|
قررت أشتري أصلة بورمية ولكن عندي استفسارات
السلام عليكم
يا شباب انا قررت اشتري اصلة بورمية صغيره كلمت صاحبها وبعد بكره استلمها وش أجهز لها مع العلم اني في منطقة تبوك ما يتوفر فيها أحواض ومسلتزمات الزواحف من وين أجيب لي حوض مناسب ؟؟ الشي الثاني وش أأكلها ؟؟ هامستر ووش غيره بعد لان ما ودي تبقا على شي واحد ودي اشكل لها الشي الثاني لو اجيب لها سمان من المجمد اللي يباع في الثلاجات مذبوح وجاهز هل بتآكله ؟؟ او اذا جبت لها كبده نيه وهل ينفع أعطيها الأكل ميت ؟؟ مثلا لو عطيتها هامستر أخاف يعضها ولا يسبب لها مشكلة ودي اقتله واعطيها تآكلها واخاف اذا قتلته ما تآكله واعذروني لكثرة اسئلتي لكن تعرفون الأصلة غالية ومابي اشتريها وتموت عندي ابي ادلعها آخر دلع وعندي برضو سؤال عن الأنياب هل لها انياب أو اسنان واذا عضتني عضتها قوية ممكن تقطع عروق ولا عادي ما تضر وشكرا لكم |
رد: قررت أشتري أصلة بورمية ولكن عندي استفسارات
وعليكم السلام
موب لازم حوض زواحف عادي اي حوض سمك دامها صغيره لاتنوع خلك على الفيران البيضا الصغار عطها كم وجبه وبعدها ابدا بتأكيلها الصوص الصغير , السمان توها صغيره عليه , والهامستر مانصحك فيه لني اشوفه يعض كثير وممكن يأذي الثعبان - ينفع تعطيها الاكل الميت بس تقتله وتقدمه بوقته او تجمده .. ( لو تروح الفهرس بتلقا طريقة القتل والتقديم والتجميد من اخونا جاسم ) - وبخصوص العضه لها اسنان بس عضتها عاديه وماتضر لكن اذا كبرت ممكن تضرك .. |
رد: قررت أشتري أصلة بورمية ولكن عندي استفسارات
ألف شكر أخوي ريان لتواجدك وافادتك
اقتباس:
ما فيه الا هامستر وغالي بعد أذا فيه طريقة اقدر اجيب بها فيران بيض علموني واذا اي حوض عادي طيب وش اسوي بخصوص لمبة UV برضو ما حصلتها |
رد: قررت أشتري أصلة بورمية ولكن عندي استفسارات
اشتري ذكر وانثى فيران بيضاء وخلها تتكاثر هذا افضل حل لأن الأصلات لها القدره على الصبر على الجوع
|
رد: قررت أشتري أصلة بورمية ولكن عندي استفسارات
مايحتاج لمبة uv , واذا موب عندك اللمبه هذي لازم تطلعها تتشمس , ومرتين بالاسبوع كافي
وبخصوص الفيران لو بتروح قسم البيع اتوقع بتلقا ناس يبيعون بالجمله , قبل كم يوم كنت شايف موضوع كذا .. |
رد: قررت أشتري أصلة بورمية ولكن عندي استفسارات
الاخ ريان ماقصر.... كفى ووفى
هذا الموضوع بيفيدك (موسوعة قتل الهامستر والفار) http://2zoo.com/vb/showthread.php?t=232962 اما بالنسبه للهامستر ممكن تشتري ذكر و 3 نثاي وتنتج منهم بالبيت ولا تظطر للشراء وبالموضوع راح تعرف اذا انتجت كيف تقتل وتجمد الهامستر وكيف تقدمه كوجبه للثعبان بالتوفيق |
رد: قررت أشتري أصلة بورمية ولكن عندي استفسارات
اقتباس:
ما اتقبل وجود فيران عندي بالبيت اقتباس:
وكم اتركها بالشمس ؟؟ ساعه ولا نص ساعه ولا ثلاث ساعات ؟؟ وتحت اي شمس شمس الصبح والعصر ولا شمس القايلة !! شفت المواضيع لكن للأسف بالرياض وانا بتبوك اقتباس:
ولا يهونون باقي الأخوان هنا كلهم تفاعلوا لهم جزيل الشكر والعرفان والموضوع افادني والطريقه حلوه مع اني نهائيا ما افكر بسالفة التجميد مستحيل ادخل فار بالفريزر لو كان عليه الف طبقة عازلة وفكرة اني اجيب ذكر وثلاث اناثي من الهامستر هذي حلوه وباذن الله اطبقها |
رد: قررت أشتري أصلة بورمية ولكن عندي استفسارات
حاضريين للطيبين ^.*
اخوي التشميس ساعه احسها كافيه , الاوقات شروق الشمس ولا الغروب , يعني يابعد الفجر ولا قبل العصر وياعاشق لازم تتقبل اي شي وتتحمله دامك اشتريت ثعبان , وانا مستحيل امسك الفيران لكن غصب اربيهم |
رد: قررت أشتري أصلة بورمية ولكن عندي استفسارات
تعددديل : التشميس قبل المغررب
|
رد: قررت أشتري أصلة بورمية ولكن عندي استفسارات
ألف شكر لكم وباذن الله بعد بكره تكون عندي ويا رب توصل بالسلامه
|
رد: قررت أشتري أصلة بورمية ولكن عندي استفسارات
اقتباس:
اذا صار عندي مجموعة ثعابين وعندي مكان للفيران لكن الآن انا مجرد مبتدي أول ثعبان أربية وبتكون عندي بالبيت |
رد: قررت أشتري أصلة بورمية ولكن عندي استفسارات
على اجواءنا ما اعتقد في فارق كبير الحين
جونا عالعموم تقريباً من الساعه 11 الى 3 العصر يكون حول الـ 48 الجو صراحةً إبداع :D يفضل بعد هالوقت يعني قريب المغرب و مع ان الجو حار فشمسها مده مو اكثر من ثلث ساعه ، ساعه كثير بهالجو ، لو درجة الحراره حول الـ 30 مافي مشكله تتركها مده ، لكن زياده الحراره بهالشكل تكون مضره لها ، و بالنسبه للأكل مالك الا الإنتاج أو انك تدور أحد يبيع بالمنطقه الي انت فيها غير المحلات ، المحلات لو ان عندهم ببيعون غالي بشوفلك احد ينتج منهم لو انك مستبعد فكرة الإنتاج نهائياً ، و الحوض يفضل يكون تفصال خصوصاً أنك بتاخذ بورميس ، احواض السمك بتاخذهم ما يمشون معاك سنه ألا بتحتاج أكبر .. و بالتوفيق ، |
رد: قررت أشتري أصلة بورمية ولكن عندي استفسارات
مشكووور بايثون
ومن ناحية الجو معك حق طيب اش هي درجة الحرارة المناسبة للمكان اللي بأحطها فيه ووين أفصل لها بيت . ؟؟ عند النجارين ولا عند محلات الألمنيوم ولا في ورش الحداده وين يفصلون ؟؟؟ |
رد: قررت أشتري أصلة بورمية ولكن عندي استفسارات
فيه برضو سؤال عن الاستحمام
لو احطها بحوض كبير مليان مويه تغرق وتموت ؟؟؟ ولا تقدر تسبح !! وكيف انظفهاا |
رد: قررت أشتري أصلة بورمية ولكن عندي استفسارات
الحراره لو تبي بشكل احترافي فتكون متدرجه
يعني جهه 31 النص 29 الطرف 27 لكن ممكن تعتمد درجة حراره وحده 28 و بتكون تمام ، الحوض تفصله على راحتك نجار او اياً كان ، الخشب لو بتحطه اخذ الي ضد الماي الي يستخدمونه للبنيان لونه اسود يفضل انك تسويه مترين × متر عشان تريح نفسك و ما تفكر بالحوض و عادي تقدر تسبح ما يصير شي ، حطها بالماي و خلها ، و عالعموم ماعون الماي يفضل يكون كبير بحيث يكفيها تدخل فيه . . |
رد: قررت أشتري أصلة بورمية ولكن عندي استفسارات
أبشركم وصلت بالسلامه
ما شاء الله تبارك الله عسووله ونظيفة واول ما وصلت روشتها في حوض حطيت مويه معتدلة لا حارة ولا بارده ونشفتها وحطيتها مؤقتا في قفص خشب وأسلاك ( قفص ارانب ) طوله متر و 20 تقريبا حطيت لها مخبأ كرتون قلبته على وجهه وفتحت فيه باب وحطيت لها علبة موية تقريبا 40 او 50 سم بس عميقة شوي والأرض مفروشة جرايد الحين كلش تمام بس باقي ناقصني اشوف حل للأكل صاحبها يقول لو عطيتها أكل ميت ما تآكله ويقول لا تعطيها هامستر لانه بيعضها عطها فيران وانا مبتلش ما عندي فيران وحجمها صغير مررره ما بتقدر تآكل غير الحاجتين هذي قاعد افكر القى طريقة ادوخ الهامستر ادخله عليها دايخ علشان ما يعضها |
رد: قررت أشتري أصلة بورمية ولكن عندي استفسارات
ماشاء الله مبرووك
ليه ماتاكل الميت ؟ تاكله اكيد واي ثعبان ممكن انه ياكل بس اذا قتلته بوقته , لن الدم يكون توه حار + الريحه .. يعني كنه مامات بالنسبه للثعبان لكن اذا كان ميت من اول اكيد ماراح تاكله .. ولو بتدخله حي حاااول تجيب شي على قد حجم الثعببان , لني قد جبت اكبر منه بشوي وعض الثعبان لين قال بسس , واذا انعض بيخاف من الهامستر وماراح ياكل لمدة كم يوم , والهامستر بيموت .. |
رد: قررت أشتري أصلة بورمية ولكن عندي استفسارات
والله مدري انا قلت لصاحبها باعطيها هامستر قال لا بيعضها
قلت بأقتله وأعطيها قال لا لو قتلته ما بتآكله اقتباس:
من الوناسة مواصل لي يومين http://www.2zoo.com/vb/images/smilies/biggrin.gif طيب وش ناصيحكم من ناحية اللعب بها وشلشلتها لأني أزعجتها من يوم جات ما نزلتها من يدي صارت زي المسبحه وكم ساعه تنام باليوم ومتى تنام بالليل ولا بالنهار اعذروني ازعجتكم وكثرت عليكم اسئلة لكن توي مبتدئ في التربية واخاف اغلط غلطه وتكلفني اصلتي وفيه برضو سؤال سمعت اني اذا شلتها بعد الأكل بترجع الأكل اللي أكلته طيب كيف انقلها للبيت ؟؟؟ لاني مابي اعودها تآكل داخل القفص ( قريت نصيحة بالنت تقول لا تعودها تآكل داخل القفص ) ابيها تآكل برا |
رد: قررت أشتري أصلة بورمية ولكن عندي استفسارات
بالعكس احسن شي انك تعودها على الحمل من يوم هي صغيره لن اذا خليتها كثير بالحوض بتصير هجوميه
سالفة النوم ماعرف والله لكن ممكن وهي نايمه تشيلها مافي مشكله لكن انتبه اذا بدا يغمق لون الجلد , لاتشيلها ابد .. لن هذي المرحله تقشر جلدها وتكون متوتره , وتكون هجوميه اكثر , يعني لاتشيلها ولاتعطيها اكل بالمده هذي بعد ماتاكل بعشر دقايق شلها مافي مشكله ماراح ترجع الاكل .. ومافي مشكله بعد لو اكلتها داخل الحوض (لني قريت بعض المعلومات هنا وللأسف صارت خاطئه) (لن السبب اللي قالوه ان ممكن تهجم عليك اوقات ماتجي تعدل الحوض وتحسبك فار او شي زي كذا) هالشي ممكن يكون صحيح بحاله وحده , ان ريحه الفار تكون بيدك ^^ |
رد: قررت أشتري أصلة بورمية ولكن عندي استفسارات
معلومات جدا مفيده
شكرا لك ريان ما قصرت ومن ناحية الاكل جاني فكرة أربط رجول الهامستر وايديه علشان ما يتحرك من مكانة ويكون عايش بس اخاف الحبل ينفك مع الهظم ويسوي لها مشكلة بالهظم وهي تتصرف |
رد: قررت أشتري أصلة بورمية ولكن عندي استفسارات
طيب يا شباب درجة حرارة الغرفة عندي 28
وحاط علبة مويه عند الأصلة بالقفص ولكن جيت احط اصبعي بالمويه لقيتها بارده اخاف تسبب له مشكلة بسبب برودتها |
رد: قررت أشتري أصلة بورمية ولكن عندي استفسارات
ههههه لالا كذا ماينفع ابد وبتاكل الحبل , ولو عدت على خير .. بتربط الهامستر كل مره ؟
الحل الوحيد انك تقتله , ... بس سؤال كم سعر الهامستر عندكم ؟ وبالنسبه للبروده شي طبيعي المويه تكون بارده ومو كل ماتصير بارده تروح تغير المويه , كل ماحسيت انك تبي تسبحها حط مويه دافيه وحط الثعبان فيه , وراح يعجبه الوضع ويبقى في المويه ^^ ,, وهي اصلن ماراح تجلس في المويه اذا بردت يعني لاتخاف , بس ممكن تشرب ... |
رد: قررت أشتري أصلة بورمية ولكن عندي استفسارات
سعر الهامستر 60 للحبة
وشفت في اعلان لواحد يوفر فيران بيضاء يقول الزوج ب 15 يا بلاش احس اغلب وقتها نوووم من يوم ادخلها القفص تلتف على نفسها على شكل دائرة وتنام ولا شفت طلعت او تحركت الحراره بالغرفة 29 والرطوبة 34 مدري اذا كان كسلها بسبب الحراره والرطوبة او يكون بسبب الجوع او هي كذا عادتها |
رد: قررت أشتري أصلة بورمية ولكن عندي استفسارات
عادتها كذا ^
لمن تكون بالحوض اغلب وقتها نايمه , لمن اطلعها تكون نشيطه ^ الهامستر غااالي جدا وقد شفت واحد بقسم البيع يبيع الحبه على 10 اما بالنسبه للفيران رخيصه جداا لكن بصعوووبه تلقاها , خاصتاً انك بعييد عن الرياض .. معلومه اضافيه بس , اذا تبيها تكبر بسرعه لاتحدد لها يوم للأكل , .. اذا اكلت ووصخت بعد كم يوم وانت بكرامه , اكلها من اليوم الثاني اذا كملت خمس ايام وماوصخت حطها بمويه دافيه واتركها , هالطريقه سويتها والحمدلله وصخت بوقتها ^^ , |
رد: قررت أشتري أصلة بورمية ولكن عندي استفسارات
يا سلام عليك يا ريان
والله استفدت منك فائدة عظيمه ما شاء الله عليك خصوصا المعلومات الاضافيه هذي معلومات ذهبية وأحس اني طفشت أهل القسم بموضوعي :shy: ما شاء الله ثلاث صفحات :D اليوم ما بحط له اكله بما انه اول يوم له عندي من بكره ان شاء الله أبدأ مشروع التسمين :88: |
رد: قررت أشتري أصلة بورمية ولكن عندي استفسارات
تستاهل موضوع كامل يالغالي
بالتوفيق .. ^.^ |
رد: قررت أشتري أصلة بورمية ولكن عندي استفسارات
ماشاءالله الاخ ريان بدع
بس عندك يا ريان 3 معلومات خطأ :- 1_ بعد الوجبه ب10 دقائق ممكن تشيلها..... (الصح انك ماتلمسها ولا توترها لمدة يومين من الوجبه... ثاني يوم ممكن تشيلها ولا بترجع) 2_ وضع الوجبه في حوض الثعبان خطأ وبعطيك سببين:- *_ نلاحظ ان الثعابين الي يتم تغذيتها بالحوض اول ماتطلع من كهفها تنظر لي فوق (تتوقع وجبه) *_ كثير من الثعابين الي تتعود عالاكل بمكان معين ترفض الاكل اذا نقلتها مكان ثاني وهذي شغله سلبيه لانك تبي الثعبان تكون شهيته مفتوحه بكل مكان وبكل وقت 3_ التشميس لمدة ساعه يقتل الثعبان.... من10 الى 15 دقيقه انت بالسيف سايد ماكسيمم مثل ماتفضل اخوي بايثون 20 دقيقه لكن يفضل اقل لتفادي الخطوره -------------------------------------------------------- اما بالنسبه للي باعلك الثعبان يقولك ماياكل ميت قولله استريح.... انا اجمد فيران لمدة شهرين و3 شهور و اقدمه لهم وياكلون لو اتبعت الخطوات الي انا شارحها بالفيديو -------------------------------------------------------- وبالنسبه للقفص الي انت حاطها فيه غير ملائم وغير صحي بتاتا وعرضه للكثير من الامراض عشان كذا دائما ننصع المربين المبتدئين بتهيئة المكان المناسب قبل شراء الثعبان وتعبك راحه يالغالي هذا القسم مخصص للسؤال والجواب و احنى حاضرين باللي نقدر عليه بالتوفيق |
رد: قررت أشتري أصلة بورمية ولكن عندي استفسارات
بالنسبه للمعلومه الاولى والثانيه
الاولى اخذتها من واحد خبير وربى ثعابين من سنين , وهذي ماشي عليها انا واشيلها بعد الاكل بعشر دقايق مافيه ايت مشكله وماترجع الاكل .. الثانيه برضو اخذت المعلومه منه والوجبه ااكلها بالحوض , لكن ممكن تكون صحيحه .. لني مرات ابحاول افك الحوض من فوق اشوفها موصله راسها عندي وتحاول تهجم , لكن لمن افتح السقف تكون طبيعيه جدا وبرضو اوقات تهجم من ورا الحوض , لكن هالشي ممكن يكون لقلة الحمل لكن اارجع واقولك يااجاسم الثعبان ذكي ويمشي على الرائحه , وانا اوقات اطلعه واوقات اعطيه الاكل , واحمله اكثر من اني أعطيه الاكل , يعني اكيد راح يتعود على الحمل اكثر من الاكل ووممكن تكون كل معلوماتي خاطئه لني مامتلك الخبره اللي تمتلكها ياجاسم .. |
رد: قررت أشتري أصلة بورمية ولكن عندي استفسارات
اليوم وقبل شوي سلمتها اول وجبة
وكانت فأر صغير نزلته عندها حي وكانت خايفة منه ملعون الأم عضها عضة قوية انا كان بيدي حديدة فلقته فلقه قسمة راسه نصين المهم اكلته وبلغته وكل شي مشى تمام ولكن يوم وصلت عند الذيل باقي شوي من الذيل طالع برا قامت ترتجف وتتلوى بطريقة غريبة حسيت انها بتموت من الرجفه والتلوي اللي تسويه على طول شلتها وطلعتها برا الكرتون حطيتها على جرايد وجلست اقلبها بايدي حتى خفت الرجفه ودي ترجع اللي اكلته حسيته سبب لها مشكله كنت افكر اسحب طرف الذيل علشان اطلعه بس خفت اقتلها المهم تركتها على حالها وجيت اكتب الرد هذا |
رد: قررت أشتري أصلة بورمية ولكن عندي استفسارات
اقتباس:
ما عليك بأغمض عين وافتح عين :D |
رد: قررت أشتري أصلة بورمية ولكن عندي استفسارات
اقتباس:
اخوي الغالي ريان انا ما اقصد اني اغلطك بالعكس شي جميل انك تجمع معلومات عن شي تحبه و ايضا ماقلت انك ماتقدر تربيها على هالطريقه الي ذكرتها وخلني اقولك شغله.... مو شرط شخص يربي ثعابين من سنين اصبح خبره ولا الكبير بالعمر خبره الخبرا الي ياخذ معلوماته من مصادر موثوقه + يطبقها ويتأكد منها ثم يعطيك المعلومه <<< هذا الخبره عموما احنى مانبي الثعبان يعيش وبس.... احنى نبيه يعيش بأفضل حال وصحه و انا كل الي قلته لك علشان تكون بالسيف سايد مرو علي ثعابين كثيره في منهم ماكان يرجع لو حملته على طول لكن اغلبهم كانو يرجعون اما بخصوص صاحب الموضوع المفروض انك ماتوكلها وانت توك جايبها جديده المفروض اولا تضبط الحوض المناسب ودرجة الحراره والرطوبه المناسبه وتحطلها كهف وخلها يومين او ثلاث ايام و من تطلع من الكهف لحالها تقدملها الوجبه اما توك جايبها وتعطيها وجبه.... زين منها كلت و ابي منك شغله.... ادخل على المواضيع المثبته بالقسم واستفيد منها و اي شي يواجهك اسألنا و احنى بالخدمه بالتوفيق |
رد: قررت أشتري أصلة بورمية ولكن عندي استفسارات
يعني انا استعجلت
ما عليه وجبه خفيف نقنقه بس بس اللي محيرني الرجفه اللي جاتها وقت البلع وتتلوى بشكل غريب http://im24.gulfup.com/2012-07-19/1342705638421.jpg فيه هذا الوقت كانت ترتجف قبلها كانت تبلع بشكل طبيعي ولاحظوا رجل الفار كيف بارزه قلت ممكن تكون هي السبب |
رد: قررت أشتري أصلة بورمية ولكن عندي استفسارات
ههههههههههه الله يهديك خربت عليها اكلها خلها ترتجف براحتها
انت المفروض تفر اليوتيوب كله وتشوف كيف يأكلون ثعابينهم , حتى تكون عندك خليفه عن الموضوع وماتتفاجئ بحركه نفس الارتجاف , لن هذي اخر اللقمه لازم ترفع راسها وترتجف شوي حتى تسحب الوجبه لداخل وبخصوص الرجل الي طالعه عاددي ماتوقع رجل فار صغير بتأثر على ثعبان زي كذا , بس اهم شي بلعته ؟ وحاول ماتتدخل الا اذا صار فيه شي متعلق من الارض .. وبالعافيه على المدام .. ^.^ |
رد: قررت أشتري أصلة بورمية ولكن عندي استفسارات
الله يعافيك
ايه الحمد لله بلعته الرجفه خوفتني صراحه وشلتها وطلعتها من الكرتون وكملت بلع على جريدة على الأرض وبعد ما بلعته دخلت تحت الجريدة خليتها زي ما قلت لي عشر دقايق وبعدها شلتها وحطيت لها موية ودخلت وجهها بالمويه ابيها تشرب علشان يسهل عليها الهضم بس عيت ما تشرب فرجعتها بالشبك حقها ودخلت بيتها تنام وتركتها يمكن ابو اربع ساعات او خمس ورجعت فتحت عنها وطلعتها ابيها تمشي علشان تهضم خليتها تآخذ فره وحاولت فيها تشرب وعيت والحين رجعتها بالبيت مره ثانية ودخلت المخبأ حقها ونامت اما اليوتيوب دورة مقاطع لأصلات صغار زي اللي عندي وما حصلت كلها كبار واغلبهم يصور الهجوم بس ويوقف ما اشوف البلع بالكامل |
رد: قررت أشتري أصلة بورمية ولكن عندي استفسارات
اذا حطيتها بالمويه وطلعت منه لاترجعه لها غصب
لاتخاف من سالفة المويه اذا اكلت وجبه راح يكون فيها مياه اكيد وبتستغني عن الشرب وقتها وبالنسبه للهظم خلها تهظم براحتها المشي ماراح يفيدها هي تججلس في البيت عشان تهضم على رواقه P: بتلاحظ بعد ثلاث ايام تقريبا بطنها تحسه فاضي لكن بتشوف اخر الذيل ممتلئ شوي , ذاك الوقت حطها بالمويه وان شاء الله توصخ .. حاول انك ماتشيلها كثير الايام ذي اما المقاطع خلاص ماضن تحتاج الحين لنك شفتها قدامك وعرفت وش تسوي :) |
رد: قررت أشتري أصلة بورمية ولكن عندي استفسارات
ايه ابشرك اكتسبت خبره ولله الحمد
وعقبال ما يصير عندي تشكيلة واسعه من الثعابين بس ان شاء الله أحصل وظيفة وازبط نفسي باحلى تشكيلة وبحكم ان الأسواق عندنا هنا سيئة لأبعد درجة فيه ثلاث حاجات بأطلبها من النت للأصلة وحبيت آخذ رايكم قبل لا اطلبها هل هي جيدة او لكم عليها ملاحظات او مالها داعي اساسا او غير مخصصه للأصلات لاني بالانقلش مش ولا بد http://www.amazon.com/Zoo-Med-Combo-...s=zoo+med+lamp http://www.amazon.com/Zoo-Med-Night-...s=zoo+med+lamp http://www.amazon.com/Reptology%C2%A...petsupplies_29 الحوض بأفصل لها تفصيل الطول مترين العرض 70 سم الارتفاع نص متر ( أحسه كبير بزياده ) وبأحط فيها فتحات تهوية اخرمها بالدريل من اليمين واليسار سقف الحوض هو اللي بيكون يفتح والواجهه مقفله بالقزاز كذا تمام ولا لكم ملاحظات ؟؟؟؟ صورة صورتها اثناء البلع :D http://im25.gulfup.com/2012-07-19/1342728088811.jpg |
رد: قررت أشتري أصلة بورمية ولكن عندي استفسارات
الاشياء اللي بتطلبها اضائه مخصصه للزواحف وهالشي ممكن فقط يخليك ماتشمس الثعبان
يعني ماتوقع يستاهل انك تطلب واللمبه ماتجي نفس اضائه الشمس وفايدته اشتر لمبه من محل الكهرباء بعشر ريال فقط للمنظر لني اشوف الاضائه ذي غاليه مره ومااتوقع بعد انك راح تتعيجز على تشميس ابو ربع ساعه والشي الثاني حق درجة الحراره والرطوبه , اتوقع هذي متوفر بالمحلات , ولو تاخذ درجة حراره لحاله بس احسن درجة الرطوبه مايحتاج , انت فقط احرص على بخ المويه يوميا , مرتين او ثلاث ع الاقل .. وبتكون الرطوبه كويسه ... قياسات الحوض مناسبه جدا وبخصوص الصوره حلوه ماشاء الله , لكن الفار شاريه ولا وش ؟ لن هذي الفيران احسها اوصخ من البيض + تقاوم اكثر من البيض بعد وانت قلت فوق انها عضت الثعبان البيض يستسلمون بالراحه P: |
رد: قررت أشتري أصلة بورمية ولكن عندي استفسارات
كلامك جميل
صدقت اشمسها بشمس طبيعيه افضل لها صحيا بخصوص الفار امس رحت السوق ابي اشتري لها هامستر قال لي السوداني الحبه ب 70 وسألته عن الفيران قال ما تحصلها هنا وكان معي واحد من الشباب قال تبي فيران ؟؟ قلت ايه قال بسيطه عندنا مستودع مليان بأجيب لك منه قلت أحسن ما بتسوي وفعلا جاني اليوم الثاني بالفار الصغير هذا وكان شرس جدا وانا شايل بيدي حديده احتياط اول ما نزلته عندها خافت ونحاشت منه ولحقها هو وعضها عضة قوية << حسيت بالمسكينه يوم شفته عظها على طول بالحديده على راسه حسيت جمجمته انطحنت يوم مات هي بدت تقرب منه شوي شوي والتفت عليه ببرووود واكلته ببرووووووود كان نفسي اشوفها شرسه تهجم عليه وتلعن خامسه لكن زين اني لحقت عليها ولا بيكون هو لعن خامسها وتوته توته خلصت الحتوته :rolleyes: اتمنى انكم استمتعتم بالقصة :D |
رد: قررت أشتري أصلة بورمية ولكن عندي استفسارات
هذا الوحيد الي ممكن ينفعك لو كان سقف الحوض شبك
http://www.amazon.com/Zoo-Med-Combo-...s=zoo+med+lamp لكن شوفه بمحلات لوازم البيت او لوازم العائله يمكن تحصله بدال ماتطلبه وهو مجرد هولدر للمبه بالنسبه لنا متوفر بالكويت |
رد: قررت أشتري أصلة بورمية ولكن عندي استفسارات
بصراحه للحين ما بديت في تفصيل الحوض
لاني ما ادري وين افصل عند نجار ولا عند محلات المطابخ ولا عند حداد مدري من اللي يفصلونه وهولدر اللمبه موجود ومتوفر وكلام الأخ ريان صحيح بآخذ لمبات عادية وانا بشمسها |
| جميع الأوقات بتوقيت GMT +3. الساعة الآن 10:31 PM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو