منتديات تو زوو - موضوع هام لكل مبتدى فى تربية الكلاب.

منتديات تو زوو (http://www.2zoo.com/vb/index.php)

- قسم هواة الكلاب (http://www.2zoo.com/vb/forumdisplay.php?f=26)

- - موضوع هام لكل مبتدى فى تربية الكلاب. (http://www.2zoo.com/vb/showthread.php?t=194581)

موضوع هام لكل مبتدى فى تربية الكلاب.

بسم الله الرحمن الرحيم

هنتكلم عن الهاوى الجديد اللى أول مره يشترى كلب و مش عارف هيتعامل معاه اذاى

طبعاً فى البدايه أحب أوضح ان أفضل شيئ لهاوى جديد انه يشترى جرو سن شهرين إلى ثلاث شهور

لإن الكلب البالغ انتا متعرفش طباعه ايه و هتكون غريب عنه و من الصعب عليه تقبل مالك جديد له ( خصوصاً لو ميتدئ )

يبقى كلامنا هيكون متركز على الجراوى !!

1 - أول ساعه لكلبى الجديد فى البيت هتكون اذاى ؟

الجرو بيكون عامل ذى الطفل الصغير بالظبط بيحتاج حب و حنان من اول لحظه ليه معاك

طبعاً هوه جاى على مكان و ناس اغراب عنه فهيكون خايف و مضطرب ( فى الغالب )

بس بعد مضى حوالى ربع إلى نص ساعه هيبدأ يكتشف المكان الجديد

هتلاقيه يشم فى اى حاجه يطولها سواء كراسى او اركان الغرفه الى هوه فيها

ولازم تسيبه يتعرف على مكانه الجديد ( حتى لو مش ده مكان إقامته مبيته )

2 - طب اديله أكل و ماء اول ما اجيبه ؟

طبعاً لاء انتا هتسيبه الأول يتعرف على المكان و الرهبه تزول منه و يبدأ فى اللعب معاك

3 - طب اديله أكل امتى ؟

بعد ساعه تقريباً من وجوده فى المكان و يفضل يقدم الطعام فى مكان مبيته حتى يألفه

4 - الجرو بياكل كام مره فى اليوم ؟

بياكل 4 مرات و تكون وجبات بسيطه مش كتير لأنه لسه صغير

و فى مواضيع كتير فى المنتدى بتشرح النظام الغذائى للجرو إلى ان يصبح كلب بالغ

5 - بعد الأكل و الشرب اعمل معاه ايه ؟

يفضل عدم إرهاق الجرو الصغير بكترة اللعب و الشيل و الحط فيه ( تذكر انه مثل الطفل الصغير )

و فى الحاله دى تضعه فى مكان مبيته ولازم يكون مكان جيد التهويه به إناره و لا يوجد به رطوبه

و لازم يحتوى مكان إقامته على مشايه قديمه مثلاً تضع تحتها كرتونه علشان مش ينام على البلاط

و يجب وضع إناء به ماء نظيف يتم تغيره فى اليوم من 4 : 6 مرات

6 - طب بعد ما اسيبه و اقفل عليه مكان إقامته ايه اللى هيحصل ؟

بنسبة 99% هتلاقى الجرو يصرخ و يعووص طول الليل ( ممكن توصل لساعات الحكايه دى )

الحل الوحيد انك تسيبه و مش تسأل عنه نهائى ... بكرر مش تسأل عنه نهائى

علشان لو روحتله و سيبته تانى هيرجع يصوت و يعوص تانى و هيقرفك و مش هتقدر تنام ربع ساعه على بعضها

ملحوظه مهمه : قصة الصراخ و العواص دى بتستمر حوالى يومين إلى ثلاث أيام

و بعد كده هوه هيتعود على النظام الجديد و هيبطل يعمل كده

7 - تانى يوم الصبح بعد ما افطره اعمل معاه ايه ؟

كلبك لو مش متطعم لازم تطعمه ثمانى و ده مهم جداً ده مبدئياً

طبعاً الكلب لو فى سن شهرين او ثلاثة أشهرلازم تحميه بشامبو مثلاً و تنشف جسمه كويس بفوطه مخصوصه ليه

و تفتش فى شعره كويس و ودانه و بين صوابعه و تحت باطه علشان ممكن يكون فيه حشرات ذى القراض مثلاً

و لو لقيت الكلب فيه بعض الحشرات تعمل الآتى

تاخده لأقرب صيدليه بيطريه او دكتور بيطرى تطعمه ثمانى و تطلب منه حقن بتترش على ظهر و رقبة الكلب

دى مضاده للحشرات ذى القراض و البراغيت

و لازم تعطى كلبك دواء للديدان فى منه شرب و منه اقراص

بياخد منه يومياً لمدة اسبوع كل شهرعلطول علشان تحميه من الأمراض اللى بتسببها الديدان للكلب

8 - بعد ما طعمته و الكلب نظيف مفيهوش حشرات اعمل ايه ؟

تهتم بقه بحاجتين مهمين جداً علشان كلبك مش يقرفك لما يكبر

اول حاجه تعوده على مكان قضاء الحاجه بره البيت فى الشارع

و ده سهل مش صعب بس محتاج شويه صبر منك

انك بعد كل وجبه للجرو تاخده بره البيت فى المكان اللى انتا عايزه يعمل فيه و تسيبه شويه

هتلاقيه بيشم فى الارض و يلف حوالين نفسه شويه و بعدين هتلاقيه عملها سواء بول او براز

فى الوقت ده انتا تشجعه بالطبطبه عليه و لو معاك بسكوت تديله قطعه منه

كده هيفهم انه عمل شيئ يرضيك و بياخد عليه مكافأه

ثانى شيئ انتا فقط اللى تلعب معاه و مش تخلى حد من اصدقائك يقرب منه

9 - طب السن المناسب لتدريب الكلب ايه ؟ و ادربه طاعه و لا شراسة الأول ؟

السن المناسب لتدريب الجرو بيكون 3 شهور

و لازم تعرفه اسمه قبل كل شيئ و بعدين تدريبات الطاعه و لما يكبر شويه تعلمه حراسه و شراسه

( دول انا هتكلم عنهم فى موضوع منفصل بإستفاضه قريباً بأمر الله )

10 - الكلب لو عمل حاجه غلط اضربه بقوه ولا ازعق فيه و خلاص ؟

لو ضربت كلبك بقوه فى السن الصغير ده هيطلع جبان و هيبقى خايف منك و يحاول يتجنبك

و ممكن انتا تضربه ضربه تسببله كسر مثلاً ( لاحظ انه جرو صغير )

انتا ممكن تشخط فيه و تقرصه بالراحه كده علشان ميعملش الشيئ الغلط ده تانى

11 - طب الكلب اجيبله طوق و سلسله ولا لما يكبر شويه ؟

لازم تعوده على الطوق بالذات فى السن ده و هتلاقيه فى الأول رافضه و بيحاول يشيله

بس بعد فترة ساعه كده هتلاقيه تقبله عادى

و السلسله دى ضروريه برضو علشان تعود الكلب يمشى بيها معاك ( هتكلم عنها برضو فى موضوع التدريب )

12 - طب احمى كلبى كل كام يوم ؟

فى الصيف كل 3 ايام ( لو تقدر ) او كل اسبوع

و فى الشتاء كل شهر مره و فى يوم مشمس

13 - طب انا بلاحظ ان كلبى بيحاول يعض فى كل حاجه حتى رجلى اعمله ايه ؟

الجرو فى السن ده بيبدأ يسنن ( بيبدل سنان يعنى ) و ده بيكون من بداية الشهر الثالث إلى الشهر الرابع

حاول تديله حاجه يعض فيها يعنى مثلاً لعبه جلد او قطعه قماش قديمه

و انا أفضل تجيبله عضمه بتلو من الجزار يعض فيها براحته

دى بتقوى فكه و بتديله كالسيوم برضو

14 - لو كلبى عضنى اعمل ايه ؟

اولاً ده جرو صغير و هوه فى الغالب بيلعب معاك و عضته مش مؤذيه فمش تخاف و مش تضربه

انتا بس طهرها بأى مطهر فى البيت عندك

15 - طب تنصحنى بحاجه تانيه ؟

لازم تخصص لبس معين تلبسه وقت وجودك مع كلبك

و تكون صبور جداً فى التعامل مع كلبك لأنه مع الوقت و التدريب هترتاح جداً و هتستمتع بوجوده معاك
للمزيد من مواضيعي

منقول للامانه