ما تحاولي 3 أشهر , لأنك يمكن ببساطة تروضيه وتكسبي خبرة أفضل بنفسك.



زوجتي تقول ردك أروع رد <<< قلتلها صح, وقرصتني قرصة على كيف كيفك.

يا هلا فيك أخوي أحمد.

أولاً أبغاك تعرف انك انت قدمت لي خدمة لما جبتلي الطير.
لأني فعلاً كنت محتاج أثبت بعض الأشياء للمربين من هواة ومحترفين.
مثل فكرة انه من الصعب ترويض الببغاء الكبير في العمر.
ومثل أسباب فشل الترويض, مو دائماً المشكلة في الببغاء نفسه.
أكثر حالات التمرد تكون بسبب شي بسيط مثل البيئة المحيطة بالطائر.
عشان كذا كنت حريص اني ما أتأخر في رفع الصور, مع اني مسخن ومزكم وحالتي حالة.

اللي صار مع ببغائك

1- تغيرت البيئة , وانتقل الى بيتي مع الطيور اللي عندي, وبدأ يقتنع بفكرة اني صاحبه مو عدوه.
2- إزالة كل ما يتعلق بالماضي مثل القفص, لأن فيه ذكريات ممكن تكون سيئة.
3- وضعه على ستاند يوقف عليه بدل القفص, لأنه في القفص يشعر بدفاعية أكبر, وبالتالي يرفض الانصياع.
4- قص ريش أجنحته, لأنه دائماً يسعى للهرب بواسطتها وهو مدرك مدى فاعلية الأجنحة, واذا قصيناها وتركناه يحاول الطيران أكثر من مرة حتى يكتشف ان هذي الوسيلة غير متوفرة, هذاك الوقت يكون أمام الأمر الواقع ويبدأ ييأس من الهرب.
5- اهمال التجعير, وعدم الإلتفات اليه, يعني اذا جعر, قرب منه واعتبره موسيقى, وكل ما زاد تجعيره قرب أكثر وانت مستمتع, واذا سكت روح من عنده, بهذي الطريقة يفهم ان التجعير معناه تعال قرب مني, وان الطريقة الوحيدة للخلاص هي السكوت.

في الأخير أحب أأكد على ان التوفيق بيد الله عز وجل.
ولو جبتلي ببغاء آخر يمكن أجلس شهور طويلة ولا أقدر أروضه.


بالنسبة للفيديو برسله لك بلوتوث لما نتقابل ان شاء الله.

أما الأسم كنت محتار ايش اناديه صرت أقوله (صديق) << هندي :D

على فكرة أهم نقطة الحين انه صار يطلع على اليد واذا تبغى تمد له عصاية قول له اطلع يطلع على طول.
ماشاء الله عليه باين انه ذكي, لا تفرط فيه وربي يبارك لك فيه ويعينك على تربيته.
طلوعه على اليد أخذ نصف ساعه فقط وأتقنها.

تحياتي

رد: من يروض ببغائي
 

والله يا سكر أنت أثبت ان مو صعب
ندرب اي ببغاء وحسافه فرطت بالي كان
عندي والحين شكل بهون عن الفرخ
واخذ كبير علشان أعيش تجربتك
ما شاء الله عليك
أحس فيها متعه

رد: من يروض ببغائي
 

:( خلاص بيرجع الببغاء لصاحبه < والله بيوحشني كثير.

الحمد لله بعد ما صلينا الفجر اليوم لمست الببغاء وحكيت راسه, صحيح انه مو مرتاح لكنها بداية. :D

وهذي الصور:

http://www.pusup.com/up/get-3-2009-onakfh6v.JPG
http://www.pusup.com/up/get-3-2009-cmlxmul0.JPG
http://www.pusup.com/up/get-3-2009-f40o5ov0.JPG






اي والله يا عبوود متعه ما تتخيلها بجد
بيني وبينك بديت احس ان تربية الببغاء الكبير اسهل من الفروخ والصغار .

رد: من يروض ببغائي
 

رد: من يروض ببغائي
 

اليوم انشالله بناخذ صديق من سكر وبصراحه انا خايف انه ينقلب علي

يعني انا كنت اشك في البدايه انه الولد الثاني للضب:D

لكن الحمدلله شفتوا التقدم اللي سواه الاخ سكر وانا بمشي على تعليمات سكر

والله يسهل.

رد: من يروض ببغائي
 

ما شاء الله :)

الله يعطيكم العافيه على هالموضوع المبدع :)

بس من امس ما سمعنا شي عن الببغاء صدّيق :D

شكله أكل احمد حماده :p

رد: من يروض ببغائي
 

رد: من يروض ببغائي
 

مبرررررررررررررررررررررررروك عليك ياسكر قدها يافارس...
5- اهمال التجعير, وعدم الإلتفات اليه, يعني اذا جعر, قرب منه واعتبره موسيقى, وكل ما زاد تجعيره قرب أكثر وانت مستمتع, واذا سكت روح من عنده, بهذي الطريقة يفهم ان التجعير معناه تعال قرب مني, وان الطريقة الوحيدة للخلاص هي السكوت.

والله انك صادق الطريقة هذي اكتشفتها مع ببغاء عندي ونفعت ومن يومها وانا مركز عليها كل ماجعر حطيت الكرسي وجلست قباله الين بطل جعير........

رد: من يروض ببغائي
 

رد: من يروض ببغائي
 

ماشاء الله عليك اخوي سكر
بهذه السرعة

انا معاك مافي شىء اسمه كبير أو ما يتدرب
انا اخذت كروان كبير ومتوحشه والأن هو اليف

بس مشكله الكبير يأخذ وقت
وترجع المسأله على المدرب ونوع التدريب

رد: من يروض ببغائي
 

مرحبا ياشباب صديق والله صاير غير هادي ومؤدب
يجعر بس والله موزي اول الحين بس للدلع ولا يستمر الا ثواني ويسكت على طول
وابشركم صرت المس راسه صحيح يتضايق اشوي بس وين اول وين الحين
واهم شيء اول اذا طلعته من القفص على طول يطير ويهجول في البيت اما الحين لا يجلس فوق القفص
ولا تجعير ولاهجوله .

في واحد من الاخوان سألني بكم روضلك سكر الببغاء
انا وسكر تعرفنا على بعض من خلال المنتدى والرجال حب يكسب فيني اجر
هو كان يبغى يساعدني وبنفس الوقت تحدي وتجربه جديده
واهم شيء بالنسبه لي اني اكتسبت واتشرفت بمعرفة الاخ سكر
وسكر ماطلب مني اي شيء بالعكس روض الببغاء واعطاني معلومات كثيره وحركات كثيره اسويها مع الببغاء
وفوقها عطاني ستاند هدية وهذا ابو الشباب مرتز فوق ستاند
http://www.alhnuf.com/up/pics-gif/up...13f357f8ca.jpg

رد: من يروض ببغائي
 

حلووو

يعطيك العافيه ويجزاك خير

أستاذ سكر

أحمد

مبروكـ عليك ببغائك اللطيف :)

رد: من يروض ببغائي
 

ام صوفي
الله يبارك فيك

رد: من يروض ببغائي
 

أحمد مبرووووووووووك لك ولسكر على التحدي
الي توفقتو فيه على الببغاء
أحمد عندي سؤال هل الطير طلع على يدك ولا إلى الان معند

رد: من يروض ببغائي
 

بتوفيق جميعأ انشالله

رد: من يروض ببغائي
 

الله يبارك فيك اخ عبود
وابشرك طلع على يدي
مع اني اماتوقعت في يوم بيطلع بس الحمدلله
والفضل يرجع لله ثم للاخ سكر

رد: من يروض ببغائي
 

أجل الله يبارك لك فيه
ويتمم عليك حب الطير لك
وانا خلاص قررت أشتري واحد كبير
علشان أحس بالمتعه في التدريب
مثل الاخ سكر وعلى الأقل الكبير
يكون عنده شويت مناعه

رد: من يروض ببغائي
 

والله موضوع يحتاج لتثبيت

جمييييييييييل جدا

وأنا أنصح أنو صاحب المنزل يضل دائما قريب من الطير

رد: من يروض ببغائي
 

والله موضوع يحتاج لتثبيت

جمييييييييييل جدا

وأنا أنصح أنو صاحب المنزل يضل دائما قريب من الطير

رد: من يروض ببغائي
 

الله يبارك فيكم جميعا
وان شاءالله اوافيكم بالمستجدات اول بأول
للاسف اوقات عملي ماتسمح لي اكون قريب من طيري دائما

رد: من يروض ببغائي
 

السلام عليكم ورحمة الله وبركاته

ما شاء الله الموضوع فيه تفاعل كبير ووصلت مشاهداته أكثر من 670 مشاهدة.
وفعلاً موضوع مهم في أحداثه اللي صارت , وأتمنى الكل يقراه حتى يغير بعض الأفكار الشائعة.

وبصراحة هذا الموضوع بحتاجه كثير لأنه مرجع لمعلومات مهمة.

مثلاً معروف ان قص جناح الببغاء وهو يشوفك هذا يخليه يكرهك ويصير متوحش.

علماً ان ببغاء الأخ احمد قصيت جناحه وصار أليف بعدها.

وفيه معلومات كثير منتشرة بين المربين والهواة وهي خاطئة, ومنها إطعام الببغاء شوكلاته مثلا يقولون انها تسبب تسمم للببغاء, وهذا كلام مو صحيح.

الأخ احمد جزاه الله خير أهداني سلة شوكلاته , كبيرة مرة ما شاء الله الى درجة اني الى اليوم ما قدرت آخلص ربعها, مع اني اعطيت الجيران ووزعت للشباب في الدوام واعطيت الببغاوات وجلست أفرم فيها انا وزوجتي.

ولا أثرت فينا كلنا خخخخ << الموضوع عن الببغاوات وش دخلكم :D

وفي الأخير, أشكر كل الأخوة الكرام اللي تابعو القصة من بدايتها وأتمنى انهم استمتعو معانا واستفادو, ودعموني في كل وقت.
وهذا جهد الجميع ربي يبارك فيكم ويخليكم لنا.
وأشكر الأخ الكريم أحمد اللي أتاح لي هذي الفرصة لترويض ببغائه, وللتعرف عليه وفعلاً كسبت رجل بمعنى الكلمة
ومثل ما قالو أهالينا (معرفة الرجال تجارة).... وأنا أشهد اني كسبت رجال.

إن شاء الله نسمع أخبار حلوة عن صديق.:D

تحياتي