|
حلمات قطتي محمرة وتألمها
قطتي الي فيها المشكلة انثى شيرازية 11 شهر مرضعه حالياَ ..
سؤالي واضح من العنوان اثداء او حلمات قطتي محمرة وبتألمها وقت الكتنز يرضعون يمكن صار لها خمسة الى اربعة ايام او اكثر بس اليوم انا اكتشفت (وش اسوي عليمية :( ) كانت وهم يرضعون هي تتألم تصدر صوت حسيت انها متضايقه بس على بالي عشان الكتنز بيتخانقو على حلمة معينة وبيسحبوه وهي تتألم اثاري المشكلة كبيرة طلع فيها احمرار بالحلمات وبعض الحلمات غامق احمرارها وبعضها احمر عادي لدرجة انو اليوم وهم يرضعون قامت تصرخ وتصرخ فيهم وبتشيل الي ماسك حلمتها الي توجعها وتصرخ في وجهه حتى الكتن قام فززع منها :wao: ويروح يركض على بيته الي ينام فيه ماعليش استحملوني اول مرة تولد عندي قطوة ومادري شسوي الكتن الحين اليوم كملو شهر يعني مابينخاف عليهم ان شاءالله راح اهتم فيهم لحد ماتطيب الام قريت كثير عن العناية بالرضيع لحد ما حفضت الخطوات لكن هي كيف اعالجها ؟؟! تكفون ودايم اقولها : ماقدر اوديها بيطري من جهة اهلي يتريقو يقولو مافيها الا العافية ومن جهة البياطرة عندنا بالقصيم ما أثق فيهم وش اسوي الله يسعدكم وين ماكنتو ؟ :( ^ لدرجة كثير افكر ابيع القطاو كلهم الي عندي مع اني اعشقهم وماتصور حياتي بدونهم بس مشكلتي اذا طلع فيهم مشكلة مادري وش اسوي |
رد: حلمات قطتي محمرة وتألمها
على فكرة انا عزلت الام عنهم لانها هي تحن عليهم وتروح ترضعهم بس تؤلمها اثداءها وتقوم تصرخ عليهم
واخاف تكرههم او هم يكرهوها ويمكن يزيدون الطين بلة قمت عزلتها في مكان ثاني ../ هل هذا الاجراء صحيح ؟؟ |
رد: حلمات قطتي محمرة وتألمها
هلا اختـي ماعليج هدي بالج لازم أول تجــربه تكون فيها صعــوبات بالنسبه للأم .. سوي لها كمادات مــاي ساخنه .. ولازم البيـطري فـ حاولي تروحين .. واذا مره مره مره ماقدرتي تاخذينهـا , ع الأقــل وصـي احد من اهلج يجيب لج مضــاد حيوي من عند البيـطري وان شاءالله خيــر والإجراء الي اتخذتيـه أوكي تمام بس أهم شي عالجي الأم بسررعه عشان بس تخف عندها الحاله يرجعون يرضعــووون .. لسا مره بدري ع الفطــام وبالتوفيق |
رد: حلمات قطتي محمرة وتألمها
عزلك للام اكبر غلط ياقلبي
لازم ترجعين الام عند الكيتنز حتى لو توجعت والافضل لعلاج الحلمات الملتهبه انك تحطي كيس وتمليه ثلج وتكمدي فيه صدر القطه فقط عشر دقايق. وان شاء الله كل التورم والاحمرار يروح منها طمنيني عنها |
رد: حلمات قطتي محمرة وتألمها
احد يقول كمادات باردة واحد يقول كمادات ساخنة ؟؟!
وبالنسبة لعزل الام انا اشوف انه ضروري لانها صارت تتهرب منهم وهم يلاحقوها والشي الثاني ماقدر اعالجها وهي وسطهم كل شوي ناط لي على حلمتها كتن بالنسبة للمضاد مافكرت فيه هل هو ضروري او تكفي العلاجات الموضعية وهل المضاد المناسب هو بيتاموكس وكيف جرعته وهي ترضع ؟ بيني وبينكم الاجراء الي سويته من امس :/ اخلي الكتنز ترضع من امها بالدور مره ثنين ومره ثلاثه (مجموعهم خمسه الله يحفضهم من كل اذى) لانه فيه حلمتين هم اكثر طلب عليهم وهم اكثر اصابة فكنت الحلمات الاكثر اصابة اغطيها بمنديل واخليهم يستعملو الباقي وهي خلاص ماتتوجع كثير ولا تهرب وهم يرضعو بس تعذبت كثير امس وانا ماسكه الحلمات المصابة وهم ياخذو وقت بالرضاعة وبس يخلصو اوديهم مكانهم واجي امسح حلمتها ببيتادين وبعد ماينشف احط عليه كريم ابو اسد يعتبر انتي بيوتك أو مضاد حيوي موضعي بس تعبت من الحالة وشكلها مطولة وفكرت ارضع الكيتنز صناعي بشكل مؤقت بس للاسف حالياً ماعندي غير حليب بقر وقريت انه القطط ماتهضمه ويسبب لها مشاكل وحنا مانبي نطيح بمشكلة جديدة قمت طلبت من اهلي يشترولي حليب السعودية قليل الدسم بس ماشترو لي للحين يعني انتضرهم لحد مايجي على مزاجهم ويجيبو والله قاعده اتعذب نفسياً حيل :( ايه ماقلت لكم اللي زايد الطين بلة / الام طلع عندها اسهال :( :( لونه فاتح وماله ريحه كريهة يعني ان شاءالله انه امره بسيط وهي تشرب موية كثير بالفتره الاخيره ونزل وزنها (بالنسبة للوزن اتوقع هذي طبيعتها لانه قبل الحمل وهي نحيفة ويمكن متنت شوي مع الحمل ورجعت خسرت الوزن ماادري) تتوقعون صارلها جفاف هل ينفع اعطيها بيبي لايت وكيف الجرعه .؟ هاه تكفون كيف اتصرف بكل المشكلتين مع ملاحظة انه مو كل شي اقدر اوفره بسرعه لازم يجي على مزاج الي يجيب لي يمكن بعد يومين ثلاثه اسبوع !! << والله اتكلم جد تعبت |
رد: حلمات قطتي محمرة وتألمها
جيبي لها شراب كابتين من الصيدليه البشريه واعطيها ملئ 2سم مرتين في اليوم
لمده خمس ايام ..وكثري لها من الدراي فود واعطيها زبادي بالسرنجه..ممتاز ويطهر المعده والامعاء واقطعي عنها كل منتجات الحليب من جبن وغيره. وجيبي لها محلول الجفاف بيبي لايت واعطيها منه 5سم ثلاث مرات في اليوم. ولازم تعطينها فيتامينات مقويه لها حتى تقدر تستمر بالرضاعه وتفيد جسمها |
رد: حلمات قطتي محمرة وتألمها
هلا اختــي والله انا الي شفته من تجــارب الأعضاء مع تورم حلمات الأم .. هي الكمادات الساخنه او الدافيه مع مضــاد حيــوي , حتى احنا نستخدم الكمادات الحاره لما نحس بألم بمكان في جسمناا أمأ الكمادات البارده تنفع لارتفاع درجه الحراره البيتـاموكس أيوا ينفع .. عطيها مرتين باليوم , الجرعه نص ملم بما انها ضعيفه على كلامج بالنسبه لنظامج الحين اوكي تمــام .. أهم شي الحلمات الملتهبه مايشدون عليها والي صار لها بسبب تركيزهم على هالحلمتين الإسهال .. إذا كنتي تعطينها تونه او معلبات او حليـب فـ أقطعيه عنها واكتفي بالدراي فود والدجاج المسلوق مع الخضار وعطيها دوا كابتين للإسهاال .. مرتين باليوم , ماودي ألخبطك بينا انا وناديا لكن انا الجرعه دايما اعطيهم نص ملم او 1 ملم ما أتعدى والبيبي لايت حطيه لها بدل المــاي , بس مراح يكون تأثير الجفاف عليها قـوي , هو خطر على الكيتين اما الكبار يتحملون فـ لاتحاتين واجد وبس .. طمنينا عنها :) |
رد: حلمات قطتي محمرة وتألمها
الخبيرة ناديا
مشكورة حبيبتي على الرد السريع ويارب يحميك وقطتك من كل اذى يارب ان شاءالله بإذن الله بطلع اجيب لها الدوا وبالنسبة للزبادي قرأت انه ماينفع وقت الاسهال لانه يزود المشكلة وهي اساسا ماتاكل الا دراي فود واحيان وبالغصب تاكل دجاج وجبنة بالنسبة للفيتامينات ماعندي للاسف الا للحقن اشتراه ابوي لما انمرض الذكر وباقي عندي بس مشكلته لازم بالعضل وانا ما اجرؤ اعطيه يعني نحذف الفيتامين من القائمه لانه ماحد بيجيب لنا من بيطرية ايه انا رجعت الام للكيتنز بعد ماقالت لي ناديا انه اكبر خطا العزل حسيت بالذنب وديتها لهم بس هي اسمعها تتألم وتنادي لي عشان تبي تطلع !! ربي كريم ربي كريم |
رد: حلمات قطتي محمرة وتألمها
يعطيك العافيه مشرفتنا على التوضيح
لاكن الكمادات انا اختلف معاك فيها لان الحلمات حاره وملتهبه عندها واذا حطيتي عليها كماده دافيه راح تزيد عندها الحراره والالتهاب..لاكن البارد يهدي من الحراره اللي تحس فيها القطه ويريح من تورم الحلمات المنتفخه..لان اي تورم في جسم القطه بيحتر زياده فلازم تكمديه بماء بارد حتى تخف حراره الحلمات. والكابتين الجرعات القليله ماتسوي اي شي مع القطه..وهو علاج امن ومامنه خوف ابدا من ناحيه تركيبه والافضل مقدار للقطط الكبيره 2سم بالسرنجه.. |
رد: حلمات قطتي محمرة وتألمها
سيسي مون : اشكرك لردك السريع والمطمئن وربي يحميك انتي وقطك من كل اذى
الدوا ان شاءالله كابتين وبيبي لايت ويارب اتطمن عليها هي وكيتنها وارتاح انا بئه |
رد: حلمات قطتي محمرة وتألمها
اقتباس:
الله يسلمك يارب ويخليلك قطوتك لاابدا ياقلبي الزبادي مطهر ممتاز للامعاء ولازم تعطينها منه لان من مكوناته بكتيريا مفيده للجسم وخاصه الامعاء. والله يعينك يارب ويقويك |
رد: حلمات قطتي محمرة وتألمها
توكلنا على الله راح استعمل كمادات باردة مع كابتين 2 سم وبيبي لايت بدل الموية
ماننحرمش منكم ،، يا لكم طيبتو خاطري كثيراً " اشكركم من الاعماق " |
رد: حلمات قطتي محمرة وتألمها
ناديا / ان شاءالله راح اعطيها زبادي مره باليوم
بس الحين ماقلتو لي هل استعمل لها بيتاموكس مع كابتين وبيبي لايت مافيه ضرر ؟؟ هل البيتاموكس القاه بالصيدلية البشريه؟ لانه ماحد بيجيب لي من بيطرية الا عقب مايستفحل الموضوع |
رد: حلمات قطتي محمرة وتألمها
البيتاموكس هو مضاد حيوي وتلاقيه في الصيدليه البيطريه او محلات الحيوانات
وعادي استخدميه مع كابتين مامنه ضرر او خوف لانه مضاد حيوي خفيف وواسع المجال واعطيها منه ملئ قطاره كامله مره باليوم. والله يشافيها لك |
رد: حلمات قطتي محمرة وتألمها
حبيت افيدكم بالنسبة لالتهاب الحلمات عالجته بكذا طريقة :
- مرهم او كريم فوسيدين .. مضاد موضعي من الصيدلية البشريه - مس ازرق - منقوع المرة طبعا كلهم بإستشارة من امي انا اي شي يجي بستي اتوتر ماعرف اتصرف تجيني لخبطة مادري من وين كنت استعمل اول شي الفوسيدين لانه كانت الحالة متقدمة بعدين لما شفتها خفت الامها صرت امسحه تقريباً يومياً بمنقوع المرة لتفادي اي شي بالمستقبل لكم ودي " |
| جميع الأوقات بتوقيت GMT +3. الساعة الآن 09:21 PM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو