|
طمنوني هل هو تسمم او جرعة زايدة؟!
السلام عليكم ورحمة الله
اليوم وديت قطتي للبيطري ع اساس اكمل لها جرعة الكورتيزون اللي قررها لها لمدة 3 ايام لحساسية بانفها .. اول امس كانت الجرعة الثانية بس شكلها اكلت شي من الارض وصارت ترجع وخفت وتأكدت منه انه ابرة الكورتيزون مستحيل تكون السبب.. اديتها زبادي الحمدلله لين خفت شوي رحت اليوم ابغا اديها اخر جرعة لقيت دكتور غير وسألني عن القطة قلتله باقي جرعة كورتيزون وعندها استفراغ اتفاجأت فتح فمها شاف بقع سودا عاللسان قال صديد وعندها التهاب شديد واداها 4 ابر وحدة للاستفراغ ووحدة فيتامين ووحدة كورتيزون ووحدة مضاد واداها نص قرص للديدان لونه اصفر رجعت البيت القطة عيونها غريبة العدسة كبيرة طول الوقت المهم نامت وتقوم شوي تلعب وترجع تنام .. وانا باقراء لقيت انه اتساع حدقة العين ممكن يكون تسمم خفت ؟؟ كيف اقدر اطمن انه ماصار لها تسمم وانها كويسة ، واذا طلع صار فيها تسمم ايش اعمل؟ هو للان الحمدلله مارجعت ولا جاها اسهال بس نايمة اكلت داري فود رويال كانون شوي بس بللته لها بالموية لانها ماتاكله جاف ورجعت نامت.. الله يسعدكم اللي عنده خبرة يطمني |
رد: طمنوني هل هو تسمم او جرعة زايدة؟!
اعطاني مضاد حيوي ابدأ جرعته من بكرا الصباح اسمه بيموكسيل bimoxyl انا متعودة على بيتاموكس قاللي خفيف هذا اقوى وحيعالجها .. ادوني رأيكم
|
رد: طمنوني هل هو تسمم او جرعة زايدة؟!
الحمدلله بدأت تجري وتلعب واعطيتها زبادي لكن مازالت حدقة العين واسعة ... يارب اطمن عليها اكثر...
والله قلقانة من بعد ماشفت اعراض تسمم الدواء يارب مايطلع فيها شي |
رد: طمنوني هل هو تسمم او جرعة زايدة؟!
ليش ابر الكورتيزون؟ قطوتك فيها ربو!!
كم عمر القطوة؟ اعطاها ابرة استفراغ وابرة مضاد وابرة فيتامين وابرة كورتيزون وكمان حبوب ديدان !!! وعلى ايش متصربع انتي وين في اي منطقة وايش اسم العيادة والبيطري قطوتك بالضبط ايش فيها؟ والسواد اللي عاللسان من متى وايش اعراض القطوة اللي خلته يوصفلها ابر كورتيزون....وهل هي نفس القطوة اللي عمرها شهرين؟ ياليت تردي بسرعة لان المرة اللي فاتت رديتي بعد شهر |
رد: طمنوني هل هو تسمم او جرعة زايدة؟!
لا مو ربو حساسية انف كنت احسبها مزكمة لما كشف الدكتور قال دام تاكل كويس يعني مو زكام حساسية ووصفلها ثلاث ايام ابرة كورتيزون.. بصارحة عطستها قوية و بتعطس كثير ..
عمرها الان تقريباً ٤اشهر انا من جدة العيادة اسمها ابراهيم البيطرية وقصة قطوتي حكيتها من قبل اني جبتها وعمرها شهرين معدومة فطريات وللان اعالج فيها مو راضية تنتهي تروح من مكان ترجع بمكان.. غير التشنجات اللي تجيها بالاطراف دي اشياء من اول يوم جاتني فيه لاحظتها ووديتها عيادات الحمراء.. هناك للاسف جننوها ابر ولا كمان يد الدكتور قوية بالابرة مسكينة كانت تنصرع ٣ ابر لمدة ٣ايام وهذا وهو ماشاف التشنجات دي الابر بس للفطريات.. ايش هي ما اعرف كان يقول فيتامينات.. اتعقدت من دي العيادة فلا الفطريات راحت ولا التشنجات بس استنزفت مادياً.. وصفولي كثير هالعيادة المتواضعة وبجد الحمدلله وديتها بالبداية قال نجرب الكورتيزون علشان التشنج هي خفت منه بعد الابرة بس رجع بعد شهر.. لكن المرة هاذي رحت بسبب العطاس وقال حساسية و٣ايام ابرة كورتيزون علشان ممكن يلتهب انفها لو اهملناه.. وديتها يومين اليوم الثالث اكلت شي غلط من المطبخ "هي طبعها ماشاء الله ملقوفة" كل شي تبغى تذوقه وتشمه ودايماً ابعدها من المطبخ لكن بغيابي تاخذ راحتها .. رجعت من الدوام لقيتها تستفرغ الاكل زي ماهو مو مهضوم رغم انه له ٦ساعات وبعدها اعطيتها زبادي وعسل وطلعته بس معاه شعر وزيتون واشياء مدري كيف لقطتها واكلتها.. انا ما ااكلها غير مسلوق ودراي فود بس قلت للدكتور ممكن نأجل الجرعة الاخيرة لين بطنها تهدا قال اوك رحت بعدها بيوم لقيت دكتور ثاني اعطاني محاضرة انه عندها صديد مع اني قلتله انه النقطتين السودة امس ماكانت فيه توها اليوم قال التهاب شديد وماتقدر حتى تبلع .. بصراحة ماكنت راضية عالابر بس خوفني عليها واعطاها الابر وجرعة الديدان والمضاد المفروض اليوم ابدأ فيه بس مو مطمنه له وذكرت اسمه فوق اعطيني رأيك فيه اذا كويس ولا ارجع اجيب بيتاموكس و لو علي ما ابغا اعطيها مضاد اصلاً توها مخلصة جرعة قبل اسبوعين قدها مناعتها ضعيفة اخاف تضعف اكثر |
رد: طمنوني هل هو تسمم او جرعة زايدة؟!
الحمدلله عينها خفت بدأت الحدقة ترجع لوضعها الطبيعي..
بس المضاد ما بدأ فيه خايفة منه .. لكن العطاس مستمر وبالذات زاد لما قبل امس كانت تستفرغ خرج من خشمها بس نظفته لها وحطيتلها موية حارة وفيكس علشان يفتح وتعرف تتنفس.. الحمدلله فتح وصارت تتنفس منه بس العطاس مطفشها |
رد: طمنوني هل هو تسمم او جرعة زايدة؟!
شلون نعطي قط عمره كم شهر ابر كو تيزون وهو ماعنده ربو
انا في حياتي كلها ماسمعت عن العيادة اللي قلتيهاوسألت اهل جده قالولي مانعرفها..الا وحدة قالتلي انها محل وموجود في شارع رخيص كله عشوائيات وسكن عمال وورش والاماكن هذي يروحولها للتوفير صراحة مدري وش اقولك...من متى الكورتيزون نستعمله لكل شي!! تشثنجات يعطيها كورتيزون ..زكام يعطيها كورتيزون وانتي ماشيه معاه وفطريات اللي هي ابسط شي نعالجه تجلس شهور ولحد الحين ماراحت!! قطوتك انعدمت من هالابر...روحي غيري العيادة واتعاملي مع عيادة محترمة بياطرتها متمكنين ويعرفون يستعملوا الادوية انتي للاسف حتى ماتعرفي اسم المرض اللي فيها.. كيف عالجتي الفطريات؟؟ ايش هو الدوا اللي استعملتيه وقررتي انه مافاد خذي القطوة لعيادة حقيقية يمديكي وفرتي فلوسك كلها في عيادة كويسة وبجلستين ثلاثة بس... قطوتك ماكان فيها اي شي وعيادة الحمرا كان علاجهم صحيح والفيتامينان كانت انسب شي لحالة التشنجات بالاطراف ولو استمريتي كان لقيتي نتيجة ممتازة.. من ايام انقذنا قط مشلولة اطرافه بالشارع وعنده صعوبة تنفس ومايتحكن بالاخراج ونقلناه للحمرا ومع جرعة فيتامينات مكثفة بالابر خلال ايام بدا يمشي....تدرين ليه؟ لان الطبيب شخص الحالة صح وعارف ايش وضع القط وايش السبب..مع اننا كنا مستغربين كيف شلل بس يعطيه فيتامينات .للاسف انتي طورتي حالة القط واحتمال يكون عنده مضاعفات كثيرة حاليا بسبب الكورتيزون ياليت تتلاحقي مابقى منها وتعرضيها عالحمرا او هابي بيت... وياليت تتأكدي اللي بلسانها هذا تقرحات بسبب فايروس او شي اخطر بسبب العلاج اللي ماله داعي.... او فايروس الكالسي اللي من اعراضه تقرحات اللسان وحالة زكام وعطس واحيانا التهاب بالعيون... ما اقدر افيدك قبل ما افهم وش فيها القطوة اساسا... الفطريات احلقي شعرها وجيبي علبة بيتادينمطهر الجروح وبالقطنة اربع مرات باليوم مسي الاماكن المصابة وامسكيها لحد ماتنشف..استمري فيه مش يومين. تقولي مافاد....لو انك معالجته من اول كما يجب كان عشر ايام واختفى...لاتوقفي البيتادين لبعد اسبوعين وحيختفوا اذا جو البيت دخان وسجاير وروايح كيماوية ياليت تبعديها عنها وغيري المحل اللي تروحيله...على فكرة العلاجات البيطرية الرخيصة والاكل الرخيص يعني انه سيئ ومضر اما المضاد فما اعرغهوبحثت عنه ومالقيت له اي اثر في عالم النت غير عبوات للحقن تستخدم للمواشي والاغنام.... وحتى لو كان في منه للشرب ليش بجيبون ادوية عليها علامات استفهام ومحد بستخدمها بالعالم كله..من وين يجيبوها وكم اسعارها ..وليش مش موجودة في كل الدول غير بالحقن وللمواشي...ولبش مايستخدمون مضادات حيوية معروفة وممتازة .. |
رد: طمنوني هل هو تسمم او جرعة زايدة؟!
عزيزتي انا رحت الحمرا وعطاها الثلاث ابر للفطريات مو للتشنج لما قلتله انها بتتشنج طنشني يقولي دامها تمشي ماعندها مشكلة ،، طيب هي حالات تجيها فجأة .. ابداً مو راضي يستوعب
هو فعلا حلقنا الشعر وشغالين من ذيك الايام بيتادين العلبة الخضرا السايلة الان لنا شهرالبيتادين هذا انا من المنتدى اخذته .. اما قبل مع العيادة اعطتني واحد لونه بني وكريم وبخاخ لاموزيل وشامبو وقال روشيها كل يومين .. طبعاً ماسمعت كلامه ولا روشتها كل يومين هي مرة وحدة لما القشور صارت مضايقتها انتي مو تخيلة كيف استلمتها الفطريات معبية جسمها بطريقة فضيعة والقشور لما طلعت صارت مضايقتها لانها من كل الجسم .... المهم اللي حابة اوصلك هو اني لما استخدمت وصفة الدكتور ثاني يوم طاحت علي وصارت لاتاكل ولاتستجيب كأنها ميتة واسهال واستفراغ وكلمت مدير العيادة قاللي اللاموزيل قوي وهي صغيرة عصبت لانه دكتورهم هو اللي وصفه وطبعا بسبب انها تنظف نفسها منه ومن البيتادين بطنها اتعدمت .. هذا اللي عقدني منهم .. وخلاني ما ارجع تاني لهم .. غير انه كورس الابر كان ثلاث ايام وكملناه بحمد الله عندهم فجأة الدكتور يقول لا اسبوع .. وازيدك من الشعر بيت اذنها معدومة كانت قطع سودا لو اصورلك حق العيادة كيف يومين بس نظفها ولا اعطاني اي شي اكمل انظف فيه.. كان اي كلام وماكنت ادري اللي فيها الاسود فطريات اختي راحتله ثالث يوم قالتله لو سمحت اذنها لسا مو نظيف وبس يزعجها مشى بالقطنة اي كلام وخلاص.. والله انا رحت الصيدلية وجبت قطرة اذن للاطفال حق الفطريات ونظفتها والحمدلله الان نظيفة وابداً ما تئذيها .. لو حسيت اني استفدت من الحمرا كان رجعت ثاني بس للاسف ما استفدت .. الحين انا اعطيها فيتامين عن طريق الفم .. وعلى فكرة مارحت العيادة علشان اوفر اقتصادياً لما خفت من كثرة الابر ومطلوب تحاليل و اشعة سألت اكثر من شخص مربي قطط دلوني على العيادة الي تقولي محل بمنطقة عشوائية .. انا مو دكتورة اشخص الحالة بس احس اذا في شي مو طبيعي واذا الدكتور قعد يبالغ في الادوية وهذا اللي زعلني امس انا حاسة بستي مافيها شي غير عطاس يروح يطلع لي بلاوي الدنيا ويقولي ابر انا قرفت من الابر وهربت من الحمرا بسببها .. يجيني الثاني نفس الاسطوانة.. ترا حالة التشنج صورتها فيديو وارسلتها لاكثر من دكتور منهم حق الحمرا استغربوا الحالة وقالوا اول مرة يشوفوا زيها .. الان مع الفيتامين صارت الحالة تجيها مرة او مرتين بالشهر .. اول كانت مشي زي الناس ماتمشي ايام ورا بعض اطرافها تتشنج .. لو عندك رقم جوال ابعتلك الفيديو تشوفيه لاني حاولت احمله هنا مانفع وعن حالها الان لسانها مافيه شي نظيف وجالسة تلعب والحمدلله بس العطاس هو المشكلة لو عندك عيادة زي الناس اقدر اروح وانا مطمنه بدون استغلال انا ماراح اتردد .. انا مو مستهترة بحالتها ابداً بس ما ابغى اعذبها عالفاضي انتي ماتتخيلي انا اتبنيتها ومصروفي على قدي وطبعاً بما انه العيلة مو متقبلتها بالبيت انا متحملة كل شي ورغم انه مالها غير شهرين ونص عندي حسيتها صارت قطعة مني علشان كدا ما ابغا دكتور يبهدلها ويتفلسف على صحتها.. وبسبب زن اهلي اني ادور احد غيري يتبناها مو قادرة خايفة اعطيها احد يشوف حالتها يرميها زي اللي كانت عندهم قبلي انتي متخيلة عمرها كان شهرين تلف ثلاث بيوت كل احد يرميها عالثاني ولاعناية ولاعلاج حتى نظافة مافي ؟! انا جاتني من الله ماكنت طالبتها ولا ادور لبسس بس احبها جداً لاني ربيت واحد قبل سنتين من يوم عمره ٣ايام لين صار سنة وطلع برا البيت كان قط يتيم من الشارع .. هاذي القدر جابها رحمة من ربي اللي كانت عندهم سافروا كنت برا البيت جيت لقيتها ببيتنا ورسالة عالجوال انه يستأذنوا يحطوها عندي لغاية مايرجعوا ورجعوا بكل صراحة قالوا اصلاً احنا مانبغاها مو قادرين عليها .. رديت انه حتى لو طلبوها ماراح اعطيهم هي لانهم سلموني هي حالتها مزرية ودي امانة بارقابنا مو لعب اطفال لما ولدهم يطلب بسه يجيبولهم وبعدين يطلع فيها بلا بدل العلاج يرموها عند الناس.. فرضاً طلعت وحدة ماعندي رحمة ورميتها في الشارع ايش حيكون مصيرها؟!؟! المهم انا اللي بعمله معاها احتسب اجره عند الله ودي المخلوقات اساسا اعشقها وشفت الرابط اللي انت حاطته اسفل مشاركاتك وحكون باذن الله عضوة وحيكون جزء من مصروفي للجمعية وتم النشر طبعاً .. اسفة طولت بس جد كلامك وجعني وحسسني اني مقصرة بحق البسة وانا الله يعلم ما ارضى عليها نسمة الهوا احسها زي بنتي بجد |
رد: طمنوني هل هو تسمم او جرعة زايدة؟!
المضاد هذا اللي خلاني اوسوس فيه اني بحثت بالنت مالقيت عنه شي يريح ..
بس حنتظر منك ترشحي لي عيادة طيبة .. او ارجع اشتري بيتاموكس اذا حالتها ضروري مضاد .. |
رد: طمنوني هل هو تسمم او جرعة زايدة؟!
بس حبيت اوضحلك الابر اللي كانت ٣ايام وكانت بتصير اسبوع مو للتشنج للفطريات اللي كلنا عارفين انه علاجها سهل ومايحتاج دا كله ..
|
رد: طمنوني هل هو تسمم او جرعة زايدة؟!
انا اعتذر منك ....يمكن كلامي كان قاسي..بس والله انقهرت عالقطوة :(
العطاس شي طبيعي كل القطط تعطس ممكن ماخذة برد بس اللي مش طبيعي انه يشخصها حساسية وابر كورتيزون ابر الكورتيزون تنعطى في حالات الحساسية الشديدة زي حساسية الجلد وازمات الربو..يعني علشان اعطيها كورتيزون لازم تكون عندها اعراض الربو صعوبة بالتنفس ,صفير بالصدر،اختناق وقت النوم ،ولازم هالاشيا تكون مستمرة لفترات طويلة...مش قطوة تعطس لها كم يوم اقوم اقول كورتيزون....انا اعاني من ربو وحساسية دائمة وتعالجت بإبر الكورتيزون فأعرف متى مفروض نستخدمها (>﹏<) 1) اول شي اذا العطاس مستمر وفي افرازات من الانف جيبي بيتاموكس عطيها نص مل مرتين باليوم لمدة خمس ايام 2) ابغاكي تركزي وتشيكي على لسانها وفمها..هل فيه جروح وتقرحات....ليش؟ لان اعراض البرد زي الزكام والعطس وافرازات الانف لو اقترنت بتقرحات وجروح بالفم ممكن يكون فايروس الكالسي والفايروس هذا واضح جدا ..حتلاحظي انها مش قادرة تاكل بسبب الم الفم..وبتلاحظي خروج افرازات من الفم..واحتمال ترتفع حرارتها ويبغالها عناية وعلاج لحد مايطلع الفايروس من جسمها القط لو مطعم بيقاوم المرض اسرع من الغير مطعم وبتحتاج فيتامينات ومضادات حيوية واحيانا مغذيات بالوريد 3)الفطريات....صدقيني من خبرة سنوات في تربية القطط عالجت حالات كثيرة فطريات واقولك ان البيتادين افضل وآآمن علاج للفطريات العياداتوالمواقع والمنتديات حيقولولك جيبي الكريم الفلاني والبخاخ الفلاني وشامبو وخل وصابون كبريت....وكل هالاشياممكن تعالج الفطريات بسس... تبهدل القط وتوسخه واذا لعقها تسبب مشاكل واستفراغ وبعضها سام...ويبغالك تكوني منتبهة له..غير انها دهنية ويعلق فيها الاوساخ وصعب ازالتهامن الشعر الا بغسيله بالشامبو علشان كذا انا دائما اوصف البيتادين فقط...وتأكدي انه غير سام ولا له مشاكل لو لعقه القط...بس بشرط انك تمسكيه لحد ماينشف ويمتصهالجلد ومو شرط تغرقي المكان مجرد مس بالقطنة من ثلاث لاربع مرات باليوم وانا اظمنلك لو استمريتي عليه بنفس ماقلتلك خلال عشر ايام بتختفي.. انا عالجت كل قططي بس بالبيتادين :) مافي فطريات تجلس شهور الا لو ما انتظمنا في علاجها ...اهم شي الاستمرار....انتي ممكن حتى بعد ماتحطي البيتادين وينشف بعد ربع ساعة كذا جيبي خل مخفف وبقطنة امسحي المكان ..منها تنظفيها وكمان الخل جدا ممتاز بالفطريات 4) عث الاذن او السواد الليفي اذنها ماله اي شغل بالفطريات ومافي اي قطرة بشرية تعالج عث الاذن لسبب بسيط ان العث حشرة مش فطريات اذا انتي متأكدة ان اذنها صارت سليمة وماتحكها ولا تهز راسها ولا عاد يطلع سواد بالاذن كل فترة فمعناته اللي كان فيها مش عث احتمال شمع متراكم او التهاب بالاذن....العث له ادوية خاصة لقتل الحشرة وخلال سبع ايام من العلاج تنتهي المشكلة....مافي عث يتعالج اكثر من سبع ايام بخصوص العيادات صراحة انا ما اعرف احد يعرف عيادتك ..واذا تبغين اسماء عيادات كويسة هابي بيت ممتازة وكمان الحمرا كويسة.. بس اذا القطوة مش محتاجة عيادة لاتوديها...اذا الموضوع عطس وزكام وبس عطيها بيتاموكس ..واذا لسانها وفمها ملتهب هنا ضروري بيطري.. شوفي وا رجعي طمنينا..علشان نساعدك :) اذا تقدري تصوري الفيتامين واضح صوريه |
رد: طمنوني هل هو تسمم او جرعة زايدة؟!
لا الحمد لله لسانها كويس مافيه شي بس في سن طايح صغير وشكله اللبنية بدأت تتغير .. العطاس مستمر لكن الافراز من انفها شفاف وخفيف بس العطسة قوية اكبر منها .. تاكل كويس امس بدأت ارجع ااكلها دجاج مسلوق لاني جلست يوم ونص بس زبادي ..
عندي معليش سؤال ليش الدراي فود ما صارت تستلطفه اعطيها رويال كانون الوردي للكيتن تاكل شوي وتسيبه وهي مرة جيعانة لازم اعملها دجاج او بيض مسلوق او عالصاج بس احياناً اكون برا البيت اضطر احط لها دراي فود ارجع الاقيها جيعععانة وماكلة منه بس شوي.. الفطريات كانت كل جسمها بس اللي يقهر رغم انه الان جسمها ٨٠٪ سليم لكن تتنقل لمكان ثاني مثلا كانت بكف اليد الحمدلله اتعافت الحين طلع ببطن الذراع هو هذا المزعج الاماكن اللي عالجناها راحت وطلع بمكان ثاني وبصراحة ما ابغا احميها .. منتداكم الله يسعدكم هو اللي طمني استخدم البيتادين بس لكن عيادة الحمرا ربنا يسماحهم ادوني لاموزيل بخاخ وكريم وكان طالب اروشها كل يومين بالنيزورال وهي ماعدت شهرين .. انا وقفت البيتادين فترة ماكانت مريضة باستشارة الدكتور ورجعت ثاني طمنتيني اني ما اروح لعيادة ما راح اتحمل يعطوها ابر كمان .. خلاص باذن الله اجيبلها بيتاموكس.. انا اللي خلاني اتأكد انها احتمال حساسية انف انه قبل اسبوع جانا غبار وبعدها صبغنا بويا بالبيت وكلنا صدورنا وخشومنا ضربت حساسية .. قلت شكلها مسكينة نفس الشي ما اتحملت |
| جميع الأوقات بتوقيت GMT +3. الساعة الآن 12:34 AM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو